સુરત / VNSGU ફરી વિવાદમાં: હિન્દુ સ્ટડીઝના કો-ઓર્ડિનેટરે વિદ્યાર્થી બનીને પરીક્ષા આપ્યાનો આક્ષેપ, યુનિ.એ કહ્યું ખોટું હશે તો

• વીર નર્મદ દક્ષિણ ગુજરાત યુનિવર્સિટી વધુ એક વિવાદમાં
• હિન્દુ સ્ટડીઝના કો-ઓર્ડીનેટર બાલાજી જાધવર સામે આરોપ
• વિદ્યાર્થી બનીને સેમેસ્ટર-1 ની પરીક્ષા આપ્યાનો આક્ષેપ
• કુલપતિને લેખિત ફરિયાદ કરતા મામલો આવ્યો સામે

અવાર નવાર વિવાદોમાં રહેતી દક્ષિણ ગુજરાતની વીર નર્મદ યુનિવર્સિટી ફરી વિવાદમાં આવી છે. આ વખતે યુનિવર્સિટીના હિન્દુ સ્ટડીઝના કો-ઓર્ડિનેટર સામે આક્ષેપ લાગ્યો છે. યુનિવર્સિર્ટીના હિન્દુ સ્ટડિઝના કો-ઓર્ડિનેટરે જ વિદ્યાર્થી બનીને પરીક્ષા આપતા વિવાદ થયો છે. આ મામલે યુનિવર્સિટીના કુલપતિ ડૉ કે.એન ચાવડાએ કહ્યું છે કે, આ અંગે પૂરતી તપાસ કરવામાં આવશે અને તેના આધારે શિક્ષણના હિતમાં જ યોગ્ય નિર્ણય લેવામાં આવશે.

ફરિયાદીએ કુલપતિને કરી લેખિત ફરિયાદ
વાસ્તવમાં નિલેષ બારોટ નામના ફરિયાદીએ કુલપતિને લેખિતમાં ફરિયાદ કરી છે. તેમણે ફરિયાદમાં જણાવ્યું છે કે, યુનિવર્સિટીના હિન્દુ સ્ટડીઝ વિભાગના કો-ઓર્ડિનેટર બાલાજી જાધવરે એમ.એના વિદ્યાર્થી તરીકે સેમેસ્ટર-1ની પરીક્ષા આપી હતી. આ પરીક્ષામાં તેઓ ડિસ્ટીક્શન સાથે પાસ થયા છે. કો-ઓર્ડિનેટરે ખુદ પરીક્ષા આપી હોય અને ડિસ્ટીક્શન આવ્યો હોય આ યુનિવર્સિટીની પારદર્શિતા માટે ખૂબ જ ગંભીર બાબત ગણી શકાય છે. 

આ મામલે થવી જોઈએ તપાસઃ ફરિયાદી 
તેમણે ફરિયાદમાં જણાવ્યું છે કે, કો-ઓર્ડિનેટર હોવાથી વિભાગની તમામ જવાબદારી તેમની હોય છે. જો વિદ્યાર્થી તરીકે પરીક્ષા આપવી હોય તો કર્મચારી અધિકારીએ પરવાનગી લેવી જરૂરી છે. તે લીધી છે કે કેમ તેની તપાસ થવી જોઇએ.

મેં ઉપરી અધિકારીને જાણ કરીને જ શરૂ કર્યો છે અભ્યાસઃ કો-ઓર્ડિનેટર
આ વિવાદે અંગે  બાલાજી જાધવરનું નિવેદન પણ સામે આવ્યું છે. તેમણે જણાવ્યું કે, 'મેં નોકરી પૂરી થયા પછીના સમય દરમિયાન અભ્યાસ કર્યો છે. મારી નોકરીનો સમય સાંજના 6 વાગ્યા સુધીનો જ છે અને મારો અભ્યાસનો સમય સાંજના 6થી 9નો છે.'  કો-ઓર્ડિનેટર બાલાજી જાધવરે વધુમાં જણાવ્યું કે,  'હું પેપર સેટિંગ, ટીચિંગ સાથે સંકળાયેલો નથી. ભણાવવા માટે વિઝીટીંગ ફેકલ્ટી આવે છે. ઉપરી અધિકારીને જાણ કરીને જ અભ્યાસ શરૂ કર્યો છે.'

ચાલી રહી છે તપાસઃ કુલપતિ
આક્ષેપ પ્રતિ-આક્ષેપોના પગલે યુનિવર્સિટીના કુલપતિનું પણ નિવેદન સામે આવ્યું છે.   યુનિવર્સિટીના કુલપતિ ડૉ કે.એન ચાવડાએ કહ્યું છે કે,  આ મામલે અમને ફરિયાદ મળી છે. ફરિયાદ અંગે હાલ તપાસ ચાલી રહી છે. તપાસ પૂરી થયા બાદ શિક્ષિણના હિતમાં યોગ્ય નિર્ણય લેવામાં આવશે. ખોટું થયું હશે તો કાર્યવાહી થશે.