મૃતદેહ / અમદાવાદના ઘાટલોડિયામાં 3 વ્યક્તિઓના મોત, ગેસ લીકેજને કારણે ગૂંગળામણથી મૃત્યુ થવાની આશંકા

અમદાવાદના ઘાટલોડિયામાં 3 વ્યક્તિઓના મોત, ગેસ લીકેજને કારણે ગૂંગળામણથી મૃત્યુ થવાની આશંકા

• ઘાટલોડિયામાં ગોપાલનગરની ફેકટરીમાંથી 3 મૃતદેહ મળ્યા 
• ગેસ લીકેજને કારણે ગૂંગળામણથી મૃત્યુ થવાની આશંકા
• ગુંગળામણથી મૃત્યુ થયાનો પ્રાથમિક અંદાજ: પોલીસ

અમદાવાદના ઘાટલોડિયા વિસ્તારમાં આજે 3 વ્યક્તિઓના મૃતદેહ મળવાથી શહેરમાં ખળભળાટ મચી ગયો હતો. આ ઘટનામાં ગેસ લીકેજથી ગૂંગળામણના કારણે મોત થયું હોવાની આશંકા છે. 

પોલીસ ઇન્સ્પેક્ટર વાય.આર વાઘેલાનું નિવેદન

આજે સવારે અમદાવાદમાં ત્રણ વ્યક્તિઓના મોતના માઠા સમાચાર આવ્યાં હતાં. ઘાટલોડિયા વિસ્તારમાં ગોપાલનગરની એક ફેક્ટરીમાં આ ઘટના બની હતી જેમાં પ્રાથમિક ધોરણે ગેસ લીકેજના કારણે ગૂંગળામણથી મોત થવાનું સામે આવી રહ્યું છે. 

15 વર્ષીય હસનનું પણ ઘટનામાં મૃત્યુ થયુ: પોલીસ

આ ઘટનામાં 21 વર્ષીય અસલમ, 45 વર્ષીય ઈબ્રાહિમ અને 15 વર્ષીય હસન નામના ત્રણ વ્યક્તિઓના કરુણ મોત નીપજ્યાં છે. મળતી માહિતી અનુસાર ઘાટલોડિયાના ગોપાલનગર વિસ્તારમાં પફ બનાવતી ફેક્ટરીમાં આ દુર્ઘટના સર્જાઈ હતી. રાજશ્રીબેન અંકુર પટેલ દ્વારા આ પફની ફેક્ટરી શરૂ કરાઈ હતી. 15 દિવસ પહેલા જ UK's ફૂડના નામે ફર્મ શરૂ કરી હતી. 

અકસ્માતે મોતનો ગુનો દાખલ કરવામાં આવ્યો છે: પોલીસ

ઘાટલોડિયાના PI વાય. આર વાઘેલાએ આ અકસ્માત વિશે જણાવતા કહ્યું હતું કે ઘટનામાં 3 વ્યક્તિના મૃત્યુ થયા છે અને હાલ તો ગૂંગળામણથી મોત થયા હોવાનું પ્રાથમિક અંદાજ પ્રમાણે માલૂમ પડી રહ્યું છે. પોલીસે કહ્યું હતું કે આ દુર્ઘટના ઘટી તે જગ્યા ભાડે લેવામાં આવેલી હતી. હાલમાં પોલીસે અકસ્માતે મોત થયા હોવાનો ગુનો દાખલ કરીને આગળની વધુ તપાસ હાથ ધરી છે.