સુવિધા / હવે AC હેલમેટ પહેરીને સેવા બજાવશે ગુજરાતનાં ટ્રાફિક પોલીસના જવાનો, ફિટ કરવામાં આવ્યો છે બેટરીવાળો પંખો

• અમદાવાદમાં ટ્રાફિક જવાનોને અપાયા AC હેલમેટ
• ગરમીથી રક્ષણ આપે તેવા 3 AC હેલમેટ અપાયા 
• બેટરી સંચાલિત AC હેલમેટમાં ફિટ કરાયો છે પંખો

અમદાવાદમાં શિયાળો, ઉનાળો કે ચોમાસા ખડેપગે ફરજ બજાવતા ટ્રાફિક પોલીસકર્મીઓ માટે રાહતના સમાચાર સામે આવ્યા છે. ગૃહ વિભાગ દ્વારા અમદાવાદ ટ્રાફિક પોલીસ માટે પ્રાયોગિક ધોરણે એસી હેલમેટ લાવવામાં આવ્યા છે. કાળઝાળ ગરમીમાંથી ટ્રાફિક પોલીસકર્મીઓને થોડીઘણી રાહત મળે તે હેતુથી અત્યારે પ્રાયોગિક ધોરણે હેલમેટ લાવવામાં આવ્યા છે. 

ગરમીથી રક્ષણ આપે તેવા 3 AC હેલમેટ અપાયા 
અમદાવાદના ત્રણ ટ્રાફિક પોઈન્ટ નાના ચિલોડા, પિરાણા ચાર રસ્તા અને ઠક્કરબાપા નગર ચાર રસ્તા પર ફરજ બજાવત એક મહિલા કર્મચારી અને બે પુરુષ કર્મચારીઓને અત્યારે આ હેલમેટ અપાયા છે. આ ત્રણેય કર્મચારીઓના ફીડબેક બાદ ઉચ્ચ સ્તરે રિપોર્ટ રજૂ કરવામાં આવશે, તેના અનુભવના આધારે વધુ એસી હેલમેટ લાવવાના કે નહીં તે નક્કી કરાશે. 

ફીડબેક બાદ રાજ્યભરમાં પ્રોજેક્ટ લાગું કરવા થશે વિચારણા
એટલે કે આ ત્રણેય કર્મચારીઓ પાંચ દિવસ સુધી આ હેલમેટ પહેરશે અને ત્યાર બાદ તેઓ તેમનો અનુભવ જાણાવશે. તેમના અનુભવના આધારે એક રિપોર્ટ તૈયાર કરવામાં આવશે. આ રિપોર્ટના આધારે ગૃહવિભાગ અને રાજ્ય સરકાર આ હેલમેટને લઈને યોગ્ય નિર્ણય લેશે. અત્યાર સુધી ટ્રાફિક કર્મચારીઓને શિયાળામાં સ્વેટર-જેકેટ, ચોમાસામાં રેઈનકોટ અપાતા હતા, ત્યારે હવે ઉનાળામાં એસી હેલમેટ આપવાનું પ્લાનિંગ ચાલી રહ્યું છે. 

જાણો હેલમેટની વિશેષતા
- આ હેલમેટની ડિઝાઈન પોલીસના સામાન્ય હેલમેટ જેવી જ છે.
- હેલમેટનો પંખો એસીની માફક હવા ફેંકે છે, જેથી તેને એસી હેલમેટ કહેવાય છે. 
- હેલમેટમાં અંદર એક નાનકડી મોટર થકી એક્ઝોસ્ટ ફેન આપવામાં આવ્યો છે. જે અંદરની ગરમ હવાને બહાર ફેંકે છે.
- આ હેલમેટને બેટરી વડે ચાલે છે. એકવાર ચાર્જ કર્યા બાદ કલાકો સુધી વાપરી શકાય છે. 
- આ બેટરીનો વાયર હેલમેટ સાથે જોડેલો હોય છે અને બેટરી એક કવરમાં હોય છે.
- બેટરીને બેલ્ટ વડે સેટ કરવામાં આવી છે. જે ટ્રાફિક કર્મચારી પોતાની કમર પર આરામથી બાંધી શકે છે.