બેદરકારી / ગીરગઢડામાં નાના ભૂલકાઓના આરોગ્ય સાથે ચેડા! આંગણવાડીના ભોજનમાંથી ઈયળ નીકળતા વાલીઓમાં ચિંતા

• ગીરગઢડાના જરગલી ગામની આંગણવાડીમાં ભોજનમાંથી નીકળી ઈયળો
• નાના ભૂલકાઓને અપાતા ભોજનમાંથી ઈયળો નીકળતા વાલીઓમાં રોષ
• ગામના જાગૃત નાગરિક દ્રારા ફોટો વાયરલ કરાતા મામલો સામે આવ્યો

ગીરસોમનાથના ગીરગઢડા તાલુકાના જરગલી ગામની આંગણવાડીમાં નાના ભૂલકાઓને અપાતા ભોજનમાંથી ઈયળો નીકળતા વાલીઓ રોષે ભરાયા. વાલી દ્રારા બાળકોનું ભોજન ચેક કરવામાં આવતા આ મામલો સામે આવ્યો છે. વાલી દ્રારા સરપંચને જાણ કરવા છતાં પણ કોઇ પણ પ્રકારના આ મામલે પગલાં ન લેવાયાનો વાલીઓ આક્ષેપ કરી રહ્યાં છે. આથી, ગામના જાગૃત નાગરિક દ્રારા બાળકોના ભોજનમાંથી ઇયળ નીકળ્યાનો ફોટો વાયરલ કરવામાં આવ્યો.

બાળકોને સ્વચ્છ ભોજન ખવડાવવામાં આવે તેવી વાલીઓમાં માંગ

જો કે, આંગણવાડીમાં નાના ભૂલકાઓને અપાતા ભોજનમાંથી ઈયળો નીકળતા અહીં સૌથી મોટો પ્રશ્ન એ ઊભો થાય છે કે, શું ભોજન બનાવવા માટેનું અનાજ ઉપરથી જ ખરાબ આવે છે કે પછી સ્થાનિક કેન્દ્રમાં તેની સાફસફાઇ નથી કરાતી? બાળકો બીમાર પડશે અથવા તો તેમને કંઇ થશે તો જવાબદાર કોણ? આવાં ઇયળો વાળા અખાદ્ય ખોરાક ખાવાથી બાળકોના જીવનું જોખમ મંડરાઇ રહ્યું છે. તેમજ આવું ભોજન અનેક પ્રકારના રોગોને આમંત્રણ પણ આપે છે. તેમજ બાળકોને વિટામિનના બદલે માંદગી ઉભી થતી હોય આ બાબતે ઉચ્ચકક્ષાએથી યોગ્ય તપાસ કરી બાળકોને સ્વચ્છ ભોજન ખવડાવવામાં આવે તેવી વાલીઓમાં માંગ ઉઠી છે.

બાળક પોતાના ઘરે લઇ જતા સમગ્ર મામલો સામે આવ્યો

તમને વિગતે જણાવી દઇએ કે, ગીરગઢડાના જરગલી ગામે આવેલ આંગણવાડી કેન્દ્ર નં. 3 માં ખૂબ મોટી સંખ્યામાં બાળકો અભ્યાસ માટે આવતા હોય છે. અને તમામ બાળકોને સવાર અને બપોર એમ અલગ-અલગ સમયે કેન્દ્ર ખાતે નાસ્તો અને ભોજન કરાવવામાં આવે છે. ત્યારે ગામમાં રહેતા બાળકને ડબ્બામાં દાળ-ઢોકળી પીરસવામાં આવી હતી. જે બાળક પોતાના ઘરે લઇ જતા જ્યારે તેના વાલીએ ડબ્બો ખોલ્યો તો દાળ-ઢોકળીના ભોજનમાં ઇયળ અને ધનેડા દેખાયા.

આ અંગેની જાણ ગામના સરપંચને જાણ કરાતા કેટલાંક જાગૃત યુવાનો અને આગેવાનો સહીત તાત્કાલિક આંગણવાડી ખાતે પહોંચી ગયા. તેમજ આ બાબતે મહિલા સંચાલક સમગ્ર હકીકત જણાવતા ભોજનમાં કોઇ કારણોસર આ ઇયળ પડી હોવાનું કહીને પોતાનો બચાવ કરેલ હોય આ બાબતે તાલુકા બાળવિકાસ સંકલનના ઇન્ચા. સીડીપીઓનો ટેલિફોનિક સંપર્ક કરતા તેઓએ ફોન રિસિવ કર્યો ન હતો.