છેતરપિંડી / સ્કીમ થઈ ગઈ: 'ગઠિયાએ કહ્યું બેન્કમાંથી વાત કરું છું..' રેલવેકર્મીને ક્રેડિટકાર્ડ બંધ કરાવવા જતાં રૂ. 1.18 લાખનો ચૂનો લાગ્યો

• વટવામાં રહેતા રેલવેના એક કર્મચારી સાથે છેતરપિંડી
• ક્રેડિટકાર્ડ બંધ કરાવવા જતાં ગઠિયાએ ૧.૧૮ લાખ રૂપિયા સેરવી લીધા
• વટવા પોલીસ સ્ટેશનમાં ફરિયાદ નોંધાવી

અમદવાદના છેતરપીંડીનો વધુ એક કિસ્સો સામેં આવ્યો છે. જેમાં વટવાની રેલવે કોલોની ખાતે રહેતા દિનેશભાઇ બારિયાએ ઠગાઈની ફરિયાદ કરી છે. દિનેશભાઇ વટવા રેલવેના મિકેનિકલ વિભાગમાં નોકરી કરે છે. દિનેશભાઇને ક્રેડિટકાર્ડની જરૂર ન હતી તેમ છતાં તેમને સ્કીમ છે તેમ કહીને ક્રેડિટકાર્ડ આપ્યું હતું.

થોડા દિવસ પહેલાં અજાણ્યા નંબર પરથી દિનેશભાઇ પર ફોન આવ્યો હતો. ફોન કરનારે દિનેશભાઇને કહ્યું હતું કે હું એક્સિસ બેન્કમાંથી બોલું છું, તમારે ક્રેડિટકાર્ડ ચાલુ રાખવાનું છે કે બંધ કરવાનું છે? દિનેશભાઇએ ગઠિયાને ક્રેડિટકાર્ડ બંધ કરવાનું કહ્યું હતું. ગઠિયાના કહ્યા મુજબ દિનેશભાઇએ તમામ વિગત આપી દીધી હતી. થોડી વારમાં દિનેશભાઇએ ગઠિયાને એક ઓટીપી આપી દીધો હતો, જેથી ગઠિયાએ થોડી વારમાં તમારું ક્રેડિટકાર્ડ બંધ થઇ જશે તેમ કહીને ફોન મૂકી દીધો હતો.

વટવા પોલીસ સ્ટેશનમાં ફરિયાદ નોંધાઈ 
ત્યાર બાદ ગઈ કાલે સેલરી એકાઉન્ટમાંથી રૂપિયા કપાયાનો મેસેજ આવતાં તેઓ ચોંકી ગયા હતા. દિનેશભાઈને ગઠિયાએ પોતાની જાળમાં ફસાવીને તેમની પાસેથી ટુકડે-ટુકડે ૧.૧૮ લાખ રૂપિયા પડાવી લીધા હતા. દિનેશભાઇએ આ અંગે તરત પોલીસ સ્ટેશન પહોંચીને સમગ્ર ઘટનાની જાણ પોલીસને કરી હતી. ત્યાર બાદ તેમણે ગઠિયા વિરુદ્ધ વટવા પોલીસ સ્ટેશનમાં ફરિયાદ નોંધાવી હતી. પોલીસે ફરિયાદના આધારે ગુનો નોંધી વધુ તપાસ હાથ ધરી છે.

ટ્રાન્ઝેક્શનમાં છેતરપિંડીનું પ્રમાણ પણ વધી ગયું
ઉલ્લેખનીય છે કે મોટા ભાગના લોકો પેમેન્ટ કરવા માટે ડેબિટ અને ક્રેડિટકાર્ડનો ઉપયોગ કરે છે, સીધી રીતે નહીં તો ક્યારેક UPI પેમેન્ટ અથવા ડાયરેક્ટ પેમેન્ટ માટે આપણે કાર્ડનો ઉપયોગ કરતાં હોઈએ છીએ. જેમ જેમ આ કાર્ડ યુઝ કરનારાની સંખ્યા વધી છે તેમ તેમ આ ટ્રાન્ઝેક્શનમાં છેતરપિંડીનું પ્રમાણ પણ વધી ગયું છે. ક્રેડિટકાર્ડ એસોસિયેશન અથવા કાર્ડ ઈશ્યૂ કરનાર બેન્કે કાર્ડને જે નંબર આપ્યો હોય તે નંબર ક્રેડિટકાર્ડથી પેમેન્ટ કરવા માટે ગ્રાહકે મર્ચન્ટને આપવો પડે છે.

ભૂલથી પણ આ નંબર  ન કરવો શેર 
જોકે આ નંબર અન્ય કોઈ સાથે શેર કરવો જોઈએ નહીં. કાર્ડ પર આંકડા પ્રિન્ટ થયેલા હોય છે. CVV તેનો અર્થ કાર્ડ વેરિફિકેશન વેલ્યૂ એવો થાય છે. કાર્ડ પર પ્રિન્ટ કરાયેલો આ ત્રણ આંકડાનો નંબર હોય છે, જે મોટા ભાગનાં ઓનલાઈન ટ્રાન્ઝેક્શન માટે ફરજિયાત આપવાનો હોય છે. આ વિગત પણ કોન્ફિડેન્શિયલ હોય છે અને તે ક્યારેય કોઈનીય સાથે શેર ન કરવો જોઈએ તેમજ કોઈ પણ ઓટીપી નંબર પણ શેર કરવો જોઈએ નહીં