કાર્યવાહી / અમદાવાદમાં મંદિર બહાર MD ડ્રગ્સનું છૂટક વેચાણ કરતો પેડલર ઝડપાયો, પૂછપરછમાં થયો મોટો ખુલાસો

• અમદાવાદમાંથી 5 લાખનું એમડી ડ્રગ્સ ઝડપાયું
• મંદિર બહાર એમડી ડ્રગ્સ વેંચતો આરોપી ઝબ્બે
•  51 ગ્રામ એમડી ડ્રગ્સ કબ્જે કરતી પોલીસ 

વધુ એક વાર અમદાવાદમાંથી 5 લાખનું એમડી ડ્રગ્સ ઝડપાતા ચકચાર જાગી છે.  પોલીસે આરોપીને મંદિર બહાર એમડી ડ્રગ્સ વેંચતા દબોચી લઇ કાર્યવાહી હાથ ધરી છે. જેની પૂછપરછમાં આરોપી અલગ અલગ વિસ્તારમાં લોકોને છૂટક ડ્રગ્સ આપવા આવ્યો હોવાનું સામે આવ્યું છે. 

આરોપી ઊંચી કિંમતે ડ્રગ્સ વેચી તગડી કમાણી રોળતો
ડ્રગ્સકાંડમાં સંડોવાયેલ આરોપી મોહમદ આરીફ ઉર્ફે કાળિયો મૂળ ગોમતીપુરનો રહેવાસી છે.  જે આરોપીને એસઓજી પોલીસે અમરાઈ વાડી વિસ્તારમાંથી ડ્રગ્સના જથ્થા સાથે ઝડપી લીધો હતો. જેની તપાસમાં આરોપી પાસેથી પોલીસને 5.12 લાખનું 51 ગ્રામ એમડી ડ્રગ્સ કબ્જે કર્યું હતું. આરોપી પૂર્વ વિસ્તારમાં છૂટક પ્રમાણમાં આ ડ્રગ્સ આપતો હતો.જે ભાવે તે ડ્રગ્સ ખરીદતો તેનાથી ઊંચી કિંમતે ડ્રગ્સ વેચતો અને તગડી કમાણી રોળતો હતો. ત્યારબાદ નફાના રૂપિયામાંથી ડ્રગ્સ ખરીદતો હોવાનું પણ સામે આવ્યું છે.  એટલું જ નહિ આરોપી 5 વર્ષથી ડ્રગ્સના નાશાના રવાડે પણ ચડી ગયો હોવાનું ખૂલ્યું હતું.

અગાઉ આરોપી આંગડિયા લૂંટ સહીત અનેક પોલીસ ચોપડે ચડયો છે 
વધુમાં પૂછપરછ દરમિયાન આરોપીને ગોમતીપુરના અખ્તર ખાન નવાઝખાન પઠાણ નામના વ્યક્તિએ ડ્રગ્સનો જથ્થો આપ્યો  હોવાનું પણ જાણવા મળી રહ્યું છે. જે હાલ ફરાર છે. તેણે અગાઉ કેટલા લોકોને કેટલા પ્રમાણમાં આ ડ્રગ્સ જથ્થો આપ્યો છે એ દિશામાં પોલીસ તપાસ કરી રહી છે. સાથે જ આરોપી વર્ષ 2004 થી આંગડિયા લૂંટ, આર્મ્સ એક્ટ અને પ્રોહીબિશનના અસંખ્ય ગુનામાં પણ પોલીસ ચોપડે ચડયો હોવાનું  ખૂલ્યું છે. ઉપરાંત સુત્રોનું માનીએ તો હાલના ડ્રગ્સ કેરિયરોનું આ મોટું ષડયંત્ર પણ સામે આવી રહ્યું છે. આરોપીઓ વિધર્મી લોકોને ડ્રગ્સના રવાડે ચડાવવાનું પણ કામ કરી રહ્યા છે. જેથી તપાસ બાદ વધુ ખુલાસા થશે.