ખરાખરીનો જંગ / મોટી ઉથલપાથલ નક્કી ? આવતીકાલે ગુજરાતની આ નગરપાલિકામાં થશે ફ્લોર ટેસ્ટ, ભાજપે જાહેર કર્યું વ્હીપ

• બોરસદ નગરપાલિકામાં અવિશ્વાસની દરખાસ્ત મામલો
• આવતીકાલે બોરસદ નગરપાલિકામાં ખરાખરીનો જંગ
• ભાજપ સંગઠને આકરા પાણીએ વ્હીપ જાહેર કર્યુ

આણંદ જિલ્લાના બોરસદ નગરપાલિકામાં ભાજપ પાર્ટીએ બહુમતીના જોરે સત્તાની કમાન સંભાળી હતી. આ દરમિયાન પાર્ટી સંગઠન દ્વારા પાલિકા પ્રમુખ તરીકે આરતી પટેલની પસંદગી કરવામાં આવી હતી. ત્યારથી જ છાના ખૂણે વિવાદ ચાલતો હતો.  જેનો લાભ લઇ વિપક્ષના 16 સભ્યોએ પાલિકા પ્રમુખ આરતીબેન પટેલની કામગીરીથી નારાજગી વ્યકત કરી પ્રથમ ભાજપ પ્રમુખ આરતી પટેલ અને ત્યારબાદ ઉપપ્રમુખ રણજિત પરમાર સામે અવિશ્વાસની દરખાસ્ત કરી હતી. જે મામલે આવતીકાલે ખરાખરીનો જંગ ખેલાશે. ભાજપ સંગઠને આકરા પાણીએ થઇ બાગી સભ્યોને કડક શબ્દોમાં વ્હીપ આપી શકે છે.  જેમાં ભાજપ વિરુદ્ધ મતદાન કરનાર સભ્યો સસ્પેન્ડ થઇ શકે છે.  આગામી વિધાનસભાની ચૂંટણીને ધ્યાને રાખીને પાર્ટી દ્વારા નિર્ણય કરાયો છે.

ભાજપ વિરુદ્ધ મતદાન કરનાર સભ્યો થઈ શકે છે સસ્પેન્ડ 
આ મામલે ભાજપના 12 સભ્યો પર પ્રદેશ સંગઠન દ્વારા નજર રાખવામાં આવી રહી છે. કોંગ્રેસે 16 અન્ય સભ્યોને સાથે રાખીને અવિશ્વાસની દરખાસ્ત કરી હતી જેને લઇને ભાજપમાં હડકંપ મચી ગયો હતો.  મહત્વનું છે કે હાલ બોરસદ પાલિકામાં ભાજપના 20 સભ્યો અને અપક્ષના 9 તેમજ કોંગ્રેસના 6 સભ્યો છે. તેમજ AAPનો પણ એક સભ્ય જીત્યો હતો. ત્યારબાદ હાલ બોરસદ પાલિકામાં ભાજપ શાસનની ધુરા સંભાળી રહ્યું છે. ત્યારબાદ આવતીકાલે બોરસદ પાલિકામાં ફ્લોર ટેસ્ટ થશે. આ પ્રકરણમાં ભાજપે આણંદના સાંસદ મિતેષ પટેલને  જવાબદારી સોંપી છે અને સાંસદે તમામ ભાજપના સભ્યોને વ્હીપ બજાવ્યું છે. હાલ આ મામલે જિલ્લાના રાજકારણમાં ચકચાર મચાવી છે.