બેદરકારી / VIDEO: ભારે પવન વચ્ચે દરિયાકાંઠે આવેલ શિવ મંદિરના પરિસરમાં એક સાથે 5 સાવજો આવ્યા, રાજુલાનો વીડિયો વાયરલ

• વન વિભાગની બેદરકારી સામે આવી
• વાવાઝોડાના ખતરા વચ્ચે 5 સિંહ દરિયા કાંઠે
• વન્યજીવોની સુરક્ષામાં ગંભીર બેદરકારી

બિપોરજોય વાવાઝોડાની દહેશત વચ્ચે રાજુલાના દરિયાકાંઠે સિંહ પરિવાર પહોંચતા વહીવટી તંત્ર અને વન વિભાગ પર અનેક સવાલો ઉઠી રહ્યા છે. સંભવિત વાવાઝોડાની આગાહી વચ્ચે સિંહોની સુરક્ષાનું ધ્યાન રાખતું વન વિભાગ ઘોર નિદ્રામાં હોય તેવું જોવા મળી રહ્યું છે. વાસ્તવમાં અમરેલી જિલ્લાના રાજુલા તાલુકાના કોવાયા નજીક દરિયાકાંઠે આવેલા શિવ મંદિર પરસરમાં પહોંચેલા સિંહ પરિવારનો વીડિયો વાયરલ થયો છે. 

શિવ મંદિરમાં પહોંચ્યો સિંહ પરિવાર
અમરેલી જિલ્લો સિંહનું ઘર મનાય છે અને સિંહો અહીં ઠેર-ઠેર આટાંફેરા મારતા નજરે પડે છે. ઘણીવાર સિંહોના વીડિયો પર સોશિલ મીડિયા પર વાયરલ થતાં રહે છે. આ વચ્ચે ફરી એકવાર સોશિયલ મીડિયા પર એક વીડિયો વાયરલ થયો છે. જેમાં સિંહોનું ટોળું દરિયાકાંઠે આવેલા શિવ મંદિર પરિસરમાં જોવા મળી રહ્યું છે. આ વીડિયો અમરેલી જિલ્લાના રાજુલાનો હોવાનું કહેવામાં આવી રહ્યું છે. રાજુલાના કોવાયા ગામ નજીક આવેલા શિવ મંદિરના પરિસરમાં સિંહ પરિવાર પહોંચ્યો હતો.

વીડિયો સોશિયલ મીડિયા પર વાયરલ 
વીડિયોમાં મંદિર પરિસરમાં એક વૃક્ષ નીચે સિંહ પરિવારને બેઠેલો જોઈ શકાય છે. કોઈ સ્થાનિક વ્યક્તિ દ્વારા આ વીડિયોને ઉતારીને સોશિયલ મીડિયા પર વાયરલ કરાયો હોય તેવું લાગી રહ્યું છે.