ફાયરિંગ / પૈસાની લેતીદેતીમાં ગોળી ચાલી : આણંદમાં બેંકના સિક્યુરિટી ગાર્ડે ફાયરિંગ કરતા યુવક ઇજાગ્રસ્ત

• આણંદના બારદાનવાલા કોમ્પલેક્સમાં ફાયરિંગની ઘટના
• પૈસાની લેતીદેતી મામલે કરાયું ફાયરિંગ
• બેંક ઓફ બરોડાના સિક્યુરિટી ગાર્ડે કર્યું ફાયરિંગ 

આણંદ શહેરમાં કાયદો અને વ્યવસ્થા અભેરાઈએ ચડયા હોવાના બોલતા પુરાવારૂપ વધુ એક ફાયરિંગની ઘટના સામે આવી છે. શહેરના બારદાનવાલા કોમ્પલેક્સમાં પૈસાની લેતી-દેતી મામલે માથાકૂટ થઇ હતી જેમાં ફાયરિંગ થતાં એક યુવાનને ગંભીર ઇજા પહોંચી હતી જેને તાત્કાલિક સારવાર અર્થે ખસેડવામાં આવ્યો હતો. આ બનવાને પગલે પોલીસ દોડતી થઈ હતી. 

સિક્યુરિટી ગાર્ડે ફાયરિંગ કરતા ફફડાટ 
આણંદના બારદાનવાલા કોમ્પલેક્સમાં ફાયરિંગની ઘટના સામે આવતા ચકચાર મચી જવા પામી હતી. રૂપિયાની લેતીદેતીને લઈને બે શખ્સો વચ્ચે બોલાચાલી થઇ હતી. જે મામલો જોત જોતામાં ઉગ્ર બન્યો હતો. આ  પ્રકરણમાં પિત્તો ગુમાવી બેઠેલા બેંક ઓફ બરોડાના સિક્યુરિટી ગાર્ડે ધડાધડ ફાયરિંગ કર્યું હતું. જેને લઈને નાશભાગ મચી જવા પામી હતી. આ અંગે જાણ થતાં લોકોના ટોળેટોળા એકઠા થઇ ગયા હતા. ત્યારબાદ સ્થાનિક પોલીસને જાણ કરવામાં આવતા પોલીસ કાફલો તાબડતોબ દોડી ગયો હતો. 

આણંદ ટાઉન પોલીસે ઘટનાસ્થળે પહોંચી તપાસ હાથ ધરી 
ઘટનાને પગલે આણંદ ટાઉન પોલીસે ઘટનાસ્થળે પહોંચી તાત્કાલિક તપાસ હાથ ધરી હતી. જે પ્રકરણમાં ઈજાગ્રસ્તને ગંભીર ઇજા થતાં તેને લોહીલુહાણ હાલતમાં સારવાર અર્થે ખસેડવામાં આવ્યો હતો. બીજી તરફ પોલીસની પ્રાથમિક તપાસમાં પૈસાની લેતીદેતીમાં ફાયરિંગ થયું હોવાનું ખૂલ્યું હતું અને આ પ્રકરણમાં બેંક ઓફ બરોડાના સિક્યુરિટી ગાર્ડની સંડોવણી ખૂલતાં પોલીસે આ આ શખ્સની ધરપકડ કરી જાનથી મારી નાખવાની કોશિશ અંગે ગુનો દાખલ કરી કાર્યવાહી આગળ ધપાવી છે.