- દિલ્હીમાં કોરોના સંક્રમણમાં વધારો છતાં દર્દીઓની સંખ્યા સામાન્ય
- હોસ્પિટલમાં 19ને ઓક્સિજન સપોર્ટની જરૂર હતી
- 4 ગંભીર રીતે બીમાર દર્દીઓને વેન્ટિલેટરની જરૂર હતી
દેશની રાજધાની દિલ્હીના આરોગ્ય નિષ્ણાંતોએ કહ્યું કે, દિલ્હીમાં કોરોનાના કેસમાં થોડો વધારો થયો હોવા છતાં હોસ્પિટલમાં દાખલ દર્દીઓની સંખ્યા સામાન્ય છે. ઓક્સિજન અને વેન્ટિલેટરની પણ જરૂરિયાત ઓછી છે. તો બીજી બાજુ દિલ્હી સરકારના ડેટા અનુસાર, શહેરમાં 3,705 એક્ટિવ કેસમાંથી શનિવારે ફક્ત 101 કોવિડ -19 દર્દીઓને હોસ્પિટલમાં દાખલ કરવામાં આવ્યા હતા. જો કે, આનો અર્થ એ થયો કે દિલ્હીની 9,489 હોસ્પિટલના બેડમાંથી લગભગ 99% ખાલી છે. જો કે, તમને જણાવી દઈએ કે, હોસ્પિટલમાં દાખલ 101 દર્દીઓમાંથી માત્ર 29 લોકો જ ICUમાં હતા. 19ને ઓક્સિજન સપોર્ટની જરૂર હતી અને 4 ગંભીર રીતે બીમાર દર્દીઓને વેન્ટિલેટરની જરૂર હતી.
હોસ્પિટલમાં દાખલ 90% થી વધુ ગંભીર તબીબી સ્થિતિ ધરાવતા લોકો સામેલ
વાસ્તવમાં, દિલ્હી સરકારના આરોગ્ય વિભાગના વરિષ્ઠ અધિકારીઓએ જણાવ્યું હતું કે, હોસ્પિટલમાં દાખલ કરાયેલા 90% થી વધુ લોકો કાં તો વરિષ્ઠ નાગરિકો છે કે જે મોટા ભાગે 75 વર્ષથી વધુ ઉંમરના છે અથવા તો જેમની પહેલેથી જ ગંભીર તબીબી સ્થિતિ રહેલી છે, જેમ કે કેન્સર, ગાંઠ અને ફેફસાં તેમજ કિડનીની સમસ્યાઓ. ગયા ડિસેમ્બર અને જાન્યુઆરીમાં પણ ઓમિક્રોનની લહેરમાં અમે અગાઉની લહેર કરતાં ઓછાં હોસ્પિટલમાં લોકોને જોયા હતા. આરોગ્ય અધિકારીના જણાવ્યાં અનુસાર, જે દર્દીઓ હોસ્પિટલમાં છે તે એવાં છે કે જેમની સ્વાસ્થ્યની સ્થિતિ કોરોના વગર પણ ગંભીર હતી અને જેઓ સંક્રમણના કારણે મૃત્યુ પામ્યા છે.
રાજધાનીમાં રસીકરણનો દર પણ ઘણો ઊંચો
સફદરજંગ હોસ્પિટલના સામુદાયિક આરોગ્ય વિભાગના વડા ડૉ. જુગલ કિશોરે જણાવ્યું હતું કે, જ્યાં સુધી હોસ્પિટલમાં દર્દીઓની સંખ્યા ઓછી હોય ત્યાં સુધી ગભરાવાની કોઈ વાત નથી. જો કે, તેમણે નિર્દેશ કર્યો છે કે, વરિષ્ઠ નાગરિકો અને નબળા વર્ગોની સુરક્ષા સુનિશ્ચિત કરવા કોવિડના વર્તનનું પાલન કરવું યોગ્ય હતું. દિલ્હી એવાં તબક્કે પહોંચી ગયું છે કે જ્યાં પર્યાપ્ત સંખ્યામાં લોકો પહેલેથી જ સંક્રમિત છે અને ચોક્કસ સ્તરની એન્ટિબોડીઝ મેળવી ચૂક્યાં છે. જ્યાં રાજધાનીમાં રસીકરણનો દર પણ ઘણો ઊંચો છે.
શનિવારે દિલ્હીમાં 1094 થી વધુ કેસ સામે આવ્યાં
આરોગ્ય વિભાગ દ્વારા જારી કરાયેલા આંકડા અનુસાર, શનિવારે દિલ્હીમાં 1,094 કેસ નોંધાયા હતાં જ્યારે આગલા દિવસે 1,042 કેસ નોંધાયા હતાં. જો કે, સકારાત્મક દર એટલે કે પોઝિટિવિટી રેટમાં કોઈ જ ફેરફાર નથી થયો. તેઓએ કહ્યું હતું કે, સંક્રમણના કારણે હોસ્પિટલમાં દાખલ દર્દીઓની સંખ્યા વધારે નથી. છેલ્લાં ત્રણ દિવસથી સંક્રમણના એક હજારથી વધુ કેસ સામે આવી રહ્યાં છે. તો આ સાથે છેલ્લાં ચોવીસ કલાકમાં સંક્રમણના કારણે બે દર્દીઓના પણ મોત થયા છે.
