- અતિવૃષ્ટિને લઇ સીએમ ભુપેન્દ્ર પટેલે કર્યુ નિરિક્ષણ
- હવાઈ નિરીક્ષણ કરી જૂનાગઢ કલેકટર કચેરી પહોંચ્યા
- અસરગ્રસ્ત વિસ્તારોમાં સી એમ એ કર્યું હવાઈ નિરીક્ષણ
- અધીકારીઓ અને પદાધીકારીઓ સાથે CMની બેઠક
રાજ્યમાં ભારે વરસાદના પગલે અનેક વિસ્તારોમાં તારાજી સર્જાઈ છે. આ તરફ જૂનાગઢ, ગીર સોમનાથ, માંગરોળ, તાલાલા, માળિયા હાટીના સહિતના વિસ્તારોમાં ભારે વરસાદને કારણે મોટું નુકશાન થયું છે. આ તરફ આજે રાજ્યના મુખ્યમંત્રી ભૂપેન્દ્ર પટેલે અસરગ્રસ્ત વિસ્તારોનું હવાઈ નિરીક્ષણ કરી વરસાદી સ્થિતિનો ક્યાસ મેળવ્યો હતો. નોંધનીય છે કે, છેલ્લા 2-3 દિવસમાં સૌરાષ્ટ્રમાં ભારે વરસાદ વરસ્યો છે.
ગુજરાતના મુખ્યમંત્રી ભુપેન્દ્ર પટેલે સૌરાષ્ટ્રના જૂનાગઢ અને ગીર સોમનાથ વિસ્તારોમાં થયેલ ભારે વરસાદને કારણે સર્જાયેલી સ્થિતિનું હવાઈ નિરીક્ષણ કર્યું હતું. ભૂપેન્દ્ર પટેલે વેરાવળ, સોમનાથ, માંગરોળ અને ઘેડ સહિતના વિસ્તારોનું હવાઈ નિરીક્ષણ કરી વરસાદી સ્થિતિનો ક્યાસ મેળવ્યો હતો. CM ભૂપેન્દ્ર પટેલની સાથે મુખ્ય સચિવ રાજકુમાર તેમજ મહેસૂલ વિભાગના અધિક મુખ્ય સચિવ એમ.કે. દાસ પણ જોડાયા હતા.
જૂનાગઢ જિલ્લામાં સાંબેલાધાર વરસાદને લઈ હવે વરસાદથી પ્રભાવિત વિસ્તારોનું CM ભૂપેન્દ્ર પટેલે નિરીક્ષણ કર્યું હતું. આ તરફ હવે હવાઈ નિરીક્ષણ બાદ ભૂપેન્દ્ર પટેલે જીલ્લા કલેક્ટર કચેરીમાં બેઠક પણ કરી હતી. આ સાથે ભૂપેન્દ્ર પટેલે ઉચ્ચ અધિકારીઓ સાથે બેઠક કરી નુકશાન અંગે ચર્ચા કરી હતી. આજે ભૂપેન્દ્ર પટેલે જૂનાગઢ, ગીર સોમનાથ, માંગરોળ, તાલાલા, માળિયા હાટીના તેમજ હિરણ ડેમના વિસ્તારોનું હવાઇ નિરીક્ષણ કર્યુ છે.
