પર્દાફાશ / સુરતીઓ હવે સેનિટાઇઝર અને હેન્ડ વોશ ખરીદતા પહેલા ચેતી જજો! ફૂડ એન્ડ ડ્રગ વિભાગે કરી કાર્યવાહી

• સ્વાસ્થ્ય સાથે ચેડા કરનારાઓના ધંધાનો પર્દાફાશ
• ફૂડ એન્ડ ડ્રગ વિભાગે કરી કાર્યવાહી
• 13 લાખની કિંમતના સેનિટાઇઝર જપ્ત કરાયા 

સુરતમાં બનાવટી લાયસન્સ અને ખોટા સર્ટીફીકેટ ધરાવનાર  હેન્ડ સેનિટાઇઝર અને હેન્ડ વોશના ઉત્પાદકો સામે ફુડ એન્ડ ડ્રગ્સ વિભાગની કડક કાર્યવાહી કરી છે. ફૂડ એન્ડ ડ્રગ વિભાગે રૂપિયા 13 લાખની કિંમતના નકલી સેનિટાઇઝર જપ્ત કર્યા છે. નકલી બનાવટો, કાચા દ્રવ્યો, પેકિંગ મટીરિયલ અને મશિનરીનો જથ્થો જપ્ત કરવામાં આવ્યો છે. ફર્સ્ટ ક્લાસ હેન્ડવોશ, ફર્સ્ટક્લાસ સેનેટાઇઝર, જે.પી ફર્સ્ટ ક્લાસ હેન્ડ રબ,આરૂશ હેન્ડ સેનેટાઇઝર જપ્ત કર્યા છે. ત્યારે હવે કોને કોને વેચાણ કર્યુ અને આલ્કોહોલ ક્યાંથી મેળવ્યું તેની તપાસ શરૂ કરવામાં આવી છે.

હેન્ડ સેનિટાઈઝર અને હેન્‍ડ વોશ વગેરે નકલી બનાવટો ઝડપાયા

ફૂડ એન્ડ ડ્રગ વિભાગના કમિશનરશ્રી ડૉ.એચ.જી.કોશિયાએ જણાવ્યું હતું કે, સુરત જિલ્લાના ઓલપાડ તાલુકામાં મે. જે. પી. પેઇન્‍ટસ એન્ડ કેમીકલ, પ્લોટ નં. 7, 8, ગ્રાઉન્‍ડ ફ્લોર, સ્વાગત ઇન્‍ડસ્ટ્રીયલ એસ્ટેટ પર સુરતના ડ્રગ્સ વિભાગના અધિકારીઓએ રેડ કરી હતી. આ દરમિયાન અલગ-અલગ બેચના જુદા જુદા પેકીંગ વાળા 'ફર્સ્ટ ક્લાસ હેન્ડ વોશ, ફર્સ્ટ ક્લાસ હેન્ડ સેનીટાઇઝર, જે.પી. ફર્સ્ટ ક્લાસ હેન્ડ રબ, આરુશ હેન્ડ સેનીટાઇઝર' બ્રાન્ડનેમ વાળા હેન્ડ સેનિટાઈઝર અને હેન્‍ડ વોશ વગેરે નકલી બનાવટો પકડી છે. જેના નિયમિત નમૂના લઇ બાકીની બનાવટો, કાચા દ્રવ્યો, પેકીંગ મટીરીયલ તેમજ મશીનરીનો જથ્થો વધુ કાર્યવાહી માટે જપ્ત કરવામા આવ્યો છે.

ગોડાઉનમાંથી 10,000 લીટર સેનીટાઇઝર બનાવવા માટેનું પ્રવાહી સહિતની સામગ્રી ઝડપાઇ

વધુમાં તેમણે જણાવ્યુ હતું કે, રેડ દરમિયાન માલિક યોગેશભાઇ ફુલવાણીએ કબૂલ કરેલ છે કે તેઓ આ ગેરકાયદેસર ઉત્પાદન વગર પરવાને શરૂ કરી કોઇપણ જાતના ટેસ્ટીંગ કર્યા વગર ટુંકાગાળામાં વધુ પૈસા મેળવી લેવાની લાલચથી હેન્ડ સેનીટાઇઝર તથા હેન્ડ વોશનું વિપુલ પ્રમાણમાં ઉત્પાદન કરી વેચાણ કર્યુ છે અને તેમના ગોડાઉનમાંથી 10,000 લીટર સેનીટાઇઝર બનાવવા માટેનું પ્રવાહી, 525 X 5 Ltr., 159 X 500 ml., 39 X 250 ml., 78 X 100 ml. (કુલ 2722 લીટર) તૈયાર પ્રોડક્ટ, પેકીંગ મટીરીયલ, કાચા દ્રવ્યો, મશીનરી, 120 કિ.ગ્રા. અલગ અલગ ફ્લેવર વગેરે મળી કુલ 13 લાખ રૂપિયાનો 3 ટ્રક જેટલો મુદ્દામાલ કબ્જે કરવામા આવ્યો છે. તેમજ તેઓએ જાતે બનાવેલ બનાવટી લાયસન્સ અને ખોટા સર્ટીફીકેટ (WHO-GMP Certifications સ્કીમ મુજબ) પકડ્યા છે. તેઓ દ્વારા કેટલા સમયથી આ બનાવટોનું ઉત્પાદન થાય છે? તથા અત્યાર સુધી કોને કોને વેચાણ કરવામાં આવ્યું છે? તે ઉપરાંત ઉપયોગ કરેલ આલ્કોલ ક્યાંથી મેળવ્યુ છે? ક્યાં ક્યાં વેચાણ કર્યુ છે? તેની સઘન તપાસ સુરતના ડ્રગ્સ વિભાગના અધિકારીઓ દ્વારા કરવામાં આવી રહી છે.