- SOGએ ૧૧.૮૨ લાખના MD ડ્રગ્સ સાથે ત્રણ શખ્સની ધરપકડ કરી
- મુંબઇ બાદ હવે રાજસ્થાનથી એમડી ડ્રગ્સની ડિલિવરી
- બે સગા ભાઇ સહિત ત્રણ શખ્સોની ધરપકડ કરી
અમદાવાદ સહિત ગુજરાતમાં ડ્રગ્સનું દૂષણ એટલી હદે વધી ગયું છે કે યુવાપેઢીને બરબાદીના રસ્તે લઈ જઈ રહ્યું છે. અમદાવાદમાં એમડી સિવાય અન્ય ડ્રગ્સ લેવાનો ક્રેઝ એટલો વધી ગયો છે કે યુવાઓ નશેડીમાંથી પેડલર બની ગયા છે. ગુજરાતને ડ્રગ્સ માફિયાએ એપી સેન્ટર બનાવી દીધું છે ત્યારે ડ્રગ્સના દૂષણને ડામવા માટે સ્થાનિક પોલીસ, ક્રાઇમ બ્રાંચ, એટીએસ સહિતની સુરક્ષા એજન્સીઓ સતર્ક થઇ ગઇ છે. ડ્રગ્સ માફિયાઓએ બનાવેલી માયાજાળને પોલીસ એજન્સીઓ ક્રેક કરીને પેડલરથી લઇને માફિયા સુધી પહોંચી રહી છે. ગઇ કાલે સ્પેશિયલ ઓપરેશન ગ્રૂપ (એસઓજી)ની ટીમે ઇન્દિરાબ્રિજ સર્કલ પાસેથી ૧૧.૮૨ લાખ રૂપિયાના એમડી ડ્રગ્સના જથ્થા સાથે બે સગા ભાઇ સહિત ત્રણ શખ્સોની ધરપકડ કરી છે. ત્રણેય શખ્સ રાજસ્થાનથી એમડી ડ્રગ્સ લઇને આવી રહ્યા હતા જ્યાં તેમને અમદાવાદમાં એન્ટ્રી મારે તે પહેલાં દબોચી લેવામાં આવ્યા છે.
એસઓજીની ટીમે એફએસએલની ટીમને જાણ કરી
એસઓજીની ટીમને બાતમી મળી હતી કે કુબેરનગર વિસ્તારમાં આવેલા બી વોર્ડમાં રહેતા હિમેશ ગારંગે અને તેનો ભાઇ મોનેશ ગારંગે રાજસ્થાન એમડી ડ્રગ્સનો જથ્થો લેવા માટે ગયા અને તેમની સાથે તેમનો સાગરીત ચાણક્ય ઉર્ફે રાજા પણ ડ્રાઇવર બનીને ગયો છે. એસઓજીની ટીમ પાસે કારનો નંબર હોવાથી તે બાતમીના આધારે ઇન્દિરાબ્રિજ સર્કલ પાસે પહોંચી ગઈ અને બેરિકેડ મૂકીને વોચમાં હતી. દરમિયાનમાં કાર ઇન્દિરાબ્રિજ સર્કલ પાસે આવી પહોંચતા એસઓજીની ટીમે તેને કોર્ડન કરી લીધી હતી. કાર કોર્ડન કરતાં એસઓજીએ હિમેશ, મોનેશ અને ચાણક્યની અટકાયત કરી લીધી હતી અને બાદમાં તેમની જડતી કરી હતી. બંને ભાઇ પાસેથી વ્હાઇટ પાઉડર ઝિપ બેગમાં મળી આવ્યો હતો. જેથી એસઓજીની ટીમે એફએસએલની ટીમને જાણ કરી દીધી હતી.
એફએસએલની ટીમ ઘટના સ્થળે પહોંચી ગઇ હતી જ્યા તેમણે ટ્રાફિક બીટ ચોકીમાં જઇને વ્હાઇટ પાઉડરનું પરીક્ષણ કર્યું હતું અને તે એમડી ડ્રગ્સ હોવાનો રિપોર્ટ આપ્યો હતો. એમડી ડ્રગ્સ હોવાનું પુરવાર થતાં એસઓજીની ટીમે તેમની ધરપકડ કરી લીધી હતી અને આગવી સ્ટાઇલથી પૂછપરછ કરી હતી. બંને ભાઇ રાજસ્થાનના ડ્રગ્સ માફિયા અજય ગહેલોત પાસે એમડી ડ્રગ્સનો જથ્થો લેવા માટે ગયા હતા. એસઓજીએ ક્રાઇમ બ્રાંચમાં બે ભાઇ સહિત ચાર શખ્સો વિરુદ્ધ ગુનો દાખલ કર્યો છે અને તપાસનો ધમધમાટ શરૂ કર્યો છે. ઉલ્લેખનીય છેકે કુબેરનગરમાં દારૂનું સૌથી વધુ વેચાણ થઇ રહ્યું છે ત્યારે હવે ડ્રગ્સનો પણ પગપેસારો થયો છે.
મુંબઇ બાદ હવે રાજસ્થાનથી એમડી ડ્રગ્સની ડિલિવરી
અમદાવાદ પોલીસ, ક્રાઇમ બ્રાંચ, એટીએસ સહિતની સુરક્ષા એજન્સીઓએ એમડી ડ્રગ્સના નેટવર્કનો જ્યારે પણ પર્દાફાશ કર્યો છે ત્યારે મુંબઇના ડ્રગ્સ માફિયાઓનાં નામ દરેક વખતે સામે આવ્યાં છે. એમડી ડ્રગ્સની વેચવાની શરૂઆત મુંબઇથી થઇ અને અમદાવાદ સુધી પહોંચી છે ત્યારે હવે રાજસ્થાન પર ચર્ચામાં આવી રહ્યું છે. અમદાવાદના ડ્રગ્સ માફિયા હવે મુંબઇથી એમડી ડ્રગ્સ મંગાવવાની જગ્યાએ રાજસ્થાનથી મંગાવી રહ્યા હોવાનો ઘટસ્ફોટ મોડી રાતે ક્રાઇમ બ્રાંચની ટીમે કર્યો છે. ઉલ્લેખનીય છે કે થોડા દિવસ પહેલાં એસઓજીની ટીમે દાણીલીમડા વિસ્તારમાંથી એમડી ડ્રગ્સના જથ્થા સાથે બે શખ્સની ધરપકડ કરી લીધી હતી. એસઓજીની પૂછપરછમાં સામે આવ્યું હતું કે રાજસ્થાનના ઉદયપુરથી બંને શખ્સ એમડી ડ્રગ્સ લઇને આવ્યા હતા.
