- ભારતનું ત્રીજું ચંદ્ર મિશન ચંદ્રયાન-3 સફળ
- સોશ્યલ મીડિયા પર ટ્રેન્ડ થયું Congratulations Neighbors
- ભારતની જીત પર પાકિસ્તાને પણ પાઠવ્યાં અભિનંદન
ભારતનું ત્રીજું ચંદ્ર મિશન ચંદ્રયાન-3 સફળ રહ્યું છે. બુધવારે સાંજે 6.04 કલાકે ચંદ્રયાન-3ના લેન્ડરે ચંદ્રની સપાટી પર સોફ્ટ લેન્ડિંગ કર્યું હતું. રોવર પણ લેન્ડિંગના બે કલાક અને 26 મિનિટ પછી લેન્ડરમાંથી બહાર આવ્યું છે. ભારતના ચંદ્રયાન-3એ ચંદ્રના દક્ષિણ ધ્રુવની નજીક ઉતરાણ કરીને ઈતિહાસ રચ્યો છે. 40 દિવસની લાંબી મુસાફરી બાદ બુધવારે ચંદ્રયાન-3ના લેન્ડરે ચંદ્રની સપાટી પર સોફ્ટ લેન્ડિંગ કર્યું હતું
આ માત્ર ભારત માટે જ નહીં પરંતુ સમગ્ર વિશ્વ માટે એક મોટી ઉપલબ્ધિ છે. મિશનની સફળતા માટે દેશભરમાં પ્રાર્થનાઓ ચાલી રહી હતી. વિશ્વભરના વૈજ્ઞાનિકો અને સામાન્ય લોકોની નજર તેના પર ટકેલી હતી. દરેક વ્યક્તિ સ્પેસ એજન્સી ઈસરોની મહેનતની પ્રશંસા કરી રહી છે. આ પ્રસંગે પાકિસ્તાનીઓએ પણ ભારતને અભિનંદન પાઠવ્યા છે. અભિનંદન પડોશીઓ ( Congratulations Neighbors ) સોશિયલ મીડિયા પર ખૂબ જ ટ્રેન્ડ કરી રહ્યાં છે.
પાકિસ્તાનને ભારત સાથે ગમે તેટલી દુશ્મનાવટ હોય, પરંતુ આ સફળતા પછી પાકિસ્તાનીઓ પણ ભારતને અભિનંદન આપવાથી પાછળ નથી રહી રહ્યા. તે તસવીરો શેર કરીને તેઓ જણાવી રહ્યા છે કે આજે પાકિસ્તાન ક્યાં છે અને ભારત ક્યાં પહોંચી ગયું છે.
શું કહે છે પાકિસ્તાની લોકો?
ઉસ્બાહ મુનેમ નામના યુઝરે કહ્યું, 'અભિનંદન પાડોશીઓ ( Congratulations Neighbors ), તેમાં કોઈ શંકા નથી કે તમે ટેક્નોલોજીના ક્ષેત્રમાં શ્રેષ્ઠ કામ કરી રહ્યા છો.'
યાસિર ખાન નામના યુઝરે કહ્યું, 'અલ્લાહ કોઈ સમુદાયની સ્થિતિ ત્યાં સુધી બદલતો નથી જ્યાં સુધી તે પોતાની જાતને બદલે નહીં. અભિનંદન પડોશીઓ( Congratulations Neighbors ). મોટી સિદ્ધિ.
હસીબ અહેમદે કહ્યું, 'પાકિસ્તાનીઓ તેમના મતભેદો ભૂલી ગયા છે. અભિનંદન પાડોશીઓની સાથે પાકિસ્તાનમાં પણ અભિનંદન ભારતનો ટ્રેન્ડ ચાલી રહ્યો છે. ભારતે આ પ્રદેશને બતાવી દીધું છે કે તમામ મુશ્કેલીઓ વચ્ચે પણ જો તમારી પાસે સાચા લોકો હોય તો કશું જ અશક્ય નથી.
આમિર અવાન લખે છે, 'એક પાકિસ્તાની તરીકે હું માનું છું કે, ભારત આર્થિક રીતે આપણાથી ઘણું આગળ છે અને આજે ભારતની પ્રશંસા થવી જોઈએ. ભારતને અભિનંદન. પાકિસ્તાન તરફથી પડોશીઓના પ્રેમને અભિનંદન.'
તમને જણાવી દઈએ કે, આ સફળતા સાથે ભારત ચંદ્રના દક્ષિણ ધ્રુવ પ્રદેશ પર ઉતરનાર વિશ્વનો પહેલો દેશ બની ગયો છે. આ ઉપરાંત, તે ચંદ્ર પર સોફ્ટ લેન્ડિંગ કરનાર વિશ્વનો ચોથો દેશ બની ગયો છે. અગાઉ રશિયા, ચીન અને અમેરિકાએ આ સ્થાન હાંસલ કર્યું હતું. પરંતુ તેમનું કાર્ય વિષુવવૃત્તીય પ્રદેશ પૂરતું મર્યાદિત હતું. જ્યારે ભારતના વિક્રમ લેન્ડરે દક્ષિણ ધ્રુવીય ક્ષેત્રની નજીક સોફ્ટ લેન્ડિંગ કર્યું છે, જે ખૂબ જ ગર્વની વાત છે.
