સુરત / ત્રણ વર્ષની બાળકીના રડવાનો અવાજ, જોયું તો નિર્વસ્ત્ર હાલતમાં હતી, પાંડેસરામાં અઘટિત બનાવ લોકોએ આ રીતે અટકાવ્યો

• સુરતમાં ત્રણ વર્ષની બાળકી સાથે અઘટિત ઘટના બનતા સ્હેજમાં ટળી
• સ્થાનિકોએ યુવકને દુષ્કૃત્ય કરતા અટકાવ્યો
• પોલીસે યુવકની કરી અટકાયત

સુરતના પાંડેસરા વિસ્તારમાં ત્રણ વર્ષની બાળકી સાથે અઘટિત ઘટના બનતા સ્હેજમાં ટળી હતી. નજીકના લોકોએ સતર્કતા દાખવી બાળકીને ઉગારી લીધી હતી. પાંડેસરા વિસ્તારમાં બાળકીના રડવાનો અવાજ સાંભળી લોકો એકત્ર થયા હતા અને યુવકના ઘરનો દરવાજો ખોલતા બાળકી નિર્વસ્ત્ર હાલતમાં મળી આવી હતી. આ દ્રશ્ય જોઈ સ્થાનિક લોકોના પગ નીચેથી જમીન સરકી ગઈ હતી. આ અંગે પોલીસને જાણ કરતા પોલીસે દોડી જઇ સમગ્ર મામલે યુવકની અટકાયત કરી છે. વધુમાં બાળકીને તાત્કાલિક સિવિલ હોસ્પિટલ ખાતે ખસેડવામાં આવી છે. જ્યા મેડિકલ સહિતની તપાસ હાથ ધરાઈ છે.

ત્રણ વર્ષની બાળકી નિર્વસ્ત્ર હાલતમાં મળી આવી
સુરતમાં બાળકી સાથે અઘટિત ઘટના બનતા અટકી હોવાનો કિસ્સો સામે આવ્યો છે. જાણવા મળતી વિગત અનુસાર પાંડેસરાના વડોદગામ ખાતે આવેલ રણછોડનગરમાં માસૂમ ત્રણ વર્ષની બાળકી પાડોશીના મકાનમાંથી નિર્વસ્ત્ર હાલતમાં મળી આવી હતી. માસૂમ બાળકીના રડવાનો અવાજ સાંભળી આડોશ-પાડોશના લોકો મોટી સંખ્યામાં એકત્ર થઈ ગયા.જ્યાં બાદમાં પાડોશમાં રહેતા અને મૂળ ઉત્તરપ્રદેશના વતની અરવિંદ નિશાદના ઘરનો દરવાજો ખખડાવતા ત્રણ વર્ષની બાળકી નિર્વસ્ત્ર હાલતમાં મળી આવી હતી.જે જોઈ પાડોશીઓ પણ ચોંકી ઉઠ્યા હતા. જેથી ઘટનાની જાણ પોલીસને કરી હતી.આથી પોલીસે દોડી જઇ તપાસ હાથ ધરી હતી.

ભાગ આપવાનું કરી આરોપી બાળકીને ઘરમાં લઈ ગયો
પોલીસે સૌ પ્રથમ અરવિંદ નિશાદ નામના શખ્સને અટકાયતમાં લઇ પુછપરછ હાથ ધરી હતી.જ્યારે માસૂમ બાળાને સુરત નવી સિવિલ હોસ્પિટલ ખસેડી મેડિકલ કરાવવાની તજવીજ હાથ ધરવામાં આવી.પોલીસની પ્રાથમિક પુછપરછમાં આરોપી દ્વારા બાળકી જોડે એવું કોઈ દુષ્કૃત્ય કર્યું ન હોવાની કબૂલાત કરવામાં આવી છે. છતાં પોલીસ આ મામલે ઊંડાણપૂવકની તપાસ કરી રહી છે. પોલીસની તપાસમાં જાણવા મળ્યું છે કે આરોપી અરવિંદ નિશાદ મૂળ ઉત્તરપ્રદેશનો વતની છે અને છેલ્લા 10 વર્ષથી પાંડેસરાના રણછોડ નગર ખાતે રહી મજૂરી કામ કરે છે. આરોપી બાળકીને ભૂંગરા અપાવવાનું કહી પોતાના રૂમમાં લઈ ગયો હોવાનું પણ જાણવા મળ્યું છે.