સ્ટોક માર્કેટ / ગુજરાતની 5 કંપનીના IPOથી હચમચી ગયું માર્કેટ, માલામાલ થયા રોકાણકારો, જુઓ આખું લીસ્ટ

• ગુજરાતની કંપનીઓએ આપ્યું સારું વળતર 
• શેરબજારમાં હાલ ડાઉન ટ્રેન્ડ
• ઘણાં આઈપીઓએ આપ્યું બમણું વળતર 

ગુજરાતની કંપનીઓએ કર્યા માલામાલ 
શેરબજારમાં વિદેશી રોકાણકારોના વેચવાલીના કારણે આજકાલ રોકાણકારો ખુબ નિરાશ થયા છે. શેરના ભાવ ખુબ જ તૂટી રહ્યા છે. તાજેતરના ભૂતકાળમાં આઈપીઓ લઈને આવેલી તમામ કંપનીઓ તેમના ઇશ્યૂ પ્રાઇસથી નીચે ટ્રેડ કરી રહી છે. જેનું સૌથી મોટું ઉદાહરણ દેશની સૌથી મોટી વીમા કંપની એલઆઈસીનો આઈપીઓ છે, જેનો સ્ટોક લિસ્ટિંગ બાદ સતત ઘટી રહ્યો છે અને તેના ઈશ્યૂ પ્રાઈસથી 25 ટકાથી વધુ નીચે ટ્રેડ થઈ રહ્યો છે. પરંતુ બજારમાં આ ઘટાડા છતાં ગુજરાત સાથે સંકળાયેલી તમામ કંપનીઓએ આઈપીઓ લાવી એણે સારું પ્રદર્શન કર્યું છે. ગુજરાત સાથે સંકળાયેલી કંપનીઓ પર એક નજર કરીએ, જેનું તાજેતરમાં જ શેરબજારમાં લિસ્ટિંગ થયું છે અને આ કંપનીઓએ રોકાણકારોને સારું વળતર પણ આપ્યું છે.

અદાણી વિલ્મર આઈપીઓ
અદાણી ગ્રુપની કંપની અદાણી વિલ્મરને 8 ફેબ્રુઆરીએ સ્ટોક એક્સચેન્જમાં લિસ્ટિંગ કરવામાં આવ્યો હતો. કંપનીએ ઇશ્યૂ પ્રાઇસ 230 રૂપિયા નક્કી કરી હતી. અને હવે અદાણી વિલ્મરનો શેર 632 રૂપિયા પર ટ્રેડ થઈ રહ્યો છે. એટલે કે અદાણી વિલ્મરના આઈપીઓએ રોકાણકારોને 174 ટકા વળતર આપ્યું છે. અદાણી વિલ્મરનો શેર પણ રૂ.878 ના ટોપ ટોચ પર પહોચેલો છે.

રોલેક્સ રિંગ્સ આઈપીઓ
ગુજરાતની કંપની રોલેક્સ રિંગ પણ તાજેતરમાં જ પોતાનો આઈપીઓ લઈને આવી હતી. કંપનીએ 880થી 900 રૂપિયાની પ્રાઈઝ બેન્ડ નક્કી કરી હતી. લિસ્ટિંગ બાદ રોલેક્સ રિંગ 1624 રૂપિયાના સ્તર પર પહોંચી ગયો હતો. એટલે કે કંપનીએ રોકાણકારોને 80 ટકા રિટર્ન આપ્યું છે. હાલ આ શેર 1401 રૂપિયા એટલે કે તેના ઈશ્યૂ પ્રાઈસથી 60 ટકા ઉપર ટ્રેડ કરી રહ્યો છે.

તત્વ ચિંતન આઈપીઓ 
તત્વ ચિંતનનું લિસ્ટિંગ સ્ટોક એક્સચેન્જ પર ખુબ જ સરસ થયું હતું. 1083 ના ઇશ્યૂ પ્રાઇસનો સ્ટોક રૂ.2111ના ભાવે લિસ્ટ થયો હતો. કંપનીએ 2977 રૂપિયાના ઉચ્ચતમ સ્તરને પણ સ્પર્શ કર્યો છે. હાલ તત્વ ચિંતનના શેર 2197 રૂપિયા પર ટ્રેડ કરી રહ્યા છે. એટલે કે આઈપીઓએ તેના રોકાણકારોને 100 ટકાથી વધુ રિટર્ન આપ્યું છે.

અમી ઓર્ગેનિક્સનો આઈપીઓ
ગુજરાતની કંપની અમી ઓર્ગેનિક્સના આઈપીઓથી પણ રોકાણકારોને ફાયદો થયો છે. અમી ઓર્ગેનિક્સે ઇશ્યૂ પ્રાઇસ 610 રૂપિયા નક્કી કરી હતી. 910ના લિસ્ટિંગ બાદ શેર રૂ.1434 ની ઊંચી સપાટીએ પહોંચ્યો હતો. હાલ આ શેર 895 રૂપિયા પર ટ્રેડ કરી રહ્યો છે. એટલે કે તેના આઈપીઓના અપર બેન્ડથી 46 ટકા ઉપર છે.

એક્સારો ટાઇલ્સ આઇપીઓ
ગુજરાત સ્થિત કંપની એક્સારો ટાઇલ્સના આઇપીઓએ પણ તેના રોકાણકારોને પ્રભાવશાળી વળતર આપ્યું છે. કંપનીએ 118 થી 120 રૂપિયા ઈશ્યૂ પ્રાઇસ નક્કી કરી હતી. લિસ્ટિંગ 126  રૂપિયા પર હતું. બાદમાં એક્સારો ટાઇલ્સનો શેર 44 ટકા ઉછળીને રૂ.173ની નજીક પહોંચી ગયો હતો. હાલ આ શેર 112 રૂપિયા પર ટ્રેડ થઈ રહ્યો છે.