109 કરોડની કરચોરી / અંતે ફરાર ઊંઝા APMCના ડિરેક્ટર સંજય પટેલ ઝડપાયો, કરચોરીની રીત જાણીને GST વિભાગ ચકડોળે ચડ્યું

• ઊંઝામાં કરોડોની મસમોટી GST કરચોરીનો પર્દાફાશ
• ઊંઝા APMCના ડિરેકટર શંકર પટેલ સહિત 4ની ધરપકડ
• સરકારને ચુનો લગાવવાનું કૌભાંડ ઝડપાયુ 

રૂપિયા 109 કરોડના બોગસ બિલિંગ કૌભાંડ મામલે સ્ટેટ GST દ્વારા ઊંઝામાં મોટી કાર્યવાહી કરવામાં આવી છે. ઊંઝા APMCના ડિરેક્ટર મુખ્ય આરોપી સંજય પટેલની ધરપકડ કરાઈ છે. અત્યાર સુધીમાં કુલ પાંચ વ્યકિતની ધરપકડ કરાઈ છે. રૂપિયા 21.41 કરોડની કરચોરી મળી આવી છે અને અત્યાર સુધીમાં 365 કરોડનું ટર્નઓવર કર્યુ છે. શંકર પટેલ લાંબા સમયથી બોગસ પેઢીઓ ઉભી કરી સરકારને ચૂનો લગાવતો હતો. ખોટા ઇ-વે બિલ અને ખોટી પેઢીઓ ઉભી કરવાના રેકેટમાં મુખ્ય સૂત્રધાર છે. ત્યારે રવિવારે સંજય ઉર્ફે શંકર પટેલની ધરપકડ કરાઈ છે.

ડ્રાઇવર, ખેતમજૂર, પાન મસાલાના ગલ્લા ચલાવનારાઓના દસ્તાવેજના આધારે બોગસ પેઢી ઉભી કરી

થોડા દિવસ પેહલા GST વિભાગને જીરાની કોમોડીટીમાં આર્થિક રીતે નબળા અને જરૂરીયાતમંદ લોકોના દસ્તાવેજોનો દુરૂપયોગ કરીને બોગસ પેઢીઓ ઉભી કરી આ બોગસ પેઢીઓના ઇ-વે બિલ જનરેટ કરી, ભરવાપાત્ર GST ન ભરવાની મોડસ ઓપરેન્ડી ધ્યાનમાં આવી હતી. જેને લઇને હાલમાં વિભાગ દ્વારા ઊંઝામાં અલગ અલગ પેઢીઓમાં તપાસ હાથ ધરવામાં આવી હતી. આ તપાસમાં નજીવી આવક ધરાવતા લોકો જેવા કે ડ્રાઇવર, ખેતમજુરો, ગટર સાફ સફાઇવાળા, ન્યૂઝ પેપર ડીલીવરીમેન, પાન મસાલાના ગલ્લા ચલાવનારાઓને દસ્તાવેજોનો નાણાકીય પ્રલોભન આપી દુરૂપયોગ કરવામાં આવ્યો હતો. આવા લોકોના નામે સંખ્યાબંધ પેઢીઓ ઉભી કરીને આ પેઢીઓનો માલ સપ્લાયના બીલો ઇશ્યુ કર્યા હતા. આ સિવાય ઇ-વે બીલો ઇશ્યુ કરી, ઇ-વે બીલના આધારે માલ સપ્લાય કરી, તેના પર ભરવાપાત્ર વેરાની કરચોરી કરી હતી.

આમ, આવી રીતે અનેક પેઢીઓ દ્વારા રૂપિયા 109.97 કરોડના ઇ-વે બીલ જનરેટ કરી અત્યાર સુધીમાં તપાસ મુજબ રૂપિયા 6.31 કરોડની કરચોરી કરવામાં આવી છે. 

કૌભાંડનો મુખ્ય સૂત્રધાર અને માથાભારે સંજય પટેલ(શંકર) ફરાર હતો

આ કૌભાંડમાં અત્યાર સુધીમાં ઊંઝાના હિરેન મોહનલાલ પટેલ, સંજય પ્રહલાદ પટેલ અને અમીત રમેશભાઇ પટેલની ધરપકડ કરવામાં આવી છે. આ કૌભાંડના મુખ્ય સુત્રધાર અને માથાભારે છબી ધરાવતા મહેસાણાના સંજય મફતભાઇ પટેલ ઉર્ફે શંકર છે. ત્રણ આરોપીઓની ધરપકડ બાદ શંકર પટેલ ફરાર હતો. ત્યારબાદ વોટ્સએપ કોલ કરીને મહિલા તપાસ અધિકારીને ધમકી આપી હતી કે, તપાસ સ્થેળી તાત્કાલિક રવાના થઇ જાઓ નહીં તો જોવા જેવી થશે. ત્યારે આ ધમકી મામલે પણ ગુનો નોંધવામાં આવ્યો હતો. 

આબુ રોડ પર આવેલી હોટલમાંથી પોલીસે ઝડપી પાડ્યો

જોકે આરોપી શંકર પટેલ અલગ અલગ સ્થળોએ નાસતો ફરતો હતો. તે વોટ્સએપ કોલીંગથી પોતાના પરિવારના સંપર્કમાં રહેતો હતો. ઇન્ટેલિજન્સ ટીમના પ્રયાસથી સંજય પટેલ(શંકર પટેલ)ની આબુ રોડ ખાતેની સિલ્વર ઓક કંટ્રી યાર્ડ હોટલમાંથી મહેસાણા પોલીસની મદદથી ઝડપી લેવાયો હતો.