ક્રિકેટ / બે પૂર્વ દિગ્ગજ ખેલાડીઓનો દાવો: રોહિત બાદ ગુજરાતી સ્ટાર ખેલાડી બની જશે ટીમ ઈન્ડિયાનો કેપ્ટન

• પાકિસ્તાનના પૂર્વ ફાસ્ટ બોલરે કર્યો મોટો દાવો
• હાર્દિક પંડ્યાને ગણાવ્યા ટીમના ભાવી કેપ્ટન
• પાકિસ્તાન સામેની મેચમાં પંડ્યાએ કર્યું શાનદાર પ્રદર્શન

ભારતના સ્ટાર ઓલરાઉન્ડર હાર્દિક પંડ્યા છેલ્લા ઘણા સમયથી શાનદાર પ્રદર્શન કરી રહ્યા છે. તેમણે પોતાના દમ પર ભારતીય ટીમને ઘણી મેચો જીતાડી છે. જ્યારે તેઓ પોતાની લયમાં હોય, ત્યારે કોઈપણ તેમને બોલર સહેલાઈથી આઉટ કરી શકતો નથી. હવે પાકિસ્તાનના પૂર્વ ફાસ્ટ બોલર વસીમ અકરમ અને વકાર યુનિસે તેમને ભારતીય ટીમના આગામી ભાવી કેપ્ટન (next future captain of the Indian team) ગણાવ્યા છે.

વસીમ અકરમે કહી આ વાત
વસીમ અકરમે કહ્યું કે, હાર્દિક પંડ્યાએ પહેલીવાર IPLની કેપ્ટનશીપ કરી હતી અને તેમની ટીમે આઈપીએલની ટ્રોફી પોતાના નામે કરી હતી. તેઓ માનસિક રીતે મજબૂત થયા છે. ટીમમાં તેમની ફિનિશર તરીકેની ભૂમિકા છે અને તેઓ તેને સારી રીતે નિભાવી રહ્યા છે.

હાર્દિક પંડ્યાને કહ્યા ભવિષ્યના કેપ્ટન
પાકિસ્તાનના પૂર્વ ફાસ્ટ બોલર વકાર યુનિસે કહ્યું કે, 'જો તેઓ ભવિષ્યમાં ઈન્ડિયન ક્રિકેટ ટીમના કેપ્ટન બનશે તો મને જરા પણ આશ્ચર્ય નહીં થાય.' વસીમ અકરમે વધુમાં કહ્યું કે, 'પહેલા તેઓ IPLમાં કેપ્ટન બન્યા. ત્યાં જીત મેળવી, હવે તેઓ ટીમમાં એક મેન ફોર્સ છે. તેઓ કેપ્ટનને સલાહ આપે છે. તેમનો પોતાનો એક પ્રભાવ છે. તેઓ શાંત સ્વભાવના છે.'

પાકિસ્તાન સામેની મેચમાં કર્યું શાનદાર પ્રદર્શન
હાર્દિક પંડ્યાએ પાકિસ્તાન સામે ધમાકેદાર બેટિંગ કરી હતી. તેમણે એક ફોર અને બે સિક્સરની મદદથી 37 બોલમાં 40 રન બનાવ્યા અને ટીમ ઈન્ડિયાની જીતમાં મહત્વની ભૂમિકા ભજવી હતી. આ પહેલા બોલિંગમાં પણ કમાલ કરતા તેમણે ચાર ઓવરમાં 30 રન આપીને 3 મહત્વની વિકેટ ઝડપી હતી. તેમના શાનદાર પ્રદર્શનના કારણે જ ટીમ ઈન્ડિયા વિજય નોંધાવવામાં સફળ રહી. તેમણે ભારત માટે 11 ટેસ્ટ મેચ, 66 વનડે મેચ અને 74 T20 મેચ રમી છે.