સંસદનું બજેટ સત્ર / રાષ્ટ્રપતિ મુર્મૂએ કહ્યું આ યુગ નિર્માણનો અવસર છે, આપણે એવું ભારત બનાવવું છે, જે આત્મનિર્ભર હોય

• સંસદમાં રાષ્ટ્રપતિ દ્રૌપદી મુર્મુનું આ પ્રથમ ભાષણ છે
• આપણે આત્મનિર્ભર ભારત બનાવવાનું છે - દ્રૌપદી મુર્મુ
• ભારતનો આત્મવિશ્વાસ તેના સર્વોચ્ચ સ્તરે છે - દ્રૌપદી મુર્મુ

સંસદનું બજેટ સત્ર આજથી શરૂ થયું છે અને આ પ્રસંગે રાષ્ટ્રપતિ દ્રૌપદી મુર્મુએ સંસદના બંને ગૃહોની સંયુક્ત બેઠકને સંબોધિત કરી હતી. પહેલા પીએમ મોદીએ મીડિયા સાથે વાત કરી હતી. સંસદમાં રાષ્ટ્રપતિ દ્રૌપદી મુર્મુનું આ પ્રથમ ભાષણ છે અને આ અવસર પર તેમણે કહ્યું કે આ એક યુગ બનાવવાનો અવસર છે, આપણે આત્મનિર્ભર ભારત બનાવવાનું છે. 

આજે ભારત વિશ્વની સમસ્યાઓ ઉકેલવાનું માધ્યમ છે
બજેટ સત્રમાં અભિભાષણ શરૂ કરતાં રાષ્ટ્રપતિ દ્રૌપદી મુર્મુએ કહ્યું કે, આજે આ સત્ર દ્વારા હું દેશવાસીઓનો આભાર વ્યક્ત કરું છું કે તેઓએ સતત બે ટર્મ માટે સ્થિર સરકારની પસંદગી કરી છે. મારી સરકારે હંમેશા દેશના હિતને સર્વોપરી રાખ્યું છે, નીતિ-રણનીતિને સંપૂર્ણ રીતે બદલવાની ઇચ્છા દર્શાવી છે. જે ભારત એક સમયે પોતાની સમસ્યાઓના નિરાકરણ માટે અન્યો પર નિર્ભર હતું તે આજે વિશ્વની સમસ્યાઓના ઉકેલ માટેનું માધ્યમ બની ગયું છે.

સરકારે લીધા કડક પગલાં 
રાષ્ટ્રપતિ દ્રૌપદી મુર્મુએ કહ્યું કે, સર્જિકલ સ્ટ્રાઈકથી લઈને આતંકવાદ પર આકરા હુમલા સુધી, એલઓસીથી લઈને એલએસી સુધી દરેક દુ:સાહસનો જોરદાર જવાબ આપ્યો, કલમ 370 હટાવવાથી લઈને ટ્રિપલ તલાક સુધી, મારી સરકારની ઓળખ નિર્ણાયક સરકાર રહી છે.

સંસદના બજેટ સત્રમાં રાષ્ટ્રપતિનું અભિભાષણ શરૂ: કહ્યું ભારતનો આત્મવિશ્વાસ તેના સર્વોચ્ચ સ્તરે છે અને વિશ્વ તેને અલગ દ્રષ્ટિકોણથી જોઈ રહ્યું છે.#PresidentofIndia #vtvgujarati #budget pic.twitter.com/ULh8FVSi5y

— VTV Gujarati News and Beyond (@VtvGujarati) January 31, 2023

રાષ્ટ્રપતિનું અભિભાષણ શરૂ
સંસદના બજેટ સત્રમાં રાષ્ટ્રપતિનું અભિભાષણ શરૂ કરતાં દ્રૌપદી મુર્મુએ કહ્યું કે 'ભારતનો આત્મવિશ્વાસ તેના સર્વોચ્ચ સ્તરે છે અને વિશ્વ તેને અલગ દ્રષ્ટિકોણથી જોઈ રહ્યું છે.' આગળ એમને કહ્યું કે, 'એવું ભારત બનાવવું છે કે જેમાં કોઇ ગરીબ ના હોય, જેનો મધ્યમ વર્ગ પણ સમૃદ્ધ હોય. એક એવું ભારત કે જેમાં યુવાનો અને મહિલાઓ સમાજ અને દેશને રસ્તો બતાવવા માટે મોરચે ઊભા રહે, એવું ભારત તૈયાર કરવું છે કે જેના યુવાનો સમય કરતાં બે ડગલાં આગળ રહે'

Delhi | President Droupadi Murmu's cavalcade on its way to the Parliament pic.twitter.com/HgvzKMqtZA

— ANI (@ANI) January 31, 2023

પીએમ મોદીએ કરી હતી મીડિયા સાથે વાત
આ પહેલા પીએમ મોદીએ મીડિયા સાથે વાત કરી હતી અને આ દરમિયાન તેમણે કહ્યું કે આજે રાષ્ટ્રપતિ દ્રૌપદી મુર્મુનું પ્રથમ સંબોધન છે. આ નારી સન્માનની તક છે. એટલું જ નહીં પીએમ મોદીએ વિપક્ષના સાંસદોને અપીલ કરી હતી કે સત્રમાં વિવાદ થશે પણ દરેક મુદ્દે ચર્ચા થવી જોઈએ.'જણાવી દઈએ કે આજે રાષ્ટ્રપતિના સંબોધન પછી આર્થિક સર્વે રજૂ કરવામાં આવશે જ્યાં દેશની આર્થિક સ્થિતિ જાણવા મળશે.

સત્રમાં ભારે હંગામો થઈ શકે છે
જો કે કે તરફ વિપક્ષે સર્વપક્ષીય બેઠકમાં સંકેતો આપ્યા છે કે સત્રમાં ભારે હંગામો થઈ શકે છે. આ સાથે જ વિદેશી એજન્સી દ્વારા ઉદ્યોગપતિ ગૌતમ અદાણી સામેના અહેવાલ અને બીબીસીની ડોક્યુમેન્ટરીના સ્ક્રીનિંગ પર પ્રતિબંધ મૂકવાના મુદ્દે પણ કોંગ્રેસ સહિત તમામ વિરોધ પક્ષો હાલમાં સરકારને ઘેરવાની તૈયારી કરી રહ્યા છે. આ સાથે જ બેરોજગારી અને મોંઘવારી મુદ્દે પણ સરકારની મુશ્કેલીઓ વધી શકે છે. જણાવી દઈએ કે આ પહેલા સરકારે રક્ષા મંત્રી રાજનાથ સિંહની અધ્યક્ષતામાં સર્વપક્ષીય બેઠક બોલાવી હતી અને આ બેઠકમાં 27 પક્ષોના 37 નેતાઓએ ભાગ લીધો હતો અને પોતપોતાના પક્ષોના વિષયો રાખ્યા હતા.