પૈસા માટે મૃત બાળકીને કલાકો સુધી સારવારનું નાટક કર્યું
PMJAY યોજના અંતર્ગત બિલ પાસ કરાવવાનું કૌભાંડ
હિંમતનગરની મેડિસ્ટાર હોસ્પિટલમાં PMJAY યોજના અંતર્ગત બિલ પાસ કરાવવાનું મસમોટું કૌભાંડ સામે આવ્યું છે. હોસ્પિટલ દ્વારા બિલ પાસ કરાવવા કલાકો સુધી મૃત બાળકીની સારવારનું નાટક કર્યું. જોકે ગાંધીનગર સ્ટેટ ટીમના સરપ્રાઈઝ ચેકિંગમાં હોસ્પિટલની કાળી કરતૂતનો ભાંડો ફૂટ્યો હતો. ઘટનાને પગલે IAS રેમ્યા મોહને હોસ્પિટલને PMJAY યોજનામાંથી બ્લેકલિસ્ટ કરી છે .સાથે જ હોસ્પિટલને રૂપિયા 14 લાખ 47 હજારનો દંડ પણ ફટકાર્યો છે.
હોસ્પિટલ સંચાલકનું નિવેદન
બ્લેક લિસ્ટ થયા બાદ હોસ્પિટલ સંચાલકનું નિવેદન સામે આવ્યું છે. તેમણે કહ્યું કે, અડધી રાત્રે કરાયેલી તપાસ તદ્દન ખોટી છે તેમજ કરાયેલા તમામ આક્ષેપો પાયા વિહોણા છે અને હોસ્પિટલની કામગીરી સામે ગાંધીનગર કક્ષાએ રજૂઆત કરાશે તેમજ મૃતકના પરિવારજનો પણ હોસ્પિટલની કામગીરીથી સહમત છે
નટુભાઈ પટેલ, મેડીસ્ટાર હોસ્પિટલ સંચાલક
આરોગ્ય મંત્રી ઋષિકેશ પટેલનું નિવેદન
સમગ્ર ઘટના મામલે રાજ્ય સરકારના પ્રવક્તા અને આરોગ્ય મંત્રી ઋષિકેશ પટેલનું નિવેદન પણ સામે આવ્યું છે .મંત્રી ઋષિકેશ પટેલે કહ્યું કે, આવી ઘટના સામે આવતા જ રાજ્ય સરકારે આ હોસ્પિટલને સસ્પેન્ડ કરી છે. આવી ઘટનાઓ પર સરકાર કડક હાથે કામ લઈ રહી છે. જોકે બીજી તરફ હોસ્પિટલ સંચાલકોએ તમામ આરોપોને ફગાવ્યા છે.
