રાજરમત / પેટાચૂંટણી બાદ ગુજરાત કેબીનેટના વિસ્તરણમાં આ આયાતી ઉમેદવારોની મંત્રીમંડળમાં થશે એન્ટ્રી?

• 5 મંત્રીઓને પડતા મુકી નવા 7 ચહેરાઓનો કરાઇ શકે છે સમાવેશ
• પેટા ચૂંટણીના પરિણામ બાદ લેવાઇ શકે છે નિર્ણય
• છેલ્લા બે વર્ષથી રૂપાણી સરકારમાં જોવાઇ રહી છે વિસ્તરણની રાહ

ગાંધીનગરના સૂત્રોનું માનીએ તો રૂપાણી કેબિનેટમાંથી 5 મંત્રીઓને પડતા મુકી નવા 7 ચહેરાઓનો સમાવેશ કરાઇ શકે છે. પેટા ચૂંટણીના પરિણામ બાદ આ અંગે નિર્ણય લેવાશે.  છેલ્લા બે વર્ષથી રૂપાણી સરકારમાં  વિસ્તરણની રાહ જોવાઇ રહી છે. એટલું જ નહીં પરંતુ બોર્ડ-નિગમમાં રાજકીય ચેરમેન તેમજ ડિરેક્ટરોની પણ નિયુક્તિ થઇ શકે છે. કેબિનેટ કક્ષામાં 9 અને રાજ્યકક્ષામાં 11 મંત્રીઓ છે. નિયમ પ્રમાણે વધુમાં વધુ 27 સભ્યોને કેબિનેટમાં રાખી શકાય છે. વધુ પાંચ સભ્યોનો સમાવેશ થઇ શકે છે. 

હાલમાં શું છે સ્થિતિ?

હાલ મુખ્યમંત્રી વિજય રૂપાણી અને નાયબ મુખ્યમંત્રી નીતિન પટેલ ઉપરાંત કેબિનેટ કક્ષામાં 9 અને રાજ્યકક્ષામાં 11 મંત્રીઓ છે. આમ કેબિનેટનું કુલ કદ 22 સભ્યોનું છે. નિયમ પ્રમાણે ગુજરાતમાં મુખ્યમંત્રી વધુમાં વધુ 27 સભ્યોની કેબિનેટ રાખી શકે છે. એટલે કે હાલની કેબિનેટમાં અત્યારે વધુ પાંચ સભ્યોનો સમાવેશ થઇ શકે છે. પરંતુ કેટલાક વિવાદાસ્પદ મંત્રીઓને પડતા મૂકવામાં આવી શકે તેમ છે તેથી જો ચાર સભ્યોને પડતા મૂકવામાં આવે તો ગુજરાતમાં રૂપાણી કેબિનેટમાં વધુ નવ ચહેરા આવી શકે છે.

કોના પત્તા કપાવાની છે ચર્ચા

રાજકિય સૂત્રોનું માનીએ તો મત્યોદ્યોગ મંત્રી પુરૂષોત્તમ સોલંકી, અન્ન અને નાગરિક પુરવઠાના રાજ્યકક્ષાના મંત્રી ધર્મેન્દ્રસિંહ જાડેજા, સામાજીક ન્યાય મંત્રી ઇશ્વર પરમાર, સામાજીક શૈક્ષણિક પછાત વિભાગના મંત્રી વાસણ આહિર તેમજ અન્ય એક બે સભ્યોને ડ્રોપ કરવામાં આવે તેવી સંભાવના છે. જો કે આ ખાલી ઉડી રહેલી વાતો અને સંભાવનાઓ માત્ર જ છે. 

આયાતી ઉમેદવારોની મંત્રીમંડળમાં થશે એન્ટ્રી?

કોંગ્રેસમાંથી રાજીનામું આપીને ભાજપમાં આવેલા અને હાલ પેટાચૂંટણી લડતા આઠ પૈકી ત્રણ થી ચાર સભ્યોનો કેબિનેટ પ્રવેશ સંભવ છે જેમાં બ્રિજેશ મેરજા, પ્રદ્યુમનસિંહ જાડેજા, આત્મારામ પરમાર અને કિરીટસિંહ રાણાના નામો ચર્ચાઇ રહ્યાં છે. આ સાથે મુખ્યમંત્રી વિજય રૂપાણી બોર્ડ-નિગમમાં રાજકીય ચેરમેન તેમજ ડિરેક્ટરોની નિયુક્તિ કરી શકે છે