બજેટ / ચાલુ વર્ષના બજેટને ગત વર્ષના મિની બજેટના ભાગ તરીકે જોવું જોઈએ : પીએમ મોદી

• મોદીએ કહ્યું કે આ દાયકો ભારતના ઉજ્જવળ ભવિષ્ય માટે મહત્વનો
• લોકોની આશા-અપેક્ષા પૂરી પાડવા સંસદ અને સાંસદો બધુ કરી છૂટશે: પીએમ મોદી 
• સંસદનું બજેટ સત્ર 29 જાન્યુઆરીએ શરુ થઈને 8 એપ્રિલ સુધી ચાલશે​

સંસદમાં બજેટ સેશનના પ્રારંભ પહેલા મીડિયા સાથેની વાતચીતમાં મોદીએ જણાવ્યું કે આ દાયકાના પહેલા સત્રનો શુક્રવારે પ્રારંભ થયો છે, આ સત્રમાં વિવિધ ચર્ચાવિચારણા થવી જોઈએ તથા તેની પર વિચારો વ્યક્ત કરવા જોઈએ. 

મોદીએ કહ્યું કે મને આશા છે કે લોકોની આશા-અપેક્ષા પૂર્ણ કરવા માટે સાંસદો સંસદની કાર્યવાહીમાં બને તેટલું વધાર યોગદાન આપશે તથા તેઓ સંસદની કાર્યવાહીથી દૂર નહીં રહે. ભારતીય ઈતિહાસમાં કદાચ પહેલી વાર નાણાપ્રધાને 2020માં વિવિધ પેકેજના સ્વરુપમાં ચારથી પાંચ મિની બજેટ આપવા પડ્યાં છે. તેથી મને વિશ્વાસ છે કે 2021-22 ના નાણાકીય વર્ષનું બજેટ મિનિ બજેટનો એક હિસ્સો ગણાશે. 

વડાપ્રધાને એવી પણ આશા વ્યક્ત કરી કે સરકાર લોકોની આશા-અપેક્ષા પૂર્ણ કરવા માટે તમામ પ્રયાસો કરશે. 

સંસદનું બજેટ સત્ર 29 જાન્યુઆરીએ શરુ થઈને 8 એપ્રિલ સુધી ચાલશે, 15 ફેબ્રુઆરીથી 7 માર્ચ સુધી રિશેસ રહેશે. તાજેતરમાં ત્રણ કૃષિ કાયદાની વિરૃદ્ધ ખેડૂત આંદોલન ચાલી રહ્યું હોવાથી સંસદનું આ શિયાળુ સત્ર ભારે તોફાન  બની રહે તેવા એંધાણ છે.  

મોદીએ કહ્યું કે આ દાયકો ભારતના ઉજ્જવળ ભવિષ્ય માટે મહત્વનો છે. આઝાદીના લડવૈયાઓએ જોયેલા સપના સાકાર કરવાની દેશ સમક્ષ એક સુવર્ણ તક આવી છે. વડાપ્રધાને આગ્રહપૂર્વક કહ્યું કે આ સત્રનો પૂરો ઉપયોગ કરી લેવો પડશે અને મહત્વના મુદ્દે તંદુરસ્ત ચર્ચાવિચારણા થવી જોઈએ. લોકોની આશાઓ પૂરી કરવા માટે સંસદ પાછીપાની નહીં કરે અને તમામ સાંસદો પણ તેમનાથી થાય તેટલું યોગદાન આપશે. ઉલ્લેખનીય છે કે વડાપ્રધાનના ભાષણની સાથે જ સંસદના બજેટ સત્રનો પ્રારંભ થયો છે. 29 જાન્યુઆરીએ ઈકોનોમીક સરવે રજૂ થયો હતો અને 1 ફેબ્રુઆરીએ સામાન્ય બજેટ રજૂ થશે.