ક્યાં છે પોલીસ? / '..તું મીનાની ફરિયાદમાં કેમ સાક્ષી થયો', ફરિયાદી-સાક્ષીઓ પર માથાભારે તત્ત્વોના હુમલા, ગોમતીપુર અને અમરાઈવાડીમાં ચોંકાવનારા બનાવ

• ગોમતીપુર અને અમરાઈવાડીમાં ચોંકાવનારા બનાવ
• પોલીસ સ્ટેશનમાં ફરિયાદ કરનાર ફરિયાદી અને સાક્ષીઓ પર માથાભારે તત્ત્વોના હુમલા
• ફરિયાદ પરત ખેંચવા તેમજ સાક્ષીમાંથી હટી જવાનું આરોપીઓનું દબાણ

અમદાવાદના ગોમતીપુર વિસ્તારમાં આવેલા દેવશેરીમાં રહેતા વિશાલ બ્રહ્મભટ્ટે ગોમતી પોલીસ સ્ટેશનમાં જયરાજ ઉર્ફે પિંકુ જાડેજા, કેતન ઉર્ફે નાનિયો મહેતા, ગુલિયો મહેતા અને ભોલિયા વિરુદ્ધ મારામારીની ફરિયાદ કરી છે. ગઇ કાલે વિશાલ નોકરી પતાવીને ઘરે આવ્યો હતો ત્યારે તેની શેરીમાં રહેતો જયરાજ ઉર્ફે જાડેજા તેની પાસે આવીને કહેવા લાગ્યો હતો કે મારી વિરુદ્ધમાં પોલીસ ફરિયાદ કેમ કરી છે. વિશાલ કઇ બોલે તે પહેલાં જયરાજ જાડેજા તેને ગાળો બોલવા લાગ્યો હતો. જયરાજનો અવાજ સાંભણીને કેતન, ગુલિયો તેમજ ભોલિયો પણ આવી ગયા હતા અને વિશાલને માર મારવા લાગ્યા હતા.

જાનથી મારી નાખવાની ધમકી

મહત્વનું છે કે ચારેય યુવકો દેવશેરીમાં રહે છે અને તેમણે વિશાલને ધમકી આપી હતીકે કેસ પાછો ખેંચી લેજે નહીં તો જાનથી મારી નાખીશું. વિશાલે બૂમાબૂમ કરતાં આસપાસના લોકો દોડી આવ્યા હતા જેના કારણે ચારેય શખ્સો નાસી ગયા હતા. ઇજાગ્રસ્ત વિશાલને સારવાર માટે હોસ્પિટલમાં લઇ ગયા હતા જ્યારે ગોમતીપુર પોલીસે ચાર વિરુદ્ધ ગુનો દાખલ કરીને તપાસ શરૂ કરી છે. આ પ્રકારની ઘટના અમરાઇવાડી વિસ્તારમાં બની છે. જેમાં રમેશ દુલેરા નામની વ્યકિતએ અમરાઇવાડી પોલીસ સ્ટેશનમાં તુષાર રાણા તેમજ તિલક રાણા વિરુદ્ધ ફરિયાદ કરી છે. રમેશ દુલેરા ગઇ કાલે બહાર ગયા હતા ત્યારે તેમના ૧૫ વર્ષના પુત્ર ભૌમિક પર તુષાર રાણા અને તિલક રાણાએ હુમલો કર્યો હતો. ભૌમિક તેના મિત્ર સાથે મેલડી માતાનાં મંદિરે દર્શન કરવા માટે ગયો ત્યાં તેની સ્કૂલમાં અભ્યાસ કરતી એક વિદ્યાર્થિની મીના (નામ બદલ્યું છે) પણ આવી હતી. તુષાર અને તિલક પણ દર્શન કરવા માટે આવ્યા હતા ત્યારે મીના સાથે તેમનો ઝઘડો થયો હતો. બંને જણા મીનાને માર મારતા હતા ત્યારે તેની માતાએ રામોલ પોલીસ સ્ટેશનમાં પોક્સો એક્ટ હેઠળ છેડતીની ફરિયાદ કરી હતી. 

 બે શખ્સ વિરૂદ્ધ ગુનો દાખલ
ફરિયાદમાં ભૌમિક સાક્ષી હોવાના કારણે તિલક અને તુષારે હુમલો કર્યો છે. ગઇ કાલે બંને ભૌમિક પાસે આવીને ગાળો બોલીને કહેવા લાગ્યા હતા તું મીનાની ફરિયાદમાં કેમ સાક્ષી થયો છે. તું સાક્ષીમાંથી નીકળી જા. ભૌમિકે ગાળો બોલવાની ના પાડતાં બન્નેએ લોખંડની પાઇપ લઇને માર મારવાનો શરૂ કરી દીધો હતો.ભૌમિકને લોખંડની પાઇપ વાગતાં તેને હાથમાં ફ્રેકચર થયું છે. અમરાઇવાડી પોલીસે આ મામલે બે શખ્સ વિરૂદ્ધ ગુનો દાખલ કર્યો છે.