ધર્મ / જો તમે ધાર્મિક સ્થળોની મુલાકાત લેવાનું વિચારો છો તો પહેલાં આ જાણી લો, આજથી કેદારનાથ સહિત આ યાત્રાધામોના કપાટ બંધ

• દેશના ઘણા મોટા તીર્થસ્થળો પર થયા કેટલાક ફેરફારો 
• બાંકે બિહારી મંદિરનો સમય આજથી બદલાઈ જશે
• કેદારનાથ ધામના કપાટ આજથી બંધ કરી દેવામાં આવ્યા

જો તમે ધાર્મિક સ્થળો પર યાત્રા પર જવાનું વિચારી રહ્યા છો, તો આ સમાચાર ચોક્કસ વાંચો. વાસ્તવમાં, આજથી ઘણા મોટા તીર્થસ્થળો પર કેટલાક ફેરફારો થવા જઈ રહ્યા છે. જો વૃંદાવનની વાત કરીએ તો અહીંના બાંકે બિહારી મંદિરનો સમય આજથી બદલાઈ જશે. મંદિરના મેનેજર મુનીશ શર્માએ જણાવ્યું હતું કે, "હવે રાજભોગ સેવા માટે મંદિરના કપાટ બપોરે 1.00 વાગ્યે બંધ થઈ જશે. સવારની પાળીમાં, મંદિર સવારે 8:45 વાગ્યે ખુલશે અને ભગવાનની ભોગ સેવા માટે બપોરે 1:00 વાગ્યા સુધી એક સંક્ષિપ્ત વિરામની સાથે ખુલ્લુ રહેશે. બપોરના સત્રમાં મંદિર સાંજે 4:30થી 8:30 વાગ્યા સુધી ખુલશે."

કેદારનાથ ધામના કપાટ થયા બંધ
કેદારનાથ ધામના કપાટ આજથી બંધ કરી દેવામાં આવ્યા છે. આજ સવારે 8:30 વાગે વૈદિક મંત્રોચ્ચાર વચ્ચે મંદિરના કપાટ બંધ કરવામાં આવ્યા છે. તો યમુનોત્રી ધામના કપાટ પણ આજથી બંધ કરાયા છે. છેલ્લે 19 નવેમ્બરના રોજ બદ્રીનાથ ધામના કપાટ બંધ કરવામાં આવશે.

દશેરાના રોજ જાહેર કરાઈ હતી તારીખો
ચાર ધામની યાત્રાના સમાપનને લઈને દશેરાના અવસર પર કપાટ બંધ કરવાની તારીખો જાહેર કરવામાં આવે છે. આ માટે મુહૂર્ત પ્રમાણે તિથિ અને સમય નક્કી કરવાની પરંપરા રહી છે. તેના આધારે નિર્ધારિત તારીખે ચારેય ધામના કપાટ બંધ કરવાની તૈયારીઓ શરૂ કરવામાં આવી હતી. શ્રી હેમકુંડ સાહેબ અને લક્ષ્મણ મંદિરના દરવાજા 10 ઓક્ટોબરે બંધ કરી દેવામાં આવ્યા છે.

કપાટ બંધ કરવાની પોતાની છે માન્યતા
શિયાળા દરમિયાન યાત્રાની અગમ્યતાને લઈને કપાટ બંધ કરવામાં આવે છે. જો કે, કપાટ બંધ કરવાને લઈને વિધિ-વિધાની પણ પોતાની માન્યતાઓ છે. ચાર ધામ યાત્રા 3 મેથી શરૂ થઈ હતી. આ દિવસે ગંગોત્રી અને યમુનોત્રી ધામના કપાટ ખોલીને ચાર ધામની યાત્રા શરૂ કરવામાં આવી હતી. અક્ષય તૃતીયાના અવસરે યમુનોત્રી ધામના કપાટ 12:15 વાગ્યે અભિજિત મુહૂર્તમાં ખોલવામાં આવ્યા હતા.

દિવાળી પહેલા 15 લાખથી વધુ શ્રદ્ધાળુઓ પહોંચ્યા હતા કેદારનાથ ધામ
તો ગંગોત્રી ધામના કપાટ સવારે 11.15 વાગ્યે ખોલવામાં આવ્યા હતા. કેદારનાથ ધામના કપાટ 6 મેના રોજ સવારે 6.25 વાગ્યે ખોલવામાં આવ્યા હતા. બદ્રીનાથ ધામના કપાટ 8 મેના રોજ સવારે 6.15 વાગ્યે ખોલવામાં આવ્યા હતા. દિવાળી પહેલા આ વખતે રેકોર્ડ 15 લાખથી વધુ શ્રદ્ધાળુઓ કેદારનાથ ધામ પહોંચ્યા હતા.

દૈનિક ક્વોટા કરાયો હતો નક્કી 
કેદારનાથ ધામ માટે દરરોજ 12 હજાર અને બદ્રીનાથ ધામ માટે 15 હજાર તીર્થયાત્રીઓનો ક્વોટા તૈયાર કરવામાં આવ્યો હતો, પરંતુ તેનાથી વધુ શ્રદ્ધાળુઓ દરરોજ આ બંને ધામોની મુલાકાત લેતા અને પૂજા કરતા હતા. ગંગોત્રી ધામ માટે 7 હજાર અને યમુનોત્રી ધામ માટે 4 હજાર યાત્રાળુઓનો દૈનિક ક્વોટા નક્કી કરવામાં આવ્યો હતો.