ચૂંટણી-2022 / કોંગ્રેસ નેતાએ કહ્યું, ગુજરાતમાં નવા-જૂની થવાના એંધાણ, જાણો સી.આર પાટીલે શું આપ્યો જવાબ

• ભાજપની કોર કમિટીની બેઠક પૂર્ણ
• બેઠક બાદ બોલ્યાં સી.આર.પાટીલ
• "કોંગ્રેસ પાયા વગરની વાતો કરી રહી છે"

ગાંધીનગરમાં પ્રદેશ કાર્યાલયે ભાજપની કોર કમિટીની બેઠક મળી હતી. બેઠક બાદ ગુજરાત ભાજપ પ્રમુખ સી.આર.પાટીલે કહ્યું કે, બેઠકમાં સરકાર અને પક્ષ દ્વારા કોરોનામાં કરાયેલી કામગીરી અંગે ચર્ચા કરવામાં આવી હતી. તેમજ વાવાઝોડા રાહત અંગે કેન્દ્ર સરકારના પેકેજ અંગે પણ ચર્ચા કરાઇ હતી. સાથે જ આગામી 2022ની વિધાનસભાની ચૂંટણી અંગે બેઠકમાં મહત્વપૂર્ણ ચર્ચા કરવામાં આવી હતી. સી.આર.પાટીલે કહ્યું કે ચૂંટણીને લઇ પ્રાથમિક તૈયારીઓ શરૂ કરી છે. કેટલાક સૂચનો અને માર્ગદર્શન આપવામાં આવ્યા છે.

મુખ્યમંત્રી વિરુદ્ધ આંતરીક અસંતોષ મુદ્દે સી.આર પાટીલનું નિવેદન

જેના જવાબમાં સીઆર પાટીલે કહ્યું કે, એ લોકો પાયાવગરની વાતો કરવા માટે જાણીતા છે. આવી કોઈપણ ઘટના નથી. પ્રભારીઓનું આવવું એ સામાન્ય વાત છે. અને કોર ગૃપની બેઠક હોવાથી તમામ નેતાઓને મળતા હોય છે. ગુજરાત ભાજપના પ્રભારી ભૂપેન્દ્ર યાદવ કોરોનાના કારણે લાંબા સમય પછી આવ્યા છે. આ પ્રકારના જવાબ સાથે પ્રશ્નને ટાળી દીધો હતો. 

કોંગ્રેસ નેતા શૈલેષ પરમારે કહ્યું, ગુજરાતમાં નવા-જૂની થવાના એંધાણ

કોંગ્રેસે આજે પેટ્રોલ-ડીઝલના વધતા ભાવોને લઈને રાજ્યભરમાં વિરોધ પ્રદર્શન કર્યુ હતું. આ પ્રદર્શન દરમિયાન કોંગ્રેસ નેતા શૈલેષ પરમારે ગુજરાતના ભાજપ પ્રભારી ભુપેન્દ્ર યાદવ પર નિવેદન આપ્યુ હતું. શૈલેષ પરમારે જણાવ્યું કે, કોઈ પણ એજન્ડા વગર ભુપેન્દ્ર યાદવ ગુજરાત આવ્યા તે શંકાસ્પદ છે તથા તેમને આ સાથે સરકારમાં નવા જૂની થવાના એંધાણ છે તેવુ જણાવીને ભાજપ પર પ્રહાર કર્યા હતા.

વિધાનસભા ચૂંટણી અગાઉ ભાજપની બેઠક

વિધાનસભાની ચૂંટણી પૂર્વે ગાંધીનગરમાં ભાજપની મહત્વની બેઠક મળી હતી. કમલમ ખાતે પ્રભારી ભૂપેન્દ્ર યાદવની હાજરીમાં કોર કમિટીની બેઠક મળી છે. જેમાં CM રૂપાણી, DyCM નીતિન પટેલ, પ્રદેશ અધ્યક્ષ સી.આર.પાટીલની હાજરીમાં યોજાઈ હતી. બેઠકમાં પદાધિકારીઓએ કરેલા કામની વિગતો રજૂ કરી હતી. કોરોનાકાળમાં સંગઠનના કામને લઈ બેઠકમાં ચર્ચા થઈ હતી.