પડતા પર પાટું / મોહન રાઠવા બાદ વધુ એક દિગ્ગજ નેતાએ છોડ્યો કોંગ્રેસનો 'હાથ', સાંજ સુધીમાં ધારણ કરશે કેસરિયો

• વિધાનસભા ચૂંટણી પહેલા કોંગ્રેસને વધુ એક ઝટકો
• કોંગ્રેસના વધુ એક ધારાસભ્યનું રાજીનામું
• તાલાલાના ધારાસભ્ય ભગવાન બારડે આપ્યું રાજીનામું

ગુજરાત વિધાનસભાની ચૂંટણીને લઇને પક્ષ પલટાની મોસમ બરાબરની જામી છે. પોત-પોતાના પક્ષથી નારાજ નેતાઓ પાટલી બદલી રહ્યા છે. તેવામાં કોંગ્રેસ માટે વધુ એક માઠા સમાચાર સામે આવ્યા છે. વિધાનસભાની ચૂંટણી પહેલા કોંગ્રેસના વધુ એક ધારાસભ્યએ કોંગ્રેસનો હાથ છોડ્યો છે.  તાલાલાના કોંગ્રેસના ધારાસભ્ય ભગવાન બારડે કોંગ્રેસમાંથી રાજીનામું આપ્યું છે.

ભગવાન બારડે સમાજના આગેવાનો સાથે કરી હતી બેઠક
સૂત્રોના જણાવ્યા અનુસાર, કોંગ્રેસના ધારાસભ્ય મોહન રાઠવા બાદ તાલાલાના કોંગ્રેસના ધારાસભ્ય ભગવાન બારડે રાજીનામું આપી દીધું છે. કોંગ્રેસના આ કદાવર નેતા છેલ્લા ઘણા સમયથી કોંગ્રેસથી નારાજ હોવાનું પણ જાણવા મળી રહ્યું છે. તેઓ આજે કમલમમાં સત્તાવાર રીતે ભાજપમાં જોડાશે. મહત્વનું છે કે, ગઈકાલે બાદલપરામાં ભગવાન બારડે સમાજના આગેવાનો સાથે બેઠક યોજી હતી. ભગવાન બારડે યોજેલી બેઠકમાં ભાજપમાં જોડાવા અંગે ચર્ચા થઈ હતી.

મોહન રાઠવા જોડાયા ભાજપમાં
આપને  જણાવી દઈએ કે, ગતરોજ કોંગ્રેસના ધારાસભ્ય મોહન રાઠવાએ રાજીનામું આપ્યું હતું. તેઓએ ગઈકાલે સાંજે જ કમલમ ખાતે ભાજપનો ખેસ ધારણ કરી લીધો હતો.   મોહન રાઠવા સૌથી વધુ વખત ધારાસભ્ય બનવાનો રેકોર્ડ ધરાવે છે. ગતરોજ કમલમ ખાતે તેઓએ પોતાના સમર્થકો સાથે ભાજપનો ખેસ ધારણ કર્યો હતો. 

કોણ છે ભગવાન બારડ?
- ભગવાન બારડ તલાલાથી ચૂંટાઈને આવ્યા હતા. 
- બારડ સૌરાષ્ટ્ર આહીર સમાજના અગ્રણી એવા પૂર્વ સાંસદ સ્વ.જશુભાઈ બારડના ભાઈ થાય છે. 
- તેમનો પરિવાર વર્ષોથી કોંગ્રેસ સાથે જોડાયેલો છે. 
- સ્વ.જશુભાઈ અને ભગવાનભાઈ બારડના પિતાજી ધાનાભાઈ માંડાભાઈ બારડ કોંગ્રેસી આગેવાન હતા. 
- છેલ્લા ઘણા સમયથી વાતો ચાલી રહી છે કે કોંગ્રેસ છોડી રહ્યા છે ત્યારે આજે તેઓએ રાજીનામું ધરી દીધું છે