- મામલતદાર કચેરીના કોમ્પ્યુટર ઓપરેટરે આચર્યું કૌભાંડ
- મધ્યાહન ભોજન સંચાલકોને આપ્યા બનાવટી હુકમ
- કમલાબાગ પોલીસ સ્ટેશનમાં ફરિયાદ નોંધાઈ
પોરબંદર મામલતદાર કચેરીમાં કોન્ટ્રાક્ટ પર ફરજ બજાવતા કોમ્પ્યુટર ઓપરેટરે કૌભાંડ આચરતા ખળભળાટ મચી ગયો છે. કોમ્પ્યુટર ઓપરેટરે સરકારી કામકાજના બોગસ હુકમો બનાવી આપતા કમલાબાગ પોલીસ સ્ટેશનમાં ફરિયાદ નોંધાઈ છે.
સંચાલકોને મધ્યાહન ભોજન ચલાવવા બનાવટી હુકમ આપ્યા
મળતી માહિતી અનુસાર, મામલતદાર કચેરીમાં કોન્ટ્રાક્ટ આધારિત કોમ્પ્યુટર ઓપરેટર તરીકે ફરજ બજાવતા યુવકે મધ્યાહન ભોજન ચલાવવા સંચાલકોને બનાવટી હુકમ આપી દીધા હતા. ભરતી પ્રક્રિયા દરમિયાન બોગસ હુકમ સાથે એક સંચાલક ઘૂસી આવતા સમગ્ર ભાંડો ફૂટ્યો છે.
કોમ્પ્યુટર ઓપરેટર સામે ફરિયાદ નોંધાઈ
તપાસમાં સામે આવ્યું છે કે, આ કોમ્પ્યુટર ઓપરેટરે એક કે બે નહીં ચાર ચાર સ્કૂલોના મધ્યાહન ભોજન સંચાલકોને મધ્યાહન ભોજન ચલાવવા બનાવટી હુકમ આપ્યા હતા. હાલ સમગ્ર મામલે કમલાબાગ પોલીસ સ્ટેશનમાં કોમ્પ્યુટર ઓપરેટર સામે સરકારી કામકાજના બોગસ હુકમો બનાવવાની ફરિયાદ નોંધાવવામાં આવી છે.
ઉના મામલતદાર કચેરીના કર્મચારીએ આચર્યું હતું લાખોનું કૌભાંડ
અત્રે ઉલ્લેખનીય છે કે, થોડા સમય અગાઉ ઉના મામલતદાર કચેરીમાં કોન્ટ્રાક્ટ આધારિત કામ કરતા કર્મચારીએ લાખો રૂપિયાનું કોભાંડ આચર્યું હતું. વાસ્તવમાં મામલતદાર કચેરીમાં કોન્ટ્રાક્ટ આધારિત કામ કરતા કર્મચારી દ્વારા વિધવા સહાય યોજનાની લાભાર્થી મહિલાના ખાતામાં જમા કરવામાં આવતી રકમના ડેટામાં ચેડા કરીને સરકાર દ્વારા અપાતી સહાય પોતાના જ સગા સંબંધીઓના ખાતામાં રકમ જમા કરાવીને લાખો રૂપિયાનું કૌભાંડ આચરવામાં આવ્યું હતું. આ સમગ્ર મામલાનો પર્દાફાશ થયા બાદ ઉનાના ધારાસભ્યએ મામલતદારને યોગ્ય તપાસ કરવા માટે જણાવ્યું હતું.
