અમદાવાદ / ચાંદખેડામાં ફોન પર વાત કરવાનો ઢોંગ કરી અશ્લીલ વીડિયો ઉતારતા શખ્સને મહિલાએ ફટકાર્યો

• અમદાવાદમાં સુરક્ષિત નથી મહિલાઓ
• આધેડે ફોનમાં ઉતાર્યા મહિલાના વિડિયો
• આધેડના ફોનની તપાસ કરતા વિડીયો આવ્યો સામે

અમદાવાદના ચાંદખેડા વિસ્તારમાં થોડા સમય પહેલા પણ યુવતીની છેડતી કરતા યુવક ઝડપાયો હતો. તે સ્થળ પર ફરી એક વખત યુવતીનો વીડિયો બનાવનાર આધેડને યુવતીઓએ સબક શીખવાડ્યો હતો. જગતપુર રોડ પર આવેલ સેવી સ્વરાજ આકાંશા ફ્લેટ નજીક આધેડ વયનો પુરુષ જયેશ પટેલ યુવતીનો વીડિયો બનાવી રહ્યો હતો. આ આધેડના મોબાઈલમાં ફ્લેશ જોતા યુવતીને શંકા ગઈ અને તેણે મોબાઈલ ચેક કરતા તેના શોર્ટ કપડા પહેરેલા અશ્લીલ વીડીયો જોવા મળ્યો. યુવતી દ્વારા સર્તક્તા દાખવી અને હિંમતપૂર્વક આધેડનો ફોન તપાસતા આધેડની હેવાનિયત સામે આવી હતી. આ યુવતીએ પોતાનુ રક્ષણ ખુદ કરીને મહિલાઓને સેલ્ફ ડિફેન્સ રહેવાની અપીલ પણ કરી છે.

પોલીસે આરોપીની ધરપકડ કરી

ફરિયાદી યુવતીનો આરોપ છે કે તેને આધેડનો મોબાઈલ લઈને તેમાં તપાસ કરતા તેઓનો વિડીયો મળી આવ્યો હોવાનું જાણવા મળ્યું હતું. જેથી આસપાસની યુવતીઓ ભેગી થઈને આધેડને માર માર્યો હતો. બાદમાં પોલીસને જાણ કરતા પોલીસ ઘટના સ્થળે પહોંચી હતી. યુવતીની ફરિયાદ નોંધીને આરોપીની ધરપકડ કરી વધુ તપાસ શરૂ કરી છે. આરોપી જયેશ પટેલ AC રિપેરીંગનું કામ કરે છે અને CTM ચાર રસ્તા પાસે રહેતો હોવાનું જાણવા મળ્યું છે.

ફોન પર વાત કરવાનો ઢોંગ કરીને ઉતારતો હતો વીડિયો

ફરિયાદી યુવતી તેમજ આધેડ સાથે થયેલ સમગ્ર ઘટના CCTVમાં પણ કેદ થઈ છે. જેમાં આધેડ ફોન પર વાત કરવાનો ઢોંગ કરતો હતો, પરંતુ તેના ફોનની ફ્લેશલાઈટ ચાલુ છે જે સ્પષ્ટ CCTVમાં સામે આવ્યુ છે. આ મહિલાની સર્તકતાને કારણે અને તેને પોતાની સુરક્ષા માટે ભરેલા પગલાથી છેડતી કરનાર આધેડ પોલીસના હાથે ઝડપાયો છે. પરંતુ આવા અનેક રોમિયોગીરી કરતા શખ્સો યુવતી અને મહિલાઓની જાહેરમાં છેડતી કરતા હોય છે. પણ ઘણી મહિલાઓ ડરના કારણે ફરિયાદ ન કરતા આવા રોમિયો બિન્દાસ્ત ફરતા હોય છે અને સમાજમાં દુષણ ફેલાવતા હોય છે.

થોડા દિવસ અગાઉ પણ અમદાવાદના જગતપુર વિસ્તારમાં કિશોરીનો ફોટો પાડનાર સગીર આરોપીને ઝડપીને લોકોએ ઢોરમાર માર્યો હતો. લોકો જોઈ જતા તેને અટકાવી ફોટો ડીલીટ કરાવ્યા હતા. સગીર સામે પોલીસે છેડતીની ફરિયાદ નોંધી ધરપકડ કરી હતી.