ગાંધીનગર / મંત્રી બાવળિયા અંગે નિવેદન બાદ પરસોત્તમ સોલંકીએ કહ્યું- કોળી સમાજની અવગણના કરાશે તો....

• ગાંધીનગરમાં કોળી સમાજના આગેવાનોની બેઠક
• કોળી સમાજની અવગણના કરાશે તો જવાબ સમાજ આપશેઃ પરસોત્તમ સોલંકી
• કુંવરજી બાવળિયા અંગે પણ પરસોત્તમ સોલંકીએ આપ્યું નિવેદન 

ગાંધીનગર કોળી સમાજના આગેવાનોની બેઠક મળી હતી. સેકટર 4 ખાતે કોળી સમાજવાડીમાં યોજાયેલી બેઠકમાં મંત્રી પરસોત્તમ સોલંકી અને હીરા સોલંકી હાજર રહ્યા હતા. આ બેઠકમાં કોળી ટ્રસ્ટી મંડળમાં નવી નિમણુંક બાબતે ચર્ચા થઈ હતી. આ ઉપરાંત કોળી સમાજના વિવિધ પ્રશ્નો મુદ્દે પણ બેઠકમાં ચર્ચા કરાઈ હતી. 

આ સમાજની મીટિંગ છે, કોઇ રણનીતિ નથીઃ હીરા સોલંકી

બેઠક મુદે પૂર્વ સંસદીય સચિવ હીરા સોલંકીએ કહ્યું કે આ સમાજની મીટિંગ છે કોઇ રાજકીય નથી. સંગઠનમાં 5 ટ્રસ્ટીના અવસાન થતા નામ કમી કરાયા છે. નવા ટ્રસ્ટીઓના ઉમેરા માટેનો પણ ઠરાવ કરાયો છે. આખું સંગઠન માળખું બદલવાનો પણ ઠરાવ કરાયો છે. અધૂરા વિકાસના કામોના વેગ માટેનો નિર્ણય કરાયો છે.

મારી રાજકીય બાદબાકી કરવી કોઇના વશમાં નથીઃ પરસોત્તમ સોલંકી

તો આ બેઠકમાં પરસોત્તમ સોલંકીએ મોટું નિવેદન આપ્યું હતું. તેમણે કહ્યું હતું કે, કોળી સમાજનું ઘણું મહત્વ છે, કોઇ અવગણના ન કરી શકે. મારી રાજકીય બાદબાકી કરવી કોઇના વશમાં નથી. મારી તબિયત સારી નથી, મારી બાદબાકી કોઇ ન કરી શકે. કોળી સમાજની અવગણના કરાશે તો જવાબ સમાજ આપશે.

મંત્રીમંડળમાંથી પડતા મૂકવા હોત તો ક્યારનાં ય પડતા મૂક્યા હોતઃ પરસોત્તમ સોલંકી

સોલંકીએ કહ્યું હતું કે, આગામી સમયમાં મંત્રીમંડળમાંથી પરસોત્તમ સોલંકીને પડતા મૂકી શકાય છે તેવી ચર્ચાઓ અંગે પરસોત્તમ સોલંકીએ સ્પષ્ટતા કરી હતી કે, આવી કોઈ વાત નથી. જો મારી નાંદુરસ્ત તબિયતને કારણે મંત્રીમંડળમાંથી પડતા મૂકવા હોત તો ક્યારનાં ય પડતા મૂક્યા હોત. પરંતુ મેં પાર્ટી માટે ઘણું કર્યું છે અને મને વિશ્વાસ છે કે મંત્રીમંડળમાંથી પડતાં મૂકવાની વાત નથી. જો કોઇ વાત હશે તો કોળી સમાજે વિચાર કરવાનો છે. 

કુંવરજી બાવળિયા અંગે પરસોત્તમ સોલંકીએ આપ્યું નિવેદન 

વધુમાં તેમણે કહ્યું હતું કે, હું હજી પણ સરકારમાં છું જ, કુંવરજી બાવળિયા સમાજ માટે કામ કરતા હશે તેવું મને વિશ્વાસ છે, પરંતુ શું કામ કર્યું એ મને નથી ખબર. તેમનાથી મારા કદને કોઈ ફરક નહીં પડે.