- જયપુરમાં સુખદેવસિંહ ગોગામેડીની હત્યા પર મોટું અપડેટ
- લોરેન્સ બિશ્નોઈ ગેંગનો મોટો દાવો
- સિદ્ધૂ મૂસેવાલાની નજીક હોવાથી ગોગામેડીની હત્યા કરી
- બદલા લેવા હત્યા કરી હોવાનું પણ જણાવ્યું
રાષ્ટ્રીય રાજપૂત કરણી સેનાના રાષ્ટ્રીય અધ્યક્ષ સુખદેવ સિંહ ગોગામેડીની હત્યા કેસમાં બુધવારે એક મોટું અપડેટ આવ્યું છે. લોરેન્સ બિશ્નોઈ ગેંગ પહેલા જ આ હત્યાની જવાબદારી લઈ ચૂકી છે. હવે આ લેટેસ્ટ ફેસબુક પોસ્ટમાં દાવો કરવામાં આવ્યો છે કે સુખદેવસિંહ ગોગામેડી સિદ્ધૂ મૂસેવાલાની નજીક હોવાથી અને બદલો લેવા માટે ગોગામેડીની હત્યા કરાઈ હતી. પંજાબ સિંગર સિદ્ધૂ મૂસેવાલાની 2022માં તેમના ગામ માણસામા ગોળીઓ મારીને હત્યા કરી દેવાઈ હતી. મૂસેવાલાની હત્યા પણ લોરેન્સ બિશ્નોઈ ગેંગે કરી હતી.
મહિના પહેલા હતું હત્યાનું એલર્ટ તો કેમ ન મળી સુરક્ષા
પંજાબ પોલીસની એન્ટી ગેંગસ્ટર ટાસ્ક ફોર્સને મહિના પહેલા ગોગામેડીની હત્યાનો પ્લાન હાથ લાગી ગયો હતો અને તેમણે રાજસ્થાન પોલીસને પત્ર લખીને જાણ કરી હતી. આમ છતાં પણ રાજસ્થાન સરકાર અને પોલીસે તેને ગંભીરતાથી ન લીધું અને પરિણામ તેમની ઘાતકી હત્યામાં આવ્યું. પંજાબના સ્પેશિયલ ડીજીએ રાજસ્થાનના ડીજીપીને પણ પત્ર લખીને પ્લાનની જાણ કરી હતી.
કેવી રીતે થયો ગોગામેડીના મર્ડર પ્લાનનો ખુલાસો
હકીકતમાં પંજાબ પોલીસે હથિયાર તસ્કરીના એક કેસમાં રાજસ્થાનથી પ્રોડક્શન વોરંટ પર લોરેન્સ ગેંગના સંપત નેહરાને લાવી હતી અને આ સમયે તેની પૂછપરછમાં જ નહેરાએ સુખદેવ સિંહ ગોગામેડીની હત્યાના પ્લાનનો ખુલાસો કર્યો હતો જે પછી પંજાબ પોલીસે રાજસ્થાન પોલીસને જાણ કરી હતી. રાજસ્થાન પોલીસને એવું પણ જણાવવામાં આવ્યું હતું કે લોરેન્સ બિશ્નોઈ ગેંગના નજીકના સાથી સંપત નેહરાએ જેલની બહાર પોતાના શૂટરોને ટાસ્ક (ગોગામેડીને મારી નાખવાની સોપારી) આપ્યા હતા. સંપત નેહરા હાલ પંજાબની બઠિંડા જેલમાં બંધ છે.
ગોગામેડીની હત્યા બાદ પંજાબની જેલોમાં ગેંગસ્ટરોની સુરક્ષા વધારાઈ
રાજસ્થાનની ઘટના બાદ પંજાબ પોલીસની એન્ટી ગેંગસ્ટર ટાસ્ક ફોર્સ (એજીટીએફ) રેડ એલર્ટ પર છે. પંજાબ પોલીસ લોરેન્સ ગેંગ પર ચાંપતી નજર રાખી રહી છે. એજીટીએફ લોરેન્સ ગેંગના નેટવર્કને તોડવા માટે કેન્દ્રીય એજન્સીઓ સાથે મળીને કામ કરી રહ્યું છે. અત્યાર સુધીમાં 70 ઓપરેટિવ્સની ધરપકડ કરવામાં આવી છે. સુખદેવ સિંહ ગોગામેડીની હત્યા બાદ પંજાબની જેલોમાં બંધ ગેંગસ્ટરોની સુરક્ષા કડક કરી દેવામાં આવી છે.
જયપુરમાં રોહિત-નીતિન નામના યુવાનોએ કરી હતી ગોગામેડીની હત્યા
ગઈ કાલે રાજસ્થાનની રાજધાની જયપુરમાં રોહિત રાઠોડ અને નીતિન ફૌજી નામના બે યુવાનોએ કરણી સેનાના ચીફ સુખદેવસિંહ ગોગામેડીની તેમના ઘરમાં જ ગોળી મારીને હત્યા કરી નાખી હતી. તેમણે લોરેન્સ ગેંગના ઈશારે આ હત્યા કરી હોવાનું કહેવાય છે. હત્યા બાદ બન્ને હત્યારા ફરાર થઈ ગયા છે અને હાલમાં શોધખોળ ચાલી રહી છે. બન્નેના માથા પર 5-5 લાખના ઈનામની પણ જાહેરાત કરવામાં આવી છે.
