યુક્રેન જંગ / 'ઘરોમાં જ રહો', યુક્રેનના સુમીમાં ફસાયેલા વિદ્યાર્થીઓના વીડિયો વાયરલ થયા બાદ કેન્દ્રએ તાત્કાલિક આપી સલાહ

• સુમીમાં ફસાયેલા ભારતીય વિદ્યાર્થીઓના વીડિયો વાયરલ
• તમામ વિદ્યાર્થીઓને કોઇ પણ પ્રકારનું જોખમ ન લેવાની સલાહ
• દૂતાવાસનો સંપર્ક સાધ્યા બાદ વિદ્યાર્થીઓએ લીધો આ નિર્ણય

ભારતીય વિદ્યાર્થીઓના વીડિયો સામે આવ્યા બાદ સરકાર દ્વારા આ સલાહ આપવામાં આવી છે, જેમાં તેઓએ જણાવ્યું કે, તેઓ એકલાં જ રશિયન બોર્ડર તરફ જઈ રહ્યાં છે.

વિદેશ મંત્રાલયે એમ પણ કહ્યું કે, દૂતાવાસના અધિકારીઓ આ વિદ્યાર્થીઓના સતત સંપર્કમાં છે. વિદેશ મંત્રાલયે પણ શનિવારે કહ્યું હતું કે, સરકારે ઘણી ચેનલો દ્વારા રશિયા અને યુક્રેનની સરકારોને વારંવાર યુદ્ધવિરામ લાગુ કરવા વિનંતી કરી છે. જેથી આ ભારતીય વિદ્યાર્થીઓને સલામત માર્ગ મળી શકે. સરકાર દ્વારા એવો પણ દાવો કરવામાં આવ્યો છે કે, મંત્રાલય અને ભારતીય દૂતાવાસ સતત આ વિદ્યાર્થીઓના સંપર્કમાં છે. ગોળીબારીમાં ઘેરાયેલા આ ભારતીય વિદ્યાર્થીઓ બેચેની વચ્ચે સરકારને સતત ભાવનાત્મક અપીલ કરી રહ્યાં છે અને તેમને યુદ્ધક્ષેત્રમાંથી બહાર કાઢવાની વિનંતી કરી રહ્યાં છે.

તમામ વિદ્યાર્થીઓને કોઇ પણ પ્રકારનું જોખમ ન લેવાની સલાહ

વિદેશ મંત્રાલયના પ્રવક્તા અરિંદમ બાગચી (Arindam Bagchi) એ જણાવ્યું, અમે તમામ વિદ્યાર્થીઓને સુરક્ષા સંબંધી નિર્દેશોનું પાલન કરવાની સલાહ આપી છે. તેઓને બંકર તેમજ જ્યાં પણ શરણ મળી રહે તેવાં સ્થાનો પર રહેવાનું કહેવામાં આવ્યું છે. તેમજ કોઇ પણ પ્રકારનું જોખમ ન લેવાની પણ સલાહ આપવામાં આવી છે.

યુક્રેનના ઉત્તર-પૂર્વી શહેર સુમીમાં ફસાયેલા ભારતીય વિદ્યાર્થીઓએ અનેક વીડિયો સોશિયલ મીડિયા પર શેર કર્યા છે, જેમાં તેઓએ જણાવ્યું કે, તેઓ જોખમ લઇને રશિયાની સીમા તરફ આગળ વધી રહ્યાં છે, જે અંદાજે 50 કિમી જ દૂર છે. આ વિદ્યાર્થીઓનું કહેવું છે કે, તેમનો સુમીમાં આ અંતિમ વીડિયો છે. આ વીડિયોમાં ભારતીય વિદ્યાર્થીઓએ એમ પણ કહ્યું કે, જો તેઓને કંઇ થઇ જાય તો તેની માટે ભારત સરકાર અને દૂતાવાસ જવાબદાર રહેશે. જો કે, દૂતાવાસ દ્વારા સંપર્ક સાધ્યા બાદ આ વિદ્યાર્થીઓએ બાદમાં રશિયાની સીમા તરફ કૂચ કરવાનો પોતાનો ઇરાદો ટાળી દીધો છે.