નિવેદન / 'વિના વેરિફિકિશન જમીન પણ નહીં ખરીદી શકો', ટૂંક સમયમાં દેશની આ રાજ્ય સરકાર લાવશે નવો કાયદો

• ઉત્તરાખંડના મુખ્યમંત્રી પુષ્કર સિંહ ધામીનું મોટું નિવેદન
• રાજ્યમાં જમીન ખરીદનારાઓની બેકગ્રાઉન્ડ ચેક કરવામાં આવશે: CM 
• જમીન ખરીદી અંગે ટૂંક સમયમાં કાયદો લાવવામાં આવશે: CM 

ઉત્તરાખંડના CM પુષ્કર સિંહ ધામીનું મોટું નિવેદન સામે આવ્યું છે. વાત જાણે એમ છે કે, પુષ્કર ધામીએ એક ખાનગી ચેનલ સાથેની વાતચીતમાં કહ્યું છે કે, રાજ્યમાં જમીન ખરીદનારાઓની બેકગ્રાઉન્ડ ચેક કરવામાં આવશે. તેમણે કહ્યું કે,ટૂંક સમયમાં એવો કાયદો લાવવામાં આવશે કે કોઈ પણ વ્યક્તિ ચકાસણી વિના જમીન લઈ શકશે નહીં.

મુખ્યમંત્રી પુષ્કર ધામીએ કહ્યું કે, કેબિનેટમાં નિર્ણય લેવામાં આવ્યો છે કે જે પણ અહીં જમીન ખરીદશે તેની પાછળનો રેકોર્ડ જોવામાં આવશે. તેની પાછળનો હેતુ એ છે કે જમીન ખરીદનાર વ્યક્તિનો રેકોર્ડ શોધી શકાય. તેમણે કહ્યું કે, ઉત્તરાખંડ ધર્મ, સંસ્કૃતિ અને આધ્યાત્મિકતાની ભૂમિ છે. વિશ્વમાં તેની સંસ્કૃતિની એક અલગ ઓળખ છે. તેના મૂળ સ્વરૂપમાં કોઈપણ રીતે કોઈ ફેરફાર થયો ન હતો, તેથી આવો નિર્ણય લેવામાં આવ્યો છે.

અતિક્રમણ અંગે ભેદભાવ વગર થશે કાર્યવાહી 
મુખ્યમંત્રીએ કહ્યું કે, પાછલા વર્ષોમાં આવા અનુભવો આવ્યા છે, જેના કારણે આ દિશામાં વિચારવાની જરૂરિયાત અનુભવાઈ છે. આ દરમિયાન તેમણે એ પણ સ્પષ્ટ કર્યું કે, અમે કોઈની વિરુદ્ધ નથી. બધા સાથે સુમેળ અને ભાઈચારાથી રહે છે. લોકોને પણ આવી જ અપીલ કરવામાં આવી છે, પરંતુ જ્યાં ખોટું હશે ત્યાં કાર્યવાહી કરવામાં આવશે. એમ કહીને મુખ્યમંત્રીએ રાજ્યમાં ભૂતકાળમાં સામે આવેલા અતિક્રમણો વિશે સંકેત આપ્યો અને એમ પણ કહ્યું કે, 1000થી વધુ સ્થળોની ઓળખ કરવામાં આવી છે, જ્યાં અતિક્રમણ સામે આવ્યા છે. 

ઉત્તરાખંડમાં એક હજારથી વધુ ગેરકાયદે બાંધકામો
ગેરકાયદે બાંધકામો પર મુખ્યમંત્રીએ કહ્યું કે, ઉત્તરાખંડમાં એક હજારથી વધુ ગેરકાયદે બાંધકામો સામે આવ્યા છે અને અત્યાર સુધીમાં 300થી વધુ ગેરકાયદે બાંધકામો પર કાર્યવાહી કરવામાં આવી છે. તેમણે સ્પષ્ટ શબ્દોમાં કહ્યું હતું કે, ગેરકાયદેસર બાંધકામો સામે કોઈપણ ભેદભાવ વિના આ કાર્યવાહી કરવામાં આવશે. તમામ સરકારી મિલકતોને ગેરકાયદે બાંધકામથી મુક્ત કરવામાં આવશે, પછી તે મંદિર, મઝાર કે ગુરુદ્વારા હોય.

જમીન કાયદા વિશે શું કહ્યું ? 
આ પ્રસંગે મુખ્યમંત્રીએ જમીન કાયદા વિશે પણ જણાવ્યું હતું. તેમણે કહ્યું કે, જમીન કાયદો વિચારણા હેઠળ છે અને ડ્રાફ્ટ લગભગ પૂર્ણ થઈ ગયો છે. જેનો અમલ પણ ટૂંક સમયમાં કરવામાં આવશે. તેમણે કહ્યું કે, આ કાયદો પણ જમીન કાયદાનો એક ભાગ છે. તેમણે કહ્યું કે,  અમે યુનિફોર્મ સિવિલ કોડને લઈને એક કમિટીની રચના કરી છે. 30 જૂન સુધીમાં યુનિફોર્મ સિવિલ કોડનો ડ્રાફ્ટ તૈયાર થઈ જશે. તે પછી ગમે ત્યારે અરજી કરી શકે છે. નોંધનીય છે કે, CM પુષ્કર ધામી પહેલા જ કહી ચુક્યા છે કે, ઉત્તરાખંડ યુનિફોર્મ સિવિલ કોડ લાગુ કરનાર દેશનું પ્રથમ રાજ્ય બનશે.