SHORT & SIMPLE / ગુજરાતનાં ઈતિહાસમાં પહેલીવાર ઘઉંનો આટલો ઊંચો ભાવ બોલાયો: ખેડૂતોમાં ખુશીનો માહોલ

• ઘઉંનો ઉચો ભાવ બોલાતા ખેડૂતોમાં ખુશીનો મહોલ 
• ખેડૂતોના ઘઉંનો ભાવ 901 રૂપિયા બોલાયો 
• સારા ભાવને કારણે યાર્ડ ઘઉંના પાકથી ઉભરાયું

હિંમતનગર માર્કેટ યાર્ડમાં ઘઉંનો સૌથી ઉંચો ભાવ બોલાતા ખેડૂતો ખુશ ખુશ થઈ ગયા છે. ઈતિહાસમાં પહેલીવાર હિંમતનગર માર્કેટ યાર્ડમાં ઘઉંનો ભાવ 900ને પાર બોલાયો છે.  આજે માર્કેટયાર્ડમાં ખેડૂતોના ઘઉંનો ભાવ 901 રૂપિયા પ્રતિ મણ બોલાઈ રહ્યો છે. અન્ય જિલ્લાઓમાંથી પણ મોટી સંખ્યામાં ખેડૂતો યાર્ડ ખાતે ઘઉં વેચવા આવ્યા છે. 

ઘઉંની આવક પણ વધી
સાબરકાંઠા જિલ્લાના મુખ્ય મથક હિંમતનગરના માર્કેટિંગ યાર્ડમાં આજે ઘઉંની આવક પણ વધી છે. આજે માર્કેટયાર્ડમાં 14000થી વધારે બોરીની આવક થઈ છે. આમ તો ખેડૂતોને આટલા બધા ભાવની આશા ન હતી, પરંતુ અત્યારે સૌથી વધુ 901 રૂપિયા પ્રતિ મણનો ભાવ મળતાં ખેડૂતોમાં ખુશી જોવા મળી રહી છે. બીજી બાજુ, હજુ પણ આવક અને ભાવ વધવાની આશા છે. આપને જણાવી દઈએ કે, હિંમતનગર માર્કેટ યાર્ડમાં બે દિવસ પહેલા જાહેર હરાજી ઘઉંનો 836 ભાવ બોલાયો હતો. તે સમયે યાર્ડમાં 8 હજારથી વધુ ઘઉંની બોરીની આવક નોંધાઈ હતી.