નિર્ણય / સતત વધતાં કોરોના કહેર વચ્ચે પ.બંગાળમાં PM મોદીની રેલી માટે લેવાયો મોટો નિર્ણય

• પીએમ મોદીની સભામાં ઓછા લોકોને ભેગા કરાશે 
• વિવિધ જગ્યાઓ પર મોટી સ્ક્રીન લગાવવામાં આવશે 
• 23મી એપ્રિલે ચાર રેલીઓનો છે પીએમ મોદીનો કાર્યક્રમ 

શહેર શહેર કોરોનાનો કહેર અને બંગાળમાં લીલાલહેર 

ભારતમાં કોરોના વાયરસના કારણે સતત કેસ વધી રહ્યા છે ત્યારે પશ્ચિમ બંગાળમાં વિવિધ રાજકીય પાર્ટીઓ દ્વારા ધૂમ પ્રચાર કરવામાં આવી રહ્યો છે અને ભારે ભીડ કરવામાં આવી રહી છે ત્યારે રાહુલ ગાંધીએ પોતાની બધી જ સભાઑને રદ કરી નાંખી અને મમતા બેનર્જીએ પણ કોલકાતામાં રેલી નહીં કરવાનો નિર્ણય કર્યો છે ત્યારે ભાજપ દ્વારા હજુ સુધી આ મુદ્દે કોઈ મોટો નિર્ણય લેવામાં આવ્યો નથી. આટલું જ નહીં 23મી એપ્રિલે પીએમ મોદી 4 રેલી કરવાના છે. 

પીએમ મોદીની ચાર રેલીઓનો કાર્યક્રમ 

પ્રધાનમંત્રી મોદીની માલદા, મુરશીદાબાદ, સિવલી અને દક્ષિણ કોલકાતામાં ચાર રેલી થવાની છે, જોકે હવે ભાજપ દ્વારા નિર્ણય લેવામાં આવ્યો છે કે આખા જિલ્લાના લોકોને એક જગ્યાએ ભેગા કરવામાં આવશે નહીં. દરેક વિધાનસભામાં પ્રધાનમંત્રી મોદીના ભાષણને સાંભળવા માટે મોટી મોટી સ્ક્રીન લગાવવામાં આવશે. રેલી સ્થળ પર ઓછા લોકો પહોંચશે જેથી સોશ્યલ ડિસ્ટન્સનું પાલન કરાવી શકાય. 

રાહુલ ગાંધીનો મોટો નિર્ણય 

દેશભરમાં સોશ્યલ મીડિયામાં લોકો આ રેલીઓ સામે અવાજ ઉઠાવી રહ્યા છે ત્યારે કોંગ્રેસ નેતા રાહુલ ગાંધીએ પોતાની આગામી બધી જ રેલીઓને રદ્દ કરવાનો નિર્ણય કર્યો છે. રાહુલ ગાંધીએ ટ્વિટ કરીને કહ્યું કે કોરોના વાયરસની પરિસ્થિતિને જોતાં, હું બંગાળમાં આગામી બધી જ રેલીઓને રદ્દ કરું છું. બધી જ રાજકીય પાર્ટીઓના નેતાઑને પણ વર્તમાન પરિસ્થિતિને જોતાં અપીલ કરું છું કે મોટી જાહેરસભાઑ ન કરે. 

કોલકાતામાં પ્રચાર નહીં કરે મમતા બેનર્જી 

ટીએમસી સાંસદ ડેરેક ઓ બ્રાયને ટ્વિટ કરીને માહિતી આપી છેકે, મમતા બેનર્જી હવે કોલકાતામાં ચૂંટણી પ્રચાર નહીં કરે. ડેરેક ઓ બ્રાયને ટ્વિટ કર્યું, બંગાળ ચૂંટણીને લઇને મુખ્યમંત્રી મમતા બેનર્જી હવે કોલકાતામાં પ્રચાર નહીં કરે. તેઓ પ્રતિકાત્મક રીતે શહેરમાં ચૂંટણી પ્રચારના અંતિમ દિવસે માત્ર એક બેઠક કરશે. બાકીના તમામ જિલ્લાઓમાં પણ તેમણે ચૂંટણી રેલીઓનો સમય ઘટાડી દીધો છે. હવે તેઓ માત્ર 30 મિનિટ જ રેલી કરશે.