કડવાશ / નેપાળની અવળચંડાઇ સંસદ પહોંચી, એક નિર્ણયથી ભારત સાથેના સંબંધોમાં સૌથી મોટી તિરાડ

• નેપાળની સંસદમાં પાસ થયો નેપાળનો નવો નકશો 
• ભારતના 3 સ્થળો નેપાળે પોતાના દર્શાવ્યા 
• ભારત સાથેના સંબંધો વધુ વકરશે 

નેપાળના નવા નકશાને કાનૂની માન્યતા આપવા માટે આજે સંસદમાં વોટિંગ કરવામાં આવ્યું અને 275 સભ્યો ધરાવતી સંસદમાં નેપાળના નવા નકશાના સમર્થનમાં 258 વોટ પડ્યા. નવા નકશામાં નેપાળે લીમ્પિયાધુરા, લિપુલેખ અને કાલાપાનીને પોતાના ભાગમાં દર્શાવી લીધા છે. 

ભારતે હંમેશા કરી છે મદદ 

ભારતે કોરોના કાળમાં નેપાળની ખૂબ મદદ કરી છે. અમુક એવા દેશો જેને હાઈડ્રોકસીક્લોરોક્વીન આપવામાં આવી તેમાં નેપાળ પણ સામેલ છે. વિદેશોમાં ફસાયેલા નેપાળી લોકોને નીકાળવામાં પણ ભારતે હાથ આગળ કર્યો. સરહદ પર વિવાદ થયો છતાં ભારતે માનવતા રાખી અને આવશ્યક ચીજવસ્તુઓની સપ્લાય રોકી નથી.  

ભારત અને નેપાળનો પૌરાણિક નાતો 

આજે નેપાળ સંસદમાં વોટિંગ કરે તે પહેલા ભારતે નેપાળને સંસ્કૃતિક સંબંધો યાદ અપાવ્યા હતા. વિદેશ મંત્રાલયના પ્રવકતા અનુરાગ શ્રીવાસ્તવે કહ્યું હતું કે અમે દરેક પરિસ્થિતિ નેપાળ સામે સ્પષ્ટ કરી દીધી છે. નેપાળ સાથે અમારા પૌરાણિક અને મિત્રતા ભરેલા સંબંધો રહ્યા છે. આ સિવાય સંકટના સમયમાં ભારતે કઈ રીતે નેપાળની મદદ કરી છે તે યાદ અપાવતા શ્રીવાસ્તવે કહ્યું કે અમે નેપાળને 25 ટન દવા અને મેડિકલ સાધનો આપ્યા. પુષ્કળ સંખ્યામાં પેરાસેટામોલ અને હાઈડ્રોકસીક્લોરોક્વીન પણ આપી. 

શું છે નકશાનો વિવાદ 

નોંધનીય છે કે થોડા સમય પહેલા નેપાળની સરહદ પાસે ભારતે એક માર્ગનું નિર્માણ કર્યું જેનો ઉદ્દેશ કૈલાશ માનસરોવર યાત્રાનો હતો પરંતુ નેપાળને તેનાથી વાંધો છે. નેપાળનું માનવું છે કે તે વિસ્તાર નેપાળનાં જ છે. નેપાળે લીમ્પિયાધુરા, લિપુલેખ અને કાલાપાની પર પોતાનો દાવો કર્યો અને નવો નકશો પણ જાહેર કરી દીધો. હવે આ નકશો સંસદમાં પાસ કરી દેવામાં આવ્યો છે. 

ગઈકાલે સીતામઢીમાં કરી હતી અવળચંડાઈ 

એક તરફ આ વિવાદ ચાલી રહ્યો હતો ત્યાં શુક્રવારે નેપાળની પોલીસે સીતામઢીમાં અંધાધુંધ ફાયરીંગ કરી જેમાં ચાર ભારતીયોને ગોળી વાગી અને એક વ્યક્તિનું મોત નીપજ્યું છે.