ઘટસ્ફોટ / મહાઠગ કિરણ પટેલ માત્ર 6 જ મહિનામાં આટલી વાર ગયો હતો કાશ્મીર, મોટું પદ મેળવવાના હતા અભરખાં

• મહાઠગ કિરણ પટેલ હાલ અમદાવાદ ક્રાઈમ બ્રાન્ચમાં
• 6 મહિનામાં 4 વખત કાશ્મીર ગયો હતો કિરણ પટેલ
• મહત્વનું પદ મેળવવા કિરણ પટેલે કર્યો હતો પ્રયાસ

મહાઠગ કિરણ પટેલને ટ્રાન્સફર વોરંટના આધારે જમ્મુ-કાશ્મીરથી અમદાવાદ લાવવામાં આવ્યો છે. અમદાવાદમાં ક્રાઈમ બ્રાન્ચની ટીમ કિરણ પટેલની પૂછપરછ કરી રહી છે. ત્યારે આ મામલે મોટા ખુલાસા થયા છે. મહાઠગ કિરણ પટેલ છેલ્લા 6 મહિનામાં 4 વખત કાશ્મીર ગયો હતો. કિરણ પટેલે અમિત પંડ્યા, જય સીતાપરાની કાશ્મીરના અધિકારીઓ સાથે બેઠક કરાવી હતી. કિરણ પટેલ વર્ષ 2022માં પ્રથમ વખત કાશ્મીર ગયો હતો, જે બાદ તે વર્ષ 2023માં 3 વખત કાશ્મીર ગયો હતો. મહાઠગે ફેબ્રુઆરીમાં 2 વખત અને માર્ચ મહિનામાં એક વખત કાશ્મીરની મુલાકાત લીધી હતી. 

એક મહત્વનું પદ મેળવવા કિરણ પટેલ કરી રહ્યો હતો પ્રયાસ
એવું પણ સામે આવ્યું છે કે, આ ઠગે પરિવાર સાથે પણ કાશ્મીરની મુલાકાત લીધી હતી. કિરણ પટેલે કાશ્મીરના અધિકારીઓને PMOના અધિકારી તરીકે ઓળખ આપી હતી. તેણે મહત્વનું પદ મેળવવા માટે પ્રયાસ કર્યા હતા. 

પૂછપરછમાં થઈ શકે છે મહત્વના વધુ ખુલાસા
હાલ આ ઠગની ગુજરાતના પૂર્વ મંત્રી જવાહર ચાવડાના ભાઈ જગદીશ ચાવડાનો બંગલો પચાવી પાડવાના ષડયંત્ર મામલે પૂછપરછ ચાલી રહી છે.   હજુ પણ પોલીસની પૂછપરછમાં મહત્વના ખુલાસા થઈ શકે છે. અમદાવાદના સિંધુ ભવન રોડ પર સ્થિત ભાજપના પૂર્વ મંત્રીના ભાઈનો બંગલો પચાવી પાડવાનો પ્રયાસ કરવાના કેસમાં ક્રાઈમ બ્રાન્ચે શ્રીનગરથી મહાઠગ કિરણ પટેલની ટ્રાન્સફર વોરંટના આધારે કસ્ટડી મેળવી છે. ક્રાઈમ બ્રાન્ચની ટીમ કિરણ પટેલને લઈને અમદાવાદ પહોંચી છે. કિરણ પટેલની પત્ની માલિની પણ ધરપકડ થઈ ચૂકી છે. કિરણ પટેલ અને પત્ની માલિનીએ બંગલો પચાવવા પ્રયાસ કર્યો હતો. બોગસ ડોક્યુમેન્ટના આધારે બંગલો પચાવી પાડવાનો પ્રયાસ કર્યો હતો જે મામલે ક્રાઈમ બ્રાન્ચમાં થયેલી ફરિયાદને લઈ માલિનીની પણ ધરપકડ કરાઈ હતી. કિરણ પટેલને અમદાવાદ ક્રાઈમ બ્રાન્ચમાં લાવી પૂછપરછ શરૂ કરાઇ છે. નકલી PMO ઓફિસર બનીને કેવા પ્રકારે છેતરપિંડી કરી તે મુદ્દે પણ તપાસ થશે.

જગદીશ ચાવડાના બંગલામાં લગાવી દીધું હતું પોતાનું બોર્ડ
PMOમાં નોકરી કરું છું અને મારી બહુ મોટી ઓળખાણ છે આવું કહી છેતરપિંડી કરનાર મહાઠગ કિરણ પટેલે પૂર્વ મંત્રીના ભાઈને પણ નથી મૂક્યા. પૂર્વ મંત્રી જવાહર ચાવડાના ભાઈ જગદીશ ચાવડાના સિંધુભવન રોડ પર આવેલી નીલકંઠ ગ્રીન સોસાયટીના બંગલા પર કિરણ પટેલે નજર બગાડી હતી. મોટી-મોટી ઓળખાણો આપીને અને મીઠી મીઠી વાતો કરીને જગદીશ ચાવડાનો બંગલો ઝડપી લેવા માટે ષડયંત્ર રચ્યું હતું. જગદીશ ચાવડાના બંગલાના રિનોવેશનના નામે કિરણ પટેલે પોતાનો દાવો મુક્યો હતો. વાસ્તુ કરાવી કિરણ પટેલે બંગલો પચાવવાનો પ્રયાસ કર્યો હતો. જગદીશ ચાવડાના બંગલામાં કિરણ પટેલે પોતાનું બોર્ડ પણ લગાવી દીધું હતું. એટલું જ નહીં બાદમાં કિરણ પટેલ સિવિલ કોર્ટમાં ખોટો કેસ પણ દાખલ કર્યો હતો. 

અનેક લોકોને છેતરી ચૂક્યો છે મહાઠગ
આપને જણાવી દઈએ કે, કિરણ પટેલ અત્યાર સુધીમાં ઘણાં લોકોને ચૂનો ચોપડી ચૂક્યો છે. તેની વિરુદ્ધ વડોદરામાં પણ ફરિયાદ નોંધાઈ ચૂકી છે. કિરણ પટેલે વડોદરામાં 2018માં ગરબા મહોત્સવનું આયોજન કર્યું હતું. જેમાં તેણે અમદાવાદના ડેકોરેશનના ધંધાર્થીઓને ચૂનો ચોપડ્યો હતો. કિરણ પટેલે જૈન ડેકોરેટર્સ એન્ડ કેટરર્સ સાથે 1 કરોડથી વધુની છેતરપિંડી આચરી હતી. જેથી કિરણ પટેલ વિરુદ્ધ રાવપુરા પોલીસ સ્ટેશનમાં ફરિયાદ દાખલ કરવામાં આવી હતી.