જળસંકટ / પાણીથી ત્રસ્ત દક્ષિણ ગુજરાત, 1500ની વસતી ધરાવતાં આ ગામનો નીર માટે પોકાર

vtvAdmin

Last Updated: 10:27 PM, 7 May 2019

FOLLOW ON

શેર કરો

દક્ષિણ ગુજરાતમાં પાણીની તીવ્ર તંગી પ્રવર્તી રહી છે. 1500ની વસતી ધરાવતાં ઉમરપાડા તાલુકાનું ચિતલદા ગામ પાણીની સમસ્યાથી ત્રસ્ત છે. ગામનાં હેન્ડપંપ અને ટાંકીઓમાં પાણી નથી. તો માત્ર એક ટેન્કરનાં ભરોસે આ ગામ જીવી રહ્યું છે. જળ માટે તરસતો આ વિસ્તાર છે ઉમરપાડા. ઉમરપાડાનું ચિતલદા ગામ કે જ્યાં સુકી ધરતી અને પાણીનાં પોકાર થઇ રહ્યાં છે.

1500ની વસતી ધરાવતું આ ગામ પાણી માટે આજે વલખાં મારે છે. એમ તો આ ગામમાં 30થી વધુ હેન્ડપંપ છે અને પાણીનાં ટાંકા છે. પરંતુ પાણીનાં નામે માત્ર તરસ જ છે. જમીનનાં તળ સૂકાઈ જવાથી હેન્ડપંપ નકામા થઈ ગયાં છે. તો પાણી જ નથી મળતું ત્યારે પાણીનાં ટાંકામાં પાણી ક્યાંથી ભરવું. એટલે આખું ગામ એક ટેન્કરને ભરોસે જીવી રહ્યું છે.

ગામની પીવાના પાણી માટે વિકટ બનેલી પરિસ્થિતિને પહોંચી વળવા ગ્રામપંચાયત દ્વારા હાલ તો ટેન્કરનાં સહારે પાણી પૂરું પાડવાની કોશિશ કરવામાં આવી રહી છે પરંતુ 1500ની વસ્તી સામે એક ટેન્કર પાણી પૂરું નથી પડી રહ્યું. આખા ગામની મહિલાઓ ધોમધખતા તાપમાં ટેન્કરની રાહ જોવી પડે છે કેમ કે આ ટેન્કર અન્ય ગામોને પણ પાણી પૂરું પાડતું હોઈ ગામમાં કયારે આવે નક્કી નથી હોતું. બીજી તરફ ગામનાં વોટર શેડ યોજના હેઠળ 9 જેટલાં ટાંકા પણ મુકવામાં આવ્યાં છે અને ઘરે-ઘરે નળ પણ લગાવવામાં આવ્યાં છે. પરંતુ પાણી કોઈનાં ઘર સુધી નથી પહોંચી રહ્યું.

આ વિસ્તારનાં લોકોનો મુખ્ય વ્યવસાય પશુપાલન તેમજ ખેતી છે. એક તરફ આ વિસ્તારમાં કેનાલ સુવિધા નથી. તો બીજી તરફ નદી નાળા અને બોર સુકાઈ જતાં હાલ ખેતી માટે પાણીનો કોઈ વિકલ્પ નથી. મુંગા પશુઓની હાલત પણ કફોડી છે. આમ, ઉનાળાનાં પ્રારંભે જ પાણી-પાણીનાં પોકાર પાડતાં ઉમરપાડાનાં આ વિસ્તારની સમસ્યા સરકારને પણ સંભળાતી નથી. ઉનાળો જેમ જેમ આગળ વધી રહ્યો છે તેમ તેમ ગ્રામજનોની મુશ્કેલી ઓર વધી રહી છે.

;