તક / આવતીકાલથી અમદાવાદમાં કરદાતાઓને મળશે 15 ટકા એડવાન્સ રિબેટ સ્કીમનો લાભ, જાણો ક્યાં સુધી લાગુ રહેશે

• પ્રોપર્ટી ટેક્સધારકો માટે આનંદના સમાચાર
• પ્રોપર્ટી ટેક્સના કરદાતાઓને કાલથી ૧૫ ટકા એડ્વાન્સ રિબેટ સ્કીમનો લાભ 
• વર્ષ ૨૦૨૪-૨૫ અને વર્ષ ૨૦૨૫-૨૬નો એડ્વાન્સ ટેક્સ પણ ચૂકવી શકાશે

અમદાવાદ મ્યુનિસિપલ કોર્પોરેશનના પ્રોપર્ટી ટેક્સધારકો માટે આનંદના સમાચાર છે. આવતીકાલથી તંત્ર દ્વારા એડ્વાન્સ ટેક્સ રિબેટ યોજના હેઠળ કરદાતાઓને ૧૫ ટકા રિબેટનો લાભ મળતો રહેશે. આ સ્કીમ એક મહિના સુધી એટલે કે તા. ૧૭ મે સુધી ચાલનારી એડ્વાન્સ પ્રોપર્ટી ટેક્સ રિબેટ યોજનાના મામલે અત્યાર સુધીની ઐતિહાસિક ગણાય તેવી સ્કીમ છે. શહેરના પ્રામાણિક કરદાતાઓ માટે મ્યુનિ. પ્રોપર્ટી ટેક્સ વિભાગ દ્વારા ૧૫ ટકા રિબેટ મળે તેવી અભૂતપૂર્વ યોજનાની જાહેરાત કરાઈ હોઈ તેની અમલવારી આવતી કાલથી થશે. તંત્ર દ્વારા સળંગ ત્રણ વર્ષ સુધી એડ્વાન્સમાં ટેક્સ ભરપાઈ કરનારા કરદાતાઓને વધુ બે ટકા રિબેટ આપવાની જાહેરાત કરાઈ હોઈ ચાલુ નાણાકીય વર્ષમાં પહેલી વખત પ્રામાણિક કરદાતાઓને આ સ્કીમથી ટેક્સબિલમાં ૧૫ ટકા રિબેટ મળશે.

કુલ ૧૫ ટકા રિબેટ મળશે
મ્યુનિસિપલ સ્ટેન્ડિંગ કમિટીના ચેરમેન હિતેશ બારોટના ચાલુ નાણાકીય વર્ષ ૨૦૨૩-૨૪ના સુધારિત બજેટ હેઠળ ઠરાવ નંબર-૧થી તંત્રનો પ્રોપર્ટી ટેક્સ નિયમિત ભરનારા નાગરિકો માટેની એડ્વાન્સ પ્રોપર્ટી ટેક્સ સ્કીમ હેઠળ ટેક્સની રકમ પર ૧૨ ટકા રિબેટ તેમજ ઓનલાઇન ટેક્સ ભરનારને વધુ એક ટકા રિબેટ મળીને કુલ ૧૩ ટકા રિબેટ અપાશે. ઉપરાંત સળંગ ત્રણ વર્ષથી નિયમિત ટેક્સ ભરનારાને વધુ બે ટકા મળી કુલ ૧૫ ટકા રિબેટ મળશે.

રિબેટ સ્કીમથી રૂ. ૪૦૦ કરોડની આવક થવાની આશા
સત્તાવાળાઓ દ્વારા તા. ૧૮ એપ્રિલથી તા. ૧૭ મે સુધીની આ રકમ હેઠળ વર્ષ ૨૦૨૪-૨૫ અને વર્ષ ૨૦૨૫-૨૬નો એડ્વાન્સ ટેક્સ કરદાતા ભરી શકશે તેવી જાહેરાત કરાઈ છે, પરંતુ આગામી બે નાણાકીય વર્ષમાં જે તે વખતે જે રિબેટની સ્કીમ ચાલુ હશે તેનો જ લાભ કરદાતાને મળશે.દરમિયાન મ્યુનિ. રેવન્યૂ કમિટીના ચેરમેન જૈનિક વકીલ કહે છે, રિબેટ સ્કીમથી રૂ. ૪૦૦ કરોડની આવક થવાની આશા છે. ઉપરાંત કાલે ટેક્સ દરબાર પણ યોજાવા જઈ રહ્યો છે.