સત્તાવાર આંકડા / ભારત કરોડપતિઓથી ભર'પૂર', 5 વર્ષમાં 50%નો જંગી વધારો, જાણો હાલ દેશમાં કેટલા છે ધનકુબેરો

• ભારતમાં અમીરોની સંખ્યામાં થયો વધારો
• છેલ્લાં 4 વર્ષોમાં 50% કરોડપતિઓ વધ્યાં
• ઈનકમ ટેક્સ રિટર્નનાં ડેટા પરથી મળી માહિતી

ભારતમાં અમીરોની સંખ્યામાં વધારો નોંધાયો છે. અને હવે આપણો દેશ  કરોડપતિઓનો દેશ બની રહ્યો છે. ઈનકમ ટેક્સ રિટર્ન ફાઈલિંગ ડેટા પરથી આ વાતનો અંદાજો લગાવી શકાય છે. ડેટા અનુસાર દેશમાં 1 કરોડથી વધારે રૂપિયા કમાતા લોકોની સંખ્યામાં વધારો થયો છે. ખાસ કરીને કોરોના બાદ આ આંકડો ઊંચો ગયો છે. અમીરોની સંખ્યામાં થઈ રહેલો વધારો દેશનાં વિકાસદરની ઝડપમાં પણ વધારાનાં સંકેત આપે છે.

50% કરોડપતિ ટેક્સપેયર્સ વધ્યાં
2022-23નાં ઈનકમ ટેક્સ રિટર્ન ડેટા અનુસાર ITR ફાઈલ કરનારા લોકોમાં 1 કરોડથી વધુ રૂપિયાની આવકવાળા ટેક્સપેયર્સની સંખ્યા 2.69 લાખ છે. આ આંકડો 2018-19માં 1.80 લાખ હતો. 2021-22માં 1 કરોડથી વધારે કમાતા લોકોની સંખ્યા 1.93 લાખ હતી.એટલે કે છેલ્લાં 4 વર્ષોમાં કરોડપતિઓની સંખ્યામાં 49.4% વધારો નોંધાયો છે. 

5 લાખથી વધુની ITR ભરતાં લોકોની સંખ્યા
ડેટા અનુસાર 5 લાખ રૂપિયાથી વધુનો ઈનકમ ટેક્સ ભરતાં લોકોની સંખ્યામાં 0.6%નો વધારો નોંધાયો છે. 2018-19ની સરખામણીએ 5 લાખથી 10 લાખ રૂપિયા સુધીનાં ટેક્સ બ્રેકેટમાં 1.10 કરોડ ટેક્સપેયર્સ છે. આ આંકડાઓથી સ્પષ્ટ થાય છે કે દેશમાં અમીરોની સંખ્યા વધી રહી છે અને એક કરોડથી વધારેની કમાણી કરતાં લોકો પણ વધી રહ્યાં છે.

કુલ ટેક્સપેયર્સની સંખ્યામાં પણ વધારો
દેશની કુલ આબાદીની સરખામણીએ દેશમાં ટેક્સ ફાઈલ કરનારાઓની કુલ સંખ્યા હજુ પણ ઓછી જ છે. સરકાર દ્વારા કરવામાં આવેલા તમામ પ્રકારનાં પ્રયાસો બાદ પણ ટેક્સપેયર્સની સંખ્યામાં ખાસ વધારો જોઈ શકાયો નથી. કુલ વસ્તીમાંથી માત્ર 6% લોકો જ ટેક્સ ચૂકવે છે.

2 વર્ષમાં બેગણાં થયાં કરોડપતિ
વાર્ષિક એક કરોડ રૂપિયાથી વધારે ઈનકમવાળા વ્યક્તિગત ટેક્સપેયર્સની સંખ્યા છેલ્લાં 2 વર્ષોમાં બમણી થઈને 2022 સુધી 1.69 લાખ થઈ ગઈ છે. વર્ષ 2022-23નાં ટેક્સ રિટર્નનાં આંકડાઓ અનુસાર કુલ 1,69,890 લોકો પોતાની વાર્ષિક કમાણી એક કરોડથી વધારેની જણાવી છે. વર્ષ 2021-22માં આ પ્રકારનાં લોકોની સંખ્યા 1,14,446 હતી. જ્યારે 2022-23માં આ આંકડો બમણો થઈને 2.69 લાખ થયો છે.