બનાસકાંઠા / થરાદ અને સાંચોર હાઇવે પર સ્કૂટર અને ટ્રક વચ્ચે મોતની ટક્કર, 4 યુવતીમાંથી 2 યુવતીને કાળ ભરખી ગયો

• બનાસકાંઠામાં અકસ્માતની વધુ એક ગોઝારી ઘટના
• થરાદ - સાંચોર હાઇવે પર સ્કૂટર અને ટ્રક વચ્ચે ધડાકાભેર અકસ્માત
• કાળમુખા ટ્રકની ઠોકરે 2 યુવતીઓને કાળ ભેટી ગયો

બનાસકાંઠામાં અકસ્માતની વધુ એક ગોઝારી ઘટના સામે આવતા હાહાકાર મચી ગયો છે. જેમાં થરાદ - સાંચોર હાઇવે પર સ્કૂટર અને ટ્રક વચ્ચે ધડાકાભેર અકસ્માત સર્જાયો હતો. આ વેળાએ કાળમુખા ટ્રકની ઠોકરે 2 યુવતીઓને કાળ ભેટી ગયો હોવાનું સામે આવ્યું છે. જેને લઈને પરિવારજનોમાં કાળો કલ્પાંત ફેલાયો છે.  

 2 યુવતી કાળનો કોળિયો બની ગઈ

અકસ્માતની આ ઘટના મામલે જાણવા મળતી પ્રાથમિક વિગત અનુસાર દૂધવા નજીક સ્કૂટર પર સવાર 4 યુવતીઓ સવાર થઈ હતી. આ વેળાએ ટ્રક ચાલકે સ્ટેરિંગ પરનો કાબૂ ગુમાવી દઇ અડફેટે લેતા 2 યુવતી કાળનો કોળિયો બની ગઈ હતી. જ્યારે 2 ને ગંભીર ઇજા થતાં તેઓને સારવાર અર્થે તાબડતોબ હોસ્પિટલ ખસેડવામાં આવી હતી. આ ઘટનાને લઈને બનાવસ્થળે લોકોના ટોળાં એકઠા થયા હતા. ઘટનામા મોતને ભેટનાર 2 યુવતીઓના મૃતદેહને પીએમ અર્થે થરાદ હોસ્પિટલ ખસેડાયા હતા. તો અકસ્માતની ઘટનાને લઈ સ્થાનિક પોલીસ કાફલો પણ ઘટનાસ્થળે દોડી ગયો હતો. જ્યા વધુ તપાસ હાથ ધરી હતી.

અન્ય એક અકસ્માતમાં 3 લોકોના મૃત્યુ થયા
બનાસકાંઠા જિલ્લામાં વધુ એક ભયંકર અકસ્માત સર્જાયો હતો. જેમાં દારુની ગાડીનો પીછો કરતી વખતે ગમખ્વાર અકસ્માત સર્જાતા 3 લોકોના મૃત્યુ થયા હતા. જ્યારે 4 લોકો ઈજાગ્રસ્ત થયા હતા. બનાસકાંઠાના ધાનેરામાં કાર પલટી મારી જતા 3 લોકોના મૃત્યુ નિપજ્યાં છે. પોલીસ જ્યારે દારૂ ભરેલી ગાડીનો પીછો કરી રહી હતી, તે વખતે આ ઘટના બની હોવાની ચર્ચા ચાલી રહી છે. આ દુર્ઘટનામાં કારમાં સવાર 3 પોલીસના બાતમીદારના મૃત્યુ થયા હતા. જ્યારે અકસ્માતમાં 4 પોલીસકર્મીને ઈજા પહોંચી હતી. કાર 3 દુકાનના શટર તોડી ડિવાઈડર સાથે ટકરાઈ હતી. ચોર પરબડીથી દારૂની ગાડીનો પીછો કરતી વખતે કારા પલટી મારી ગઈ હોવાનું સામે આવ્યું હતું.