ગુડ ન્યૂઝ / જનધન બેન્ક ખાતા પર વધ્યો લોકોનો વિશ્વાસ, રેકોર્ડબ્રેક પૈસા જમા થયા, સરકારે કર્યું મોટું એલાન

• જનધન બેન્ક એકાઉન્ટમાં રેકોર્ડબ્રેક પૈસા જમા
• અત્યાર સુધીમાં 1.75 લાખ કરોડ જમા થયા
• કેન્દ્રીય મંત્રી કિશન રેડ્ડીએ આપી માહિતી

લોકો હવે વધારેમાં વધારે જનધન ખાતા ખોલાવીને તેમાં પૈસા જમા કરી રહ્યાં છે તે વાતનો પુરાવો મળ્યો છે. કેન્દ્ર સરકારે જાહેર કર્યું છે કે જનધન ખાતામાં હાલમાં 1.75 લાખ કરોડની રકમ જમા થયેલી છે જે એક રીતે રેકોર્ડબ્રેક છે. 

સરકારે ડીબીટી હેઠળ 25 લાખ કરોડ ટ્રાન્સફર કર્યાં 
કેન્દ્રીય પર્યટન પ્રધાન જી કિશન રેડ્ડીએ જણાવ્યું હતું કે પ્રધાનમંત્રી જન-ધન યોજના હેઠળ ખોલવામાં આવેલા બેંક ખાતાઓ દ્વારા અત્યાર સુધીમાં લાભાર્થીઓને 25 લાખ કરોડ રૂપિયા વહેંચવામાં આવ્યા છે. એટલે કે દેશમાં આ યોજનાના લાભાર્થીઓની સંખ્યા વધી રહી છે. કેન્દ્રીય મંત્રીએ કહ્યું કે આ 50 કરોડ જનધન ખાતાઓમાંથી અડધાં તો મહિલાઓનાં જ છે.

જનધન બેંક ખાતાઓમાં 1.75 લાખ કરોડ રૂપિયા જમા 
કેન્દ્રીય મંત્રી રેડ્ડીએ કહ્યું કે હાલ ગરીબોના જનધન બેંક ખાતાઓમાં 1.75 લાખ કરોડ રૂપિયા જમા છે. "જનધન ખાતા ખોલતી વખતે, લોકો પ્રશ્નો ઉભા કરી રહ્યા હતા કે શું આપણા દેશમાં તેની જરૂર છે? આજે, અમે કલ્યાણકારી યોજનાઓના મથાળા હેઠળ જન ધન ખાતાઓ દ્વારા ગરીબોને 25 લાખ કરોડ રૂપિયા વહેંચ્યા છે. આ એક સિદ્ધિ છે.

જનધન ખાતા પર વધ્યો લોકોનો વિશ્વાસ

જે પ્રકારે જનધન ખાતામાં લોકો પૈસા જમા કરાવી રહ્યાં છે તે જોતા લાગી રહ્યું છે લોકોનો તેમાં વિશ્વાસ વધી રહ્યો છે. પ્રધાનમંત્રી મોદી પણ કહી ચૂક્યા છે કે ડીબીટી યોજના હેઠળ અત્યાર સુધી 25 લાખ કરોડ જમા કરવામાં આવ્યાં છે.