- રેલવેના પ્રવાસીઓ માટે ગુડ ન્યૂઝ
- 25 ટકા સુધી ઘટી જશે ટ્રેનના ભાડા
- વંદે ભારત સહિત તમામ ટ્રેનના ઘટશે ભાડા
રેલવે પ્રવાસીઓ માટે સારા સમાચાર છે. રેલવે બોર્ડે ભાડા ઘટાડાનું એલાન કરી નાખ્યું છે. રેલવે બોર્ડે એક આદેશમાં કહ્યું છે કે વંદે ભારત અને અનુભૂતિ અને વિસ્ટાડોમ કોચ ધરાવતી તમામ ટ્રેનોમાં એસી ચેર કાર અને એક્ઝિક્યુટિવ ક્લાસના ભાડામાં મુસાફરોની સંખ્યાના આધારે 25 ટકા સુધીનો ઘટાડો કરવામાં આવશે. આદેશ અનુસાર ભાડામાં છૂટ પરિવહનના સ્પર્ધાત્મક માધ્યમોના ભાડા પર પણ નિર્ભર રહેશે. રેલવે સેવાઓના મહત્તમ ઉપયોગને ધ્યાનમાં રાખીને રેલવે મંત્રાલયે રેલવે ડિવિઝનના પ્રિન્સિપલ ચીફ કોમર્શિયલ મેનેજર્સને એસી-સીટર ટ્રેનોના ભાડામાં સબસિડી આપવાનો અધિકાર આપવાનો નિર્ણય કર્યો છે.
25 ટકા જેટલું ઘટશે ભાડું
રેલવે બોર્ડના આદેશમાં કહેવામાં આવ્યું છે કે, "આ યોજના અનુભૂતિ અને વિસ્ટાડોમ કોચ સહિત તમામ એસી સીટર ટ્રેનોના એસી ચેર કાર અને એક્ઝિક્યુટિવ ક્લાસમાં લાગુ થશે." "બેઝિક ભાડા પર આ છૂટ મહત્તમ 25 ટકા સુધી હોઈ શકે છે. રિઝર્વેશન ફી, સુપરફાસ્ટ સરચાર્જ, જીએસટી જેવા અન્ય ચાર્જ અલગથી લઈ શકાય છે. મુસાફરોની સંખ્યાના આધારે કોઈપણ કેટેગરી અથવા તમામ કેટેગરીમાં છૂટછાટ આપી શકાય છે.
વિશેષ ટ્રેનો પર લાગું નહીં થાય
રેલવેએ તેના આદેશમાં એવું પણ કહ્યું છે કે છેલ્લા 30 દિવસ દરમિયાન 50 ટકાથી ઓછી વ્યવસાયવાળી કેટેગરીઓ પર વિચાર કરવામાં આવી શકે છે. ભાડામાં છૂટછાટો અંગે નિર્ણય લેતી વખતે, પરિવહનના સ્પર્ધાત્મક માધ્યમોના ભાડાને ધ્યાનમાં લેવામાં આવશે. આદેશમાં કહેવામાં આવ્યું છે કે, "કન્સેશન વ્યવસ્થા તાત્કાલિક અસરથી લાગુ કરવામાં આવશે. જે મુસાફરોએ પહેલેથી જ બેઠકો બુક કરાવી લીધી છે, તેમને ભાડુ પરત કરવામાં આવશે નહીં. જે ટ્રેનોમાં ચોક્કસ વર્ગમાં ભાડા વધારા/ઘટાડાની વ્યવસ્થા લાગુ કરવામાં આવે છે અને મુસાફરોની સંખ્યા ઓછી હોય છે, ત્યાં મુસાફરોની સંખ્યા વધારવાની કવાયત તરીકે આ યોજના પ્રારંભિક તબક્કામાં પાછી ખેંચી શકાય છે. આદેશમાં સ્પષ્ટતા કરવામાં આવી છે કે આ યોજના રજાઓ અથવા તહેવારની મોસમ દરમિયાન ચાલતી વિશેષ ટ્રેનો પર લાગુ નહીં થાય.
