મહારાષ્ટ્ર / મુખ્યમંત્રી પદના દંગલમાં શિવસેના પડ્યું નરમ, હવે સંજય રાઉતે કહ્યું કે...

• મહારાષ્ટ્રમાં મુખ્યમંત્રી પદ માટે ભાજપ શિવસેના વચ્ચે ઘમાસાણ  
• શિવસેનાનું વલણ નરમ પડ્યું
• સંજય રાઉતે કહ્યું અમે સરકાર બનાવવાની વાતચીત ક્યારેય રોકી નથી

ગઠબંધન ધર્મનું પાલન કરીશું 

મહારાષ્ટ્રમાં વિધાનસભા ચૂંટણીના પરિણામો આવ્યા તે દિવસથી જ ભાજપ અને શિવસેના વચ્ચે મુખ્યમંત્રી પદ માટે વિખવાદ થઈ રહ્યો છે. મહારાષ્ટ્રમાં કોઈ પણ પાર્ટીને બહુમત મળ્યું નથી જ્યારે શિવસેના-ભાજપ ગઠબંધન સરકાર બનવવાની સ્થિતિમાં છે પરંતુ શિવસેના દ્વારા 50-50 ફોર્મ્યુલાની માંગ કરાતા મામલો અટકી પડ્યો છે. જોકે હવે શિવસેનાનું વલણ નરમ પડતું દેખાઈ રહ્યું છે. શિવસેનાએ કહ્યું છે કે તેમણે ક્યારેય વાતચીત બંધ નથી કરી અને તે ગઠબંધન ધર્મનું પાલન કરશે. આપણે જણાવી દઈએ કે મહારાષ્ટ્ર વિધાનસભાનો કાર્યકાળ 8 નવેમ્બરના રોજ પૂરો થઇ રહ્યો છે અને હજુ સુધી ભાજપ-શિવસેના વચ્ચે આધિકારિક સંવાદ શરુ નથી થયો. 

શિવસેના નેતા સંજય રાઉતે કહ્યું કે સેનાએ ગઠબંધન રહીને ચૂંટણી લડી હતી અને અમે છેલ્લી ઘડી સુધી ગઠબંધન ધર્મનું પાલન કરીશું. બીજીબાજુ કોંગ્રેસ નેતા દ્વારા સોનિયા ગાંધીને પત્ર લખવામાં આવ્યો છે જેનું સંજય રાઉતે સ્વાગત કર્યું હતું, આ પત્રમાં શિવસેનાના નેતૃત્વવાળી સરકારને કોંગ્રેસ સમર્થન આપે તેવી આજીજી કરવામાં આવી છે. 

શિવસેના-ભાજપને છોડીને બધા એકબીજાથી વાત કરી રહ્યા છે: રાઉત 
 
શુક્રવારે સંજય રાઉતે દાવો ઠોકયો હતો કે રાજ્યમાં મજબુત સરકાર બનાવવા માટે શિવસેના પાસે તાકાત છે. તેમણે વધુમાં જણાવ્યું કે રાજ્યમાં વર્તમાન રાજનીતિક સ્થિતિને જોતા બધા એકબીજા સાથે વાત કરી રહ્યા છે સિવાય ભાજપ-શિવસેના. તેમણે કહ્યું કે અમે ગઠબંધનની વાતચીત નથી રોકી પણ વાત ચાલુ જ નથી થઈ. 

શિવસેના-NCP ગઠબંધનની થઇ હતી ચર્ચા

ગુરુવારે સંજય રાઉતે NCP નેતા શરદ પાવર સાથે મુલાકાત કરી હતી જે બાદ રાજ્યભરમાં NCP શિવસેના વચ્ચે ગઠબંધનની અટકળો લાગી હતી. જેના પર શિવસેના નેતા સંજય રાઉતે કહ્યું કે મહારાષ્ટ્રને લઈને ઘણા મુદ્દાઓને લઈને નેતાઓ વાતચીત કરી રહ્યા છે. જ્યાં બીજી તરફ કોંગ્રેસ નેતાઓએ પણ સોનિયા ગાંધી સાથે મુલાકાત કરી હતી. 

શરદ પવારે વિપક્ષમાં બેસવાની કરી વાત

એનસીપીના પ્રમુખ શરદ પવારે સ્પષ્ટ કર્યું છે કે તેમનો પક્ષ વિપક્ષમાં બેસશે. તેમણે કહ્યું કે જનતાએ અમને વિપક્ષ તરીકે પસંદ કર્યા છે. અમે વિરોધ પક્ષમાં બેસીશું. ગુરુવારે શિવસેનાના નેતા સંજય રાઉતને મળ્યાં બાદ તેમણે કહ્યું હતું કે રાઉતે મને મળ્યા હતા, પરંતુ શિવસેના વિશે કોઈ વાત થઈ નથી.