એક્શન / 2406 હોટલ-સ્પામાં દરોડા, 225 FIR, 200 આરોપીની ધરપકડ, છેલ્લા 4 દિવસમાં ગુજરાત પોલીસે તવાઇ બોલાવી

• 4 દિવસમાં હોટલ અને સ્પામાં પોલીસના દરોડા
• 2,406 હોટલ અને સ્પામાં પાડ્યા દરોડા 
• 225 FIR અને 200 આરોપીની ધરપકડ કરાઈ 
• 32 જેટલા હોટલ અને સ્પાના લાયસન્સ રદ

Gujarat Police Action Mode: રાજ્યમાં હોટલ અને સ્પાની આડમાં ચાલતી દેહ વ્યાપારની પ્રવૃત્તિઓને સદંતર બંધ કરાવવા માટે ગૃહ રાજ્યમંત્રી હર્ષ સંઘવીએ વીડિયો કોન્ફરન્સ યોજીને આપેલી સૂચના બાદ ગુજરાત પોલીસ દ્વારા રાજ્યભરના સ્પા સેન્ટર, કોમર્શિયલ બિલ્ડીંગ તથા હોટલ પર દરોડા પડાવામાં આવી રહ્યા છે. આ સ્પેશિયલ ડ્રાઇવ અંતર્ગત ગુજરાત પોલીસની અલગ-અલગ ટીમો દ્વારા છેલ્લા 4 દિવસમાં ગુજરાતની કુલ 2406 હોટલ-સ્પામાં દરોડા પાડવામાં આવ્યા છે. 

પોલીસે 200 આરોપીઓને દબચ્યા
પોલીસે હાથ ધરેલી કડક કાર્યવાહીમાં રાજ્યભરમાંથી 200 આરોપીઓને ઝડપી 225 FIR નોંધવામાં આવી છે. એટલું જ નહીં પોલીસ દ્વારા 32 જેટલા સ્પા સેન્ટરો તથા હોટલોના લાયસન્સ પણ રદ કરવા આવ્યા છે.

હર્ષ સંઘવીએ પોલીસઅધિકારીઓને આપી હતી સૂચના
તા.17 ઓક્ટોબરના રોજ ગૃહ રાજ્યમંત્રી હર્ષ સંઘવી દ્વારા તમામ પોલીસ અધિક્ષકો/રેન્જ અધિકારીઓ/પોલીસ કમિશનરો/સંયુક્ત પોલીસ કમિશનરો તથા નાયબ પોલીસ કમિશનરો સાથે વીડીયો કોન્ફરન્સ યોજીને ગેરકાયદેસર સ્પા અને દેહ વ્યાપારની પ્રવૃત્તિઓ પર દરોડા પાડવા કડક સૂચના આપવામાં આવી હતી. 

પોલીસ વિભાગ એક્શન મોડમાં

ગૃહ રાજ્યમંત્રી હર્ષ સંઘવીની સૂચના બાદ પોલીસ વિભાગ એક્શન મોડમાં આવી ગયું હતું. સમગ્ર રાજ્યમાં તા.18 ઓક્ટોબરથી આવા શંકાસ્પદ સેન્ટરો પર દરોડા પાડવાની કામગીરી ચાલુ કરવામાં આવી છે. હજુ પણ આ કાર્યવાહી ચાલુ રહેશે અને રાજ્યમાં આ પ્રકારની પ્રવૃત્તિઓને સદંતર બંધ કરાવવામાં આવશે.