નિવેદન / ગુજરાતમાં કોરોનાના આંશિક પ્રતિબંધો લાગુ થઈ શકે, આરોગ્ય મંત્રીએ આપ્યા સંકેત, જુઓ ઉજવણીને લઈ શું કહ્યું

• કોરોનાને લઇ આરોગ્ય મંત્રીએ શું કહ્યું? 
• આપણે ત્યાં દર્દીઓ ઘરે જ સાજા થયા : ઋષિકેશ પટેલ
• ગુજરાતમાં હાલ 27 જેટલા કોરોનાના કેસ છે

માંડ શાંત પડેલા કોરોનાના BF 7 વેરિયન્ટએ ચીનમાં કહેર મચાવવાનું શરૂ કર્યું છે. જેને લઈને ગુજરાત માથે પણ કોરોનાની ઉપાધીના ભણકારા વાગી રહ્યા છે. ગુજરાતમાં કોરોનાના કેસો વધતા સરકાર પણ સતર્ક મોડમાં આવી છે. ત્યારે કોરોનાની સ્થિતિને લઇ આરોગ્ય મંત્રી ઋષિકેશ પટેલએ નિવેદન આપ્યું હતું.

બીજા દેશો કરતા આપણા દેશમાં સ્થિતિ સારી છે: ઋષિકેશ પટેલ

જેમાં તેમણે જણાવ્યું કે બીજા દેશોમાં કોરોનાના કારણે સ્થિતિ વધુ ખરાબ છે જયારે આપણે ત્યાં દર્દીઓ ઘરે જ સાજા થયા હતા. વધુમાં બીજા દેશો કરતા આપણા દેશમાં સ્થિતિ સારી હોવાનો પણ દાવો કર્યો છે.વધુમાં સાવચેતીને લઇ લોકોએ નિયમોનું પાલન કરવા પણ જણાવ્યું હતું. આરોગ્ય મંત્રીના જણાવ્યા અનુસાર ગુજરાતમાં હાલ 27 જેટલા કોરોનાના કેસ છે. વધુમાં તેમણે એમ પણ જણાવ્યું કે કેન્દ્ર સરકારની ગાઇડલાઇન મુજબ કામ કરીશું જેના ભાગરૂપે ગુજરાતમાં ઉજવણીમાં પણ કોરોનાના નિયમો લાગુ પડશે તેમ અંતમાં ઉમેર્યું હતું. પાંચ દેશોમાં હાહાકાર મચાવી રહેલા કોરોનાને જોઈને ભારત સરકારે અત્યારથી કોરોનાના ડામવા મોટાપાયે તૈયારીઓ શરુ કરી દીધી છે. હેલ્થ મિનિસ્ટ્રીની એડવાઈઝરી બાદ હવે ઈન્ડીયન મેડિકલ એસોસિેએશને પણ મોટી ગાઈડલાઈન્સ બહાર પાડીને લોકોને શું કરવું અને શું ન કરવું તે સંબંધિત સલાહ આપી છે. 

ઈન્ડિયન મેડિકલ એસોસિએશન દ્વારા પ્રોટોકોલનું પાલન કરવા અપીલ

વધુમાં ઈન્ડિયન મેડિકલ એસોસિએશને પણ નાગરિકોને કોવિડ પ્રોટોકોલનું પાલન કરવાની અપીલ કરી છે. આઈએમએના પ્રમુખ એસ.એન.પી.સિંહે કહ્યું કે ચીન, અમેરિકા જેવા દેશોમાં જે સ્થિતિ છે તે જોતા કોઈ પણ પ્રકારની બેદરકારી દાખવવી યોગ્ય નથી. તેમણે કહ્યું કે હવે આપણે માસ્ક પહેરવાનું શરૂ કરી દેવું જોઈએ. આ ઉપરાંત તેમણે બિનજરૂરી પ્રવાસો ટાળવાની પણ અપીલ કરી છે. ડો.સિંહે કહ્યું કે આ એક એવો પ્રસંગ છે જ્યારે વિદેશ યાત્રાઓ ફક્ત મુસાફરી માટે ન કરવી જોઈએ.તેમણે કહ્યું કે જાહેર સ્થળોએ માસ્ક પહેરવું, બિન-આવશ્યક મુસાફરી ન કરવી અને સમારંભો મુલતવી રાખવાની સલાહ આપવામાં આવી છે. 

ભારતમાં કોરોનાની ચોથી લહેરના ભણકારા 

ચીનમાં કોરોના ફેલાવાને કારણે ભારતમાં ભયની સ્થિતિ છે અને ચોથી લહેર આવવાની સંભાવના છે. સરકારે પણ કોંગ્રેસ પાર્ટીને તેની ભારત જોડો યાત્રા બંધ કરવાની સૂચના આપી છે. એટલું જ નહીં ભાજપે પોતે રાજસ્થાનમાં પોતાની જનક્રોશ યાત્રા સ્થગિત કરી દીધી છે. માનવામાં આવી રહ્યું છે કે, આગામી દિવસોમાં કેટલાક નિયમોનું પાલન કરવાની સલાહ સરકાર આપી શકે છે.