- આગામી 5 દિવસ વરસાદની આગાહી
- ચોમાસાની ગતિવિધિઓ સક્રિય થઈ
- આજ સવારથી ગુજરાતના વાતાવરણમાં પલટો
દેશના અનેક રાજ્યમાં કાળઝાળ ગરમી વચ્ચે હવે હવામાને મિજાજ બદલ્યો છે. દેશભરમાં લોકોને આજથી હીટવેવથી રાહત મળવાની શરૂ થઈ જશે કારણ કે દિલ્હીથી લઈને ઉત્તર પ્રદેશ સુધી હવે વરસાદ દસ્તક દે તેવી શક્યતાઓ વધી રહી છે. મોટા ભાગના રાજ્યમાં ચોમાસાનું આગમન થઈ ગયું છે. 26 રાજ્યોમાં આજે વરસાદ થવાની સંભાવના છ તો કેટલાક રાજ્યમાં હજુ પણ વરસાદની રાહ જોવાઈ રહી છે. આ વચ્ચે ગુજરાતમાં આગામી 5 દિવસ વરસાદની આગાહી કરવામાં આવી છે.
મોટાભાગના વિસ્તારોમાં વાદળછાયુ વાતાવરણ
હવામાન વિભાગની આગાહીને પગલે આજ વહેલી સવારથી રાજ્યના મોટાભાગના વિસ્તારોમાં વાદળછાયુ વાતાવરણ જોવા મળી રહ્યું છે, તો કેટલાક વિસ્તારોમાં ધીમી ધારે વરસાદ પણ વરસી રહ્યો છે. આ મામલે વિગતવાર વાત કરીએ તો આજ વહેલી સવારથી વડોદરામાં વરસાદ વરસી રહ્યો છે. વહેલી સવારે 5 વાગ્યાથી વરસાદની શરૂઆત થઈ હતી. ગાજવીજ સાથે વરસાદ ખાબકતા શહેરના રસ્તાઓ પર પાણી ફરી વળ્યા હતા. હજુ પણ અહીં ધીમી ધારે વરસાદ વરસી રહ્યો છે. વરસાદથી ખેડૂતો ખુશખુશાલ જોવા મળી રહ્યા છે.
ખેડામાં વરસાદથી વાતાવરણમાં ઠંડક પ્રસરી
ખેડા જિલ્લામાં પણ ભારે પવન સાથે વરસાદ વરસી રહ્યો છે. ખેડાના ડાકોર, સેવાલીયા અને ઠાસરામાં વરસાદ વરસી રહ્યો છે. વરસાદથી વાવણીની રાહ જોતા ખેડૂતોમાં ખુશીનો માહોલ જોવા મળી રહ્યો છે. તો ઉકળાટ બાદ વરસાદ વરસતા વાતાવરણમાં ઠંડક પ્રસરી છે.
.jpg)
પંચમહાલ જિલ્લામાં ધોધમાર વરસાદ
પંચમહાલમાં મોડી રાતથી વરસાદ વરસી રહ્યો છે. ભારે ઉકળાટ બાદ વરસાદનું આગમન થતાં વાતાવરણ ઠંડુ થઈ ગયું છે. જિલ્લામાં વીજળીના કડાકા ભડાકા સાથે વરસાદ વરસી રહ્યો છે. જાંબુઘોડા, ઘોઘંબા, હાલોલ, કાલોલ, ગોધરા, શહેરા, મોરવા પંથકમાં વરસાદ વરસી રહ્યો છે. જાંબુઘોડા તાલુકામાં 2.5 ઈંચ અને ઘોઘંબામાં પોણો ઈંચ વરસાદ નોંધાયો છે. ભારે વરસાદને લઈ ખેતરોમાં પાણી ભરાયા છે.
28થી 30 જૂન દરમિયાન અતિભારે વરસાદની આગાહી
આપને જણાવી દઈએ કે, હવામાન વિભાગ દ્વારા ગુજરાતમાં આગામી 5 દિવસ વરસાદની આગાહી કરવામાં આવી છે. હવામાન વિભાગ દ્વારા આગામી 27 જૂનને વલસાડમાં ભારે વરસાદની આગાહી છે. હવામાન વિભાગના જણાવ્યા અનુસાર, ગુજરાતમાં ચોમાસાની ગતિવિધિઓ સક્રિય થઈ છે. 28થી 30 જૂન દરમિયાન ભારેથી અતિભારે વરસાદની આગાહી છે. જૂનના અંતમાં ધમાકેદાર વરસાદ ખાબકશે. અમદાવાદ મહેસાણા ભારેથી અતિભારે વરસાદની આગાહી કરવામાં આવી છે.
