- સલમાન ખાનને મારી નાખવાની ધમકી મળી હતી.
- મુંબઈ ક્રાઈમ બ્રાન્ચે આરોપીની કરી ધરપકડ.
- આરોપીની થઈ રહી છે પૂછપરછ.
બોલીવુડ અભિનેતા સલમાન ખાનને મારી નાખવાની ધમકી આપનારની ધરપકડ કરી લેવામાં આવી છે. મુંબઈ ક્રાઈમ બ્રાંચે ધમકી આપનાર 16 વર્ષના સગીરની ધરપકડ કરી લીધી છે. સગીર પર આરોપ મુકવામાં આવ્યો છે કે, તેણે મુંબઈ પોલીસ કંટ્રોલ રૂમમાં ફોન કરીને સલમાન ખાનને મારી નાખવાની ધમકી આપી હતી. ધમકીભર્યા ફોન આવતા મુંબઈ પોલીસે આ કેસ મુંબઈ ક્રાઈમ બ્રાંચને સોંપી દીધો હતો, ત્યારબાદ ક્રાઈમ બ્રાંચે તપાસ શરૂ કરી હતી. તપાસમાં આ ધમકીના તાર રાજસ્થાનના બાડમેર સાથે જોડાયા હોવાનું જાણવા મળ્યું હતું. ક્રાઈમ બ્રાંચે 16 વર્ષના સગીરની ધરપકડ કરી લીધી છે. આરોપીએ પોલીસને રોકી ભાઈના નામે કોલ કર્યો હતો અને 30 તારીખે મારી નાખવાની ધમકી આપી હતી. પોલીસ આરોપીની પૂછપરછ કરી રહી છે. ધમકી શા માટે આપી? આ ધમકી આપવા પાછળ અન્ય કોઈ જવાબદાર છે કે નહીં? ફોન શા માટે કર્યો હતો? આ તમામ સવાલના જવાબ મેળવવાની કોશિશ કરવામાં આવી રહી છે.
12 કલાકમાં આરોપીની ધરપકડ
મુંબઈ પોલીસે ગઈકાલે રાત્રે આ કેસ ક્રાઈમ બ્રાંચને સોંપી દીધો હતો. ધમકીભર્યો ફોન આવ્યો તેના 12 કલાકમાં જ પોલીસે આરોપીની દબોચી લીધો છે. પૂછપરછ પછી આરોપીને જુવેનાઈલ કોર્ટમાં રજૂ કરવામાં આવશે.
સલમાન ખાનની સુરક્ષા વધી
છેલ્લા ઘણા સમયથી સલમાન ખાનને ધમકીઓ આપવામાં આવી રહી છે. આ કારણોસર ભાઈજાનની સુરક્ષામાં વધારો કરવામાં આવ્યો છે. હાલમાં સલમાન ખાન ચુસ્ત સુરક્ષા બંદોબસ્ત સાથે જોવા મળે છે. તમને જણાવી દઈએ કે, સલમાન ખાને તાજેતરમાં નિસાનની બુલેટપ્રૂફ કાર ખરીદી છે.
હાલમાં સલમાન ખાન પોતાની આવનારી ફિલ્મ ‘કિસી કા ભાઈ કિસી કી જાન’ના પ્રમોશનમાં વ્યસ્ત છે. આ કારણોસર તેઓ ઘરની બહાર નીકળતા રહે છે. આ પરિસ્થિતિમાં તેમને ધમકી મળવી તે એક ગંભીર બાબત છે.
