અગાઉ સારા એવા પ્રમાણમાં વરસાદ પડતા ખેડૂતોએ પાકનું વાવેતર શરૂ કર્યું હતું. સાણંદની આજુબાજુનાં 13 ગામોનાં ખેડૂતો દ્વારા ખેતરમાં ડાંગરનાં પાકનું વાવેતર કર્યું છે. પરંતું છેલ્લા એક મહિનાથી વરસાદ ખેંચાતા તેમજ સિંચાઈ માટે પાણી ન મળતા જગતનો તાત એવો ખેડૂત ચિંતાતુર બન્યો છે.
Share
વરસાદ ખેંચાતા ખેતરોમાં પાક મુરઝાયો
સાણંદના ગામોમાં વરસાદ ખેંચાતા ખેડૂતોની ચિંતામાં વધારો
ગુજરાતમાં ખેડૂતો ચોમાસા આધારિત ખેતી કરતા હોય છે. ચોમાસાની શરૂઆતમાં સારો વરસાદ થયો હતો. જેનાં કારણે ખેડૂતોએ મોટાભાગનાં પાકોનું વાવેતર કર્યું હતું. પરંતું છેલ્લા એક મહિનાથી વરસાદ ખેંચાતા જગતનાં તાતની ચિંતામાં વધારો થયો છે. વરસાદ ખેંચાતા ખેતરમાં વાવેતર કરેલ પાકને મોટાપાયે નુકશાન થવાની ભીંતી ખેડૂતો સેવી રહ્યા છે. હાલ ખેતરમાં જ્યાં જુઓ ત્યાં પાણી ઝંખતા ડાંગરનાં રોપા જોવા મળી રહ્યા છે.
સાણંદનાં 13 ગામનાં ખેડૂતો ચિંતામાં મૂકાયા
તાજેતરમાં પડેલ સારા એવા વરસાદને લીધે ખેડૂતોએ ખેતરમાં પાકનું વાવેતર શરૂ કર્યું હતું. પાકનું વાવેતર કરે એક મહિનાં જેટલો લાંબો સમય વીતી જવા છતાં વરસાદ ન થતા ખેડૂતોનો જીવ પડીકે બંધાયો છે. વરસાદ ખેંચાતા સાણંદનાં ચરલ, ઝોલાપુર, શિયાવાડા, મખીયાવ, બકરાણા સહિતનાં 13 ગામનાં ખેડૂતો ચિંતામાં મૂકાયા છે. વરસાદ ખેચાતા ગામનાં ખેડૂતોની ચિંતામાં વધારો થયો છે. હવે ખેતરમાં ઉભા પાકને સિંચાઈનું પાણી ન મળતા ધરતીનાં તાત ખેડૂતોને હાથમાં આવેલો કોળિયો જાય તેવી સ્થિતિ સર્જાઈ છે.
એક વીઘામાં 15 થી 20 હજાર ખર્ચ એળે જાય તેવી સ્થિતિઃ ખેડૂતો
આ બાબતે ખેડૂતોએ જણાવ્યું હતું કે સરકાર ઉધોગોને 24 કલાક લાઈટ-પાણી આપે છે તો ખેડૂતોને કેમ નહી. ખેડૂતને જે લાઈટ મળે છે તે પણ પૂરતી મળતી નથી. 8 કલાકની વીજળીમાં ચાર થી પાંચ કલાક લાઈટ હોય છે. સમયરસ લાઈટ ન આવવાનાં કારણે પૂરતું પીયત થતું નથી. એક વીઘામાં 15 થી 20 હજાર ખર્ચ એળે જાય તેવી સ્થિતિ થઈ છે. વિદ્યુત બોર્ડ અને કેનાલમાં રજૂઆત પણ કરી છતાં પાણી આવ્યું નથી. ખેતરમાં જ્યાં જુઓ ત્યાં પાણી ઝંખતા ડાંગરનાં રોપા જોવા મળી રહ્યા છે.
