કવાયત / અમદાવાદ શહેરના શાસકો દ્વારા આશરે 9500 કરોડનું સુધારિત બજેટ રજૂ કરાશે, આવા ટેક્સમાં વધારો ઝીંકાય તેવા અણસાર

• કમિશનર દ્વારા વર્ષ ર૦ર૩-ર૪ માટેનું રૂ. ૮૪૦૦ કરોડનું ડ્રાફ્ટ બજેટ રજૂ કરાયું હતું
• શહેરના શાસકો દ્વારા આશરે રૂ. ૯પ૦૦ કરોડનું સુધારિત બજેટ રજૂ કરાશે
• ડ્રાફ્ટ બજેટમાં સ્વચ્છતા સેસ બમણી કરવાની દરખાસ્ત પણ મુકાઈ

 ગત તા. ૩૧ જાન્યુઆરી, ર૦ર૩એ મ્યુનિ. કમિશનર એમ. થેન્નારસન દ્વારા આગામી નાણાકીય વર્ષ ર૦ર૩-ર૪ માટેનું રૂ. ૮૪૦૦ કરોડનું ડ્રાફ્ટ બજેટ રજૂ કરાયું હતું. આ ડ્રાફટ બજેટમાં સુધારા-વધારા સૂચવતું શહેરના ભાજપ શાસકો દ્વારા હવે સુધારીત બજેટ રજૂ કરાશે. આ માટેનાં ચક્રો ગતિમાન કરાયાં હોઈ તે આશરે રૂ. ૯પ૦૦ કરોડનું બનાવાશે. 
પ્રોપર્ટી ટેક્સમાં ૧૦ વર્ષ બાદ વધારો સૂચવાયો છે
મ્યુનિસિપલ તંત્રના આગામી વર્ષ ર૦ર૩-ર૪ના રૂ. ૮૪૦૦ કરોડના ડ્રાફટ બજેટમાં રૂ. ૪૯૦૦ રેવન્યૂ ખર્ચ અને રૂ. ૩પ૦૦ કરોડ કેપિટલ ખર્ચ દર્શાવાયો છે. ઉપરાંત પ્રોપર્ટી ટેક્સમાં ૧૦ વર્ષ બાદ વધારો સૂચવાયો છે તેમજ એન્વાયરન્મેન્ટ ઇમ્પ્રૂવમેન્ટનો નવો સૂચિત ચાર્જ દર્શાવાયો છે. ડ્રાફ્ટ બજેટમાં સ્વચ્છતા સેસ બમણી કરવાની દરખાસ્ત પણ મુકાઈ છે. 

સુધારિત બજેટ રજૂ કરવાની દિશામાં કવાયત આરંભાઈ
હવે શહેરના શાસકો દ્વારા સુધારિત બજેટ રજૂ કરવાની દિશામાં કવાયત આરંભાઈ છે. આજે સાંજે લો ગાર્ડન ખાતે આવેલા મેયર બંગલે મેયર કિરીટ પરમારની અધ્યક્ષતામાં ભાજપના કોર્પોરેટરો અને શહેરના ધારાસભ્યોની મહત્ત્વની મિટિંગ યોજાશે, જેમાં શાસક પક્ષના બજેટ અંગેનાં વિવિધ સૂચનો પર ચર્ચા-વિમર્શ થશે. 
સુધારિત બજેટ કરતાં રૂ. ૬૯૩ કરોડની વૃદ્ધિ ધરાવતું બને તેવી શક્યતા
આગામી નાણાકીય વર્ષ ર૦ર૩-ર૪ના સુધારિત બજેટનું કદ રૂ. ૯પ૦૦ કરોડની આસપાસ પહોંચે તેવી શક્યતા છે એટલે કે મ્યુનિ. કમિશનરના ડ્રાફટ બજેટમાં આશરે રૂ. ૧૧૦૦ કરોડના સુધારા મુકાય તેમ લાગે છે. સ્ટેન્ડિંગ કમિટીના ચેરમેન હિતેશ બારોટ દ્વારા મુકાનારું આ સુધારિત બજેટ ગત વર્ષના સુધારિત બજેટ કરતાં રૂ. ૬૯૩ કરોડની વૃદ્ધિ ધરાવતું બને તેવી શક્યતા છે.
મ્યુનિસિપલ ભાજપની મહત્ત્વપૂર્ણ બેઠકમાં ચર્ચા-વિચારણા થશે
જોકે ડ્રાફ્ટ બજેટમાં સૂચવાયેલા વિવિધ કરને યથાવત્ જાળવી રાખવા કે પછી તેમાં ઘટાડો કરવો કે પછી તેને ફગાવી દેવા વગેરે નીતિ વિષયક બાબતોની પણ સાંજે મેયર બંગલે યોજાનારી મ્યુનિસિપલ ભાજપની મહત્ત્વપૂર્ણ બેઠકમાં ચર્ચા-વિચારણા થશે.
શહેરના વિકાસને લગતા વિવિધ પ્રોજેક્ટો અંગે પણ કોર્પોરેટરો અને ધારાસભ્યો તરફથી બેઠકમાં સૂચન મુકાશે, તેના ઉપર પણ ચર્ચા-વિચારણા કરીને નવા કયા પ્રોજેક્ટનો સમાવેશ સુધારિત બજેટમાં કરવો તે અંગે નિર્ણય લેવાશે. આ બેઠક બાદ અઠવાડિયામાં નાગરિકો સમક્ષ સુધારિત બજેટ રજૂ થાય તેવી શક્યતા છે.