દુ:ખદ ઘટના / કાર રિવર્સ કરતા પહેલાં ધ્યાન રાખજો, MPમાં બની ચોંકાવનારી ઘટના, પિતા અને બે પુત્રોના કરૂણ મોત

• મધ્યપ્રદેશના સાગરમાં સર્જાયો કાર અકસ્માત
• કાર રિવર્સ દરમ્યાન કૂવામાં ખાબકતા 3નાં મોત
• પિતા અને બે પુત્રોના કૂવામાં ખાબકતા કરૂણ મોત

મધ્યપ્રદેશના સાગર ખાતેથી એક દુઃખદ સમાચાર સામે આવ્યા છે. જ્યાં ગુરુવારે રાતે એક અકસ્માતમાં એક શિક્ષક પિતા અને બે બાળકોનું ઘટનાસ્થળે જ મોત નિપજ્યું હતું. આ ભયાનક અકસ્માત એ રીતે થયો કે જ્યારે તે શિક્ષક પોતાના બાળકોને કારમાં બેસાડીને પોતાના ઘરે પરત ફરી રહ્યાં હતા. એ દરમિયાન તેઓની કારે એકાએક પલટી મારતા જ કાર 5 ફૂટ ઊંડા કૂવામાં પડી ગઈ હતી.

ત્રણેયને કુવામાં જોતા જ લોકો ચીસો પાડવા લાગ્યા

આ દર્દનાક અકસ્માત ગુરુવારે રાત્રે લગભગ 9.45 વાગ્યે શહેરની ગોવિંદનગર કોલોનીમાં થયો હતો. જ્યાં વ્યવસાયે શિક્ષક હિમાંશુ તિવારી પોતાના પરિવાર સાથે રહેતો હતો. હિમાંશુ પોતાના બે પુત્રો નિત્યાંશુ (14) ઉર્ફે બિટ્ટુ તિવારી અને ધનંજય (10) ઉર્ફે ધ્રુવ તિવારીને કારમાં બેસાડવાની જીદ પર લઈ ગયો હતો. જ્યારે પત્ની મણિપ્રભા ઘરે હતી. દરમ્યાન શિક્ષક જ્યારે પોતાના ઘરે પરત ફરી રહ્યાં હતાં ત્યારે કાર રિવર્સ કરતી વખતે તેમની કાર અચાનક જ કૂવામાં પડી ગઈ. એ જ સમયે કૂવામાં કંઇક પડવાનો અવાજ આવતા જ લોકો દોડીને ઘટનાસ્થળે પહોંચ્યા હતાં. ત્યારે લોકોએ કૂવામાં ઉપરથી જોયું તો તેની અંદર એક કાર ખાબકેલી હતી. બાદમાં શિક્ષકના પરિવારના સભ્યો આવ્યા અને તેઓએ પણ બૂમાબૂમ કરી મૂકી.

બંને પુત્રોની લાશ કારમાં ન હતી

અકસ્માતની માહિતી મળતાની સાથે જ પોલીસ પણ તુરંત ઘટનાસ્થળે પહોંચી ગઈ હતી અને બચાવ કામગીરી હાથ ધરાઇ હતી. લાંબી જહેમત બાદ ત્રણેયના મૃતદેહ અને કારને કૂવામાંથી બહાર કાઢવામાં આવ્યા. જણાવી દઈએ કે, કારની અંદર માત્ર શિક્ષક હિમાંશુ તિવારીનો જ મૃતદેહ હતો, જ્યારે બંને બાળકોના મૃતદેહ કૂવામાંથી બહાર કાઢવામાં આવ્યા હતાં. બાદમાં મોટા પુત્રના મૃતદેહને કાંટો નાખીને બહાર કાઢવામાં આવ્યો હતો. બાદમાં પોલીસ અકસ્માત સ્થળ પર લાગેલા સીસીટીવીની તપાસ કરી રહી છે. જેથી આ મામલે તપાસ કરવામાં વધુ મદદ મળી રહે.

પુત્રની ખુશી માટે શિક્ષક રોજ પોતાના પુત્રને કારમાં લઈ જતા

જણાવી દઈએ કે પત્ની મણિપ્રભાને રાત્રે પતિ અને પુત્રોના મૃત્યુની જાણ કરવામાં આવી ન હતી. પરિવારે માત્ર એટલું જ કહ્યું હતું કે, ત્રણેયની તબિયત સારી છે, હોસ્પિટલમાં હાલ સારવાર ચાલી રહી છે. આ સાથે પરિવારે જણાવ્યું કે, શિક્ષક પિતા હિમાંશુ દરરોજ ભોજન કર્યા બાદ પોતાના મોટા પુત્રને કારમાં લઇને જતો હતો, કારણ કે તે જન્મથી જ અપંગ છે. પિતાએ તેને ફેરવવા માટે જ કાર ખરીદી હતી. આથી તેને ખુશ કરવા માટે તે દરરોજ પોતાના પુત્રને કારમાં લઈ જતો. પરંતુ ગુરુવારે રાત્રે તેઓ પોતાના બંને પુત્રોને ફરવા લઈ ગયો હતો.